Read Komrem MATTHEW 9 Bible Online

MATTHEW 9 - Komrem bible

MATTHEW 9

¹Jesu rakōnga kahlut a dîr kha ahei rakan malea akhōpuiting kahong jo.

²Khan ahnenga lang kangōi jekhuma akaje inkhat anmani’n anhei kadom. Khangtuk taksenna antanei kha ahmu pha, lang kangōipa hnenga khan, “Sapa, namalung manngam roh! Nasetnahei rangei mandam jo che kae,” ati.

³Dân oja ṭhahrep in anbinga, “Hiva mipa hin Pathen dōina ṭong ahri!” antia kae.

⁴Anmalung mandon kha Jesu’n amanhret a, “Heisa mo nanmalunga ṭhatmak nantamandon?

⁵‘Nasetnahei rangei mandam jo che,’ ti hi leh, ‘Thōi roh, najekhum kadom roh, khana na-inna se jo roh,’ ti hi khomo akabei jôk?

⁶Kha achang inchu Mihring Sapa khan raleichunga set rangei mandam torna ratha anei ti hi kamanhmu sik chei,” ati. Khan chu lang kangōipa hneng, “Thōi roh, najena rakhum inlo roh, na-inna se jo roh!” ati.

⁷Mipa kha kathōia a-innting kase jo.

⁸Mipuihei khan kha anhmu pha kaṭi jo hei, khana mihei hnenga hiva kapō torna ratha kha apek jâra Pathen kha anmanpâk jo.

⁹Jesu’n khava hmun kha adahlona khanga asena ramsêrṭhei kakhôm Matthew inti pase inkhat aṭōn tlona hmun a a’n-ong ahmua ahnenga, “Ajui roh,” ati. Matthew khan kathōia akahnung ajui jo.

¹⁰Khana Jesu kha Matthew inna bu aleisâk lai, ramsêrṭhei kakhôm mihei leh mikasehei katamtak he’n Jesu leh asonlehei kha dokhâng hnenga anlei in-ongsap pui hei.

¹¹Pharisee he’n kha anhmu pha, asonlehei hneng, “Heisa mo nan-Oja’n khang khava mihei leh antasâksap?” anti.

¹²Jesu’n aleithei jo heia amasôn hei, “Akadam mihei sik a doctor rangei mak, tâk akanahei sik rōk a arangei.

¹³‘Kei tamadu kha lum lona kae, ran inthoina kha changmak,’ tia ṭong intheng tahri hi heitina mo se una vajongsōt ruh. Kei mi kalûrhei kabea akajōng changmak eng, tâk mikasehei kabea akajōng eng kae.”

¹⁴Khava sōa tui inhlutpa John sonlehei Jesu hneng kahong heia, “Keini leh Pharisee he’n bu kanhngōi ri, tâk heisa mo nasonle he’n antahngōi tet mak?” anti.

¹⁵Jesu’n amasôn heia, “Hmōipa khan ahmelâk-hei leh an-omsaplai anmani kachâma ka-om sik a nantahlamrin mo? Khanga changthei mak ning! Tâk anhnenga inphut hmōipa ṭhōisōtna pha lakahong sik, khava pha bu antahngōi sik kae.

¹⁶“Tute’num zakkō kalen marōa pōnther har rabek phungmak, ajârchu pōnther khan amarō kha akei hlersa sik a kha a’nhler kha kalen chet sik.

¹⁷Khana tu inkhat in shavunpeng marōa juther sun phungmak, ajârchu shavunpeng kha atumkhōi sik, ju kha inlei sik khana shavun kha inhmang sik jo. Khava kanek a, shavunpeng ther a juther kha anda phung, khan chu an-inhnia kaṭha a ka-om thei heia kae,” ati.

¹⁸Jesu’n anhnenga hiva ṭong ahrilai, Jehudihei ṭōnkarôn inkhat kahonga ahmai kunga inkuna, “Kasanu tûntak khan kathi jo, kha’num nang hong ina achunga nakut navada’nchu ama kahring sik,” ati.

¹⁹Khava jâra Jesu kangirsōt a, ama ajui jo, khana asonle he’num anleijui jo.

²⁰Nupui inkhat kum 12 thi kajungnu Jesu kahnungting kahonga apōnhmor avasit.

²¹Abinga inbek a, “Ke’n apōnhmor bek kasit inchu kadam sik eng,” ati.

²²Khana Jesu inhea ama kha ahmua ahnenga, “Kangama om roh, kasanu! Nataksen in amandam jo che,” ati. Khava phatak a khan ama kha kadam jo.

²³Khava sōa Jesu kha ṭōnpui karônpa inna kase jo. Kathi hrena sik a mahring kanei kaṭum hei leh mipui kachōr hei kha aleihmu hei pha,

²⁴ama’n, “Mi rakip sesōt ruh! Naipangnu hi thimak, akaje hnâm kae!” ati. Khava pha anmani ankhenga anleimanuisō.

²⁵Tâk mipuihei kha ahnong sōtsō pha, Jesu’n nuhngâknu innden shunga kahlut a akut avamatupek, khana nuhngâknu kha kathōisōt jo.

²⁶Hiva ṭong hi khava ramṭhen shunga inthang joa kae.

²⁷Khava hmun kha Jesu’n adahlona, khanga aselai, hmitkacho 2 he’n anleijui. Anmani’n, “David Sapa! Alungset roh,” tia an-ôn.

²⁸Jesu’n innshunga ahlut pha, hmitkacho 2 hei kha ahnenga kahong hei, khana ama’n anhnenga ader hei, “Ke’n kaman dam tor sik chei tia nanta taksen mo?” Anmani’n anmasôn, “Ôk, Apu!”

²⁹Khava sōa Jesu’n anhmit asitpek heia ati, “Nantaksenna dungjuia nanchunga chang jo rasoh!”

³⁰khana anhmit kha khō ahmu jo. Jesu’n anhnenga, “Hivahi tûte hneng hrimak ruh!” tia inhnaktak a ahri pek hei.

³¹Tâk kasesōt heia khava ramṭhen pumpui shunga Jesu ṭong kha anhri manthang jo.

³²Anmani ansesōt pha, ṭai arôn jâra akaṭong theimak mi inkhat Jesu hneng anheiṭhōi.

³³Tâk ṭai kha ama’n ahnong sōt lim leh, mipa kha kaṭongthei jo, khana mipuihei khan inlak ansak jo. “Israel shunga hiva kapō inkhatbek lahmu phung hêrmak ung!” antia an-ôn.

³⁴Tâk Phariseehei khan, “Jesu’n taihei hnongsōt torna ratha anei hi ṭaihei vaikarônpa tapek kae,” anleiti.

³⁵Jesu’n khōpui leh khōte rakip a avachōnlea kae. Intûpna innheia, Rengram ṭong kahōi kha ahri le pek hei, khana nat leh sat rakip amandam hei.

³⁶Mipuihei kha a-en hei pha, alungset hêr jo hei, ajârchu ankakhem kase kemōng rup kapōa, lungdong leh inthōpui kasea ka-om heia kae.

³⁷Khava jâra asonlehei hneng, “Sâng ât sik chu katam, tâk aka-ât sik mi chu katlôm hei.

³⁸Asâng kapupa hneng sâng kakhôm sik mi ajōng tîrna sik der ruh,” ati.