Read Komrem MATTHEW 7 Bible Online

MATTHEW 7 - Komrem bible

MATTHEW 7

¹“Pathen in nanṭong atanmakna sik, mi chunga ṭong tanmak ruh,

²ajârchu mihei chunga ṭong nantatan kapōhrep a khan Pathen in nangni chunga ṭong atan sik, khana milak chunga nantahmang dân kha nangni chunga’m ahmang sik kae.

³Khan chu nahmit a innim inkamre ka-om chu donlo chea, nasōpui hmit a innim kasintek kha heisa mo na-en?

⁴Heikhonga mo nang hmit a innim inkamre a-ompuma, nasōpui hneng, ‘Nahmit a innim kasintek ka-om kha losōtpek che rong,’ nati tor?

⁵A’nṭhatsak nang! Ahma inkeia nahmit a inkamre ka-om kha losōt hi roh, khava sō leh nasōpui hmit a innim kasintek ka-om kha losōt theina sik inthengtak a nahmuthei sik.

⁶“Neinâk intheng kha uihei hneng pek mak ruh, anmani hong inhe sik heia kha anse sik chei. Khana nanhlung mankatam hei kha vok-hei hmaikunga hlon mak ruh, anchōn rachihrep sik heia kae.

⁷“Der ruh, khan chu nanrahlâng sik; jōng ruh, khan chu nanhmu sik; raki ruh, khan chu kot kha inhlângpek sik chei.

⁸Ajârchu akader rakip in anrahlâng sik, akajong rakip in anhmu sik, khana kot inki hei kha inhlângpek sik hei.

⁹Nangni pahei kâra inkhat hnenga nasapa’n buhlom ader che pha hlung napek sik mo?

¹⁰Achangmak leh nga ader che pha mari napek sik mo?

¹¹Nangni mikaṭhamak chei in hmen nansahei akaṭha pekje nanmanhret a kae. Kha achang inchu, marvâna ka-om nan-Pa’n, ahnenga kader hei kha heituk akakhe chet a neinâk kaṭha apek sik chei mo!

¹²“Nangni sik a mi nantamantlo hnōm kha milak hnenga nangni’num tlo ruh: hivahi Moses Dân leh Sânkathemhei mantheina ṭongjâr hei kha kae.

¹³“Kekot inchîp a hlut ruh, ajârchu hmeikhur kekot kha kalen khana ajōnna hlam kha kabei, khana khava hlam kajui kha katam hei.

¹⁴Tâk hringna kekot kha inchîp khana ahlam jōnna kha intak khava kahmu sōt mi kha katlôm hei.

¹⁵“Sânkathem inhlem heia inphut insing thei ruh; avâng pônga chu kemōng kapōa nanhnenga kahong hei, tâk ashungting chu ram thōia kahne kapōtak hei kae.

¹⁶Anṭōn tlohei vâng nangni’n nanchîktor sik hei. Rahlingbuk heia vomhrui thei inramak, khana rahling kung heia theichang inramak.

¹⁷Thingkung kaṭha a kara kaṭha inra, khana thingkung kaṭhamak a kara kaṭhamak inra.

¹⁸Thingkung kaṭha a kara kaṭhamak inrathei mak, khana thingkung kaṭhamak a kara kaṭha inrathei mak.

¹⁹Khana kara kaṭha a’nramak thingkung rakip kha anphûr heia hmeishunga hlon manhlut sik hei kae.

²⁰Kha achang jâra nangni’n sânkathem kadikmak hei kha anṭōntlo vâng nanchîktor sik hei.

²¹“‘Rōngpu, Rōngpu’ tia anikabek rakip marvân rengram a hlutmak hei ning. tâk marvâna kapa lungdo katlo rōk hei kha akahlut sik hei kae.

²²Ṭong tanna kani kha ajōng tlung pha mi katamtak in, ‘Rōngpu, Rōngpu! Narahminga Pathen ṭong kantalei hrile kae, narahminga ramṭai katamtak kanlei hnongsōt hei khana ṭōn-inlak kanleitlosōt a kae!’ anti sik.

²³Khava pha ke’n anhnenga, ‘Manhret hêrmak chei eng. Kahnenga inphut sesōt ruh, mikaṭhamak-hei!’ kati sik.

²⁴“Khava jâra kaṭonghei hi akatheia akajui rakip, tu achang inum hlungpui chunga inn kasak mikasing kapō kha kae.

²⁵Khō kasûr, tuidung kalen, khana thlipui kahrâng jo khana inn kha akanok manhnak jo. Tâk tlûdek mak, ajârchu hlungpui chunga inn insak kae.

²⁶“Tu achang inum hiva kaṭonghei akatheia akajuimak mi kha nêrdi chunga inn kasak mikamopa kapō kha kae.

²⁷Khō kasûr, tuidung kalen, khana thlipui kahrâng khan inn kha akanok manhnak jo, khana katlu jo. Khana apur kha heituk a a’nhnak hranghra jo mo!”

²⁸Jesu’n hiseng ahrisō pha, aman theinahei chungchânga khan mipui he’n inlak anleisak jo.

²⁹Ama chu Dân ojahei kapōa leichang mak; khava kanek a ratha kaneitak a aleimanthei hei.