Read Komrem MARK 1 Bible Online

MARK 1 - Komrem bible

MARK 1

¹Hivahi Pathen Sapa Jesu Christa chungchânga Ṭong kaṭha kha kae.

²Sânkathem Isaiah lekha leimazet kapōa hing’hin inphut: “Pathen in ati, ‘Nahlam inthengsōt sik a kaṭong karôn nahma a katir sik.’

³Nêrdiram a tu mo inkhat ka-ônga, ‘Rōngpu sik a hlamlen mantluk ruh, ahlam hro sik syem mantlun ruh,’” ati!

⁴Khava jâra Tui Inhlutpa John kha nêrdiram a kahonga, tui amanhlut hei khana Pathen ṭong ahrilea kae. “Nansetna inphut hong inhe ruh khana tui hlut ruh khan chu Pathen in nansetnahei arangei mandam sik chei,” tia mipui aleimanthei hei.

⁵Judea ramṭhen leh Jerusalem khōpuia mi katamtak he’n John ṭong inngei sik a leikasōk hei. Ansetnahei anleiphôngsōt, khana Jordan Tuidunga tui amanhlut heia kae.

⁶John in Sharîngsei sahme pōn a’nsia, shavun khōnkir vâng akhōn a’nkir, athlai sâkchu khōihning leh khâihei kae.

⁷Mipuihei hneng aphông, “Kei kahnunga akahong ama kha kei kanek a kalen hêr. A’nkun enga akekōk hrui kasôt sik kapha karahōi sōk mak.

⁸Ke’n nangni tuia kamanhlut chei, tâk ama’n chu Rathla Inthenga amanhlut sik chei.”

⁹Khava kahnunga sôt lo jen a Galilee ramṭhen a Nazareth khōa inphut Jesu kahonga John in Jordan tuidunga tui aleimanhlut jo.

¹⁰Jesu’n tuia inphut ahei sōk lim leh marvân inhlânga khana vaṭhu kapō Rathla achunga ajōng kachu kha ama’n aleihmua kae.

¹¹Khana marvâna inphut rasa inkhat in, “Nang kasapa marittak che kae, nachunga kamalung katlai,” ajōng ti.

¹²Khavatak a, Rathla khan ama nêrdiram a inrangtak a aleimansesōt jo,

¹³khana khan ni 40 ka-oma, Seitan in aleimathlema kae. Ramsha he’m khana khan ka-om hei tâk marvân ngevahei kahong heia ama anlei inthōpuia kae.

¹⁴John ansura kurkhum a ankhum jo kahnunga, Jesu kha Galileea leikasea khana Pathena inphut ṭong kaṭha aleihrile.

¹⁵Ama’n, “Aphatak kha katluk jo khana Pathen Rengram kha kahnai jo! Nansetna inphut inhe una Ṭong kaṭha hi taksen ruh,” ati.

¹⁶Galilee dîr panga Jesu alônlai Simon leh anaipa Andrew, nga kasur 2 hei, len vâng nga antasur kha aleihmu heia kae.

¹⁷Jesu’n anhnenga ati, “Kei ajui ruh, ke’n mi surje kamanthei sik chei.”

¹⁸Khava laitak a khan anmani’n anlenhei andahlona anjui jo.

¹⁹Ama’n ajing kahladet a ase pha unai 2 hei, Zebedi sa James leh anaipa John aleihmu hei. Anmani anrakōng shunga anlen anleimantluk a kae.

²⁰Jesu’n ahmulim hei leh abek jo hei; anpa Zebedi leh anmi marōi hei kha rakōnga andahlon heia Jesu anjui jo.

²¹Jesu leh asonlehei Capernaum khōpuia kahong hei, khana anôk a Châmhngat kania Jesu’n Jehudihei intûpna innpuia leikase khana mantheina aleiphut a kae.

²²Ami manthei dân kha akathei mipuihei khan anleidet-hla, ajârchu ama kha Dân ojahei kapō kha leichang mak a kae; khahei kanek a ratha kaneitak a aleimanthei hei.

²³Khava sō lim leh intûpna innpui shunga khan rathla kaṭhamak kahlut mi inkhat hongkahlut a ka-ônga,

²⁴“Nazareth Jesu, keini heimo namanlo hnōm ung? Kankasuk inhmang sik a hin akahong che mo? Nang tu nachang kamanhret che, nang Pathena inphut a’ntheng ṭongkarôn inkhat che kae!” aleiti.

²⁵Jesu’n rathla kadikmak kha ṭong apek a, “Sip ti roh, khava mipa a inphut heisōk roh!” ati.

²⁶Rathla kaṭhamak khan mipa kha akanok manhnak a, rasa inhnaktak a ka-ônga kasōk jo.

²⁷Mipuihei khan andet-hla et a khat leh khat indertō hei, “Hivahi heijo mo? Hivahi mantheina ther ṭhahrep jo mo? Hiva mipa hin rathla kaṭhamak-hei hneng ṭongpekna ratha anei, khana anmani’n aṭong anjuia kae!” anti.

²⁸Khang’khan inrangtak a Galilee ramṭhen hmuntina Jesu chungchânga ṭong inthangsō jo.

²⁹Jesu leh asonlehei, James leh John inveina, intûpna innpui kha andahlona Simon leh Andreu inna intlunhrek a leikase hei.

³⁰Simon terpi kha hritluna kana a jekhuma leikaje, khana Jesu kha ajōng tlunglim leh amanu chungchânga anleihri pek.

³¹Ama’n amanu hneng leikasea, akut amatua, akei mathōa kae. Ahritlun khan amasō jo, khana amanu’n anmani razenna aleiphut jo.

³²Khana kani ahongtlâk joa, khōhlei ahongtluk jo pha, mihe’n akadam mak hei seng leh ṭai karôn rakip Jesu hnenga anheiṭhōi hei.

³³Khōpuia mi rakip innpuia khan ho’ntûp jo hei.

³⁴Jesu’n nat hlop-hlop a akana rakip mi katamtak amandam hei khana ṭai katamtak ahnong sōt hei. Ṭaihei khan heikhat anṭong sik kha phepek mak hei, ajârchu ama tu mo ti kha anmani’n anmanhret a kae.

³⁵Abâna jîngkâr hmatak, khōvâr hma Jesu kathōia inn kha adahlon jo. Khōpuia inphut kasōksōt a adai hngerna hmun khat a derna aleinei.

³⁶Tâk Simon leh a’nthōipui hei seng khan kasōksōt heia ama kha anleijong,

³⁷khana ama anhmusōt pha, ahnenga, “Mi rakip in nang anjong che,” anti.

³⁸Tâk Jesu’n amasôn hei, “Hiva kimvea aka-om khōheia eini akase nger sik me kae. Sohei hnenga’m ṭong kahri sik kae, ajârchu hiva sik a kei akajōng eng kae.”

³⁹Khava jâra Galilee ram rakip a kaselea an-intûpna innpui heia ṭong ahrilea ṭaihei ahnong sōt heia kae.

⁴⁰Vunnat inhnak karôn mi inkhat Jesu hneng kahong, inkuna, inthōpuina sik aleider. “Nang in namadu’n chu namantheng tor eng,” ati.

⁴¹Jesu’n alungsetna kasip a, akut azera asit, “Ke’num kamadu, intheng roh,” tia amasôn.

⁴²Khava phatak a nat khan ama kha amasō jo, khana ama intheng jo.

⁴³Jesu’n ahnenga inhnaktak a ṭong ahri pek a aleitir loi jo,

⁴⁴hinga ahnenga ahrisōa, “Rangei roh, hivahi tûte hneng hrimak roh. Tâk thempu hneng vasehrek roh khana ama’n enmanchên che rasoh; khana natak dam kha mi rakip hneng malârna sik a Moses ṭongpek dungjuia inthoina kha vatlo roh.”

⁴⁵Tâk mipa kha kasesōt a khava ṭong kha hmun rakip a ahri manthang joa kae. Takbak a, ama’n ahrile jo jâra Jesu kha khōpui inkhat a inlârtak a vase tor mak joa kae. Khava kanek a, hmun kadaineng heia kasea vaka-om jo, khana hmuntina mihei khan ahnenga kahong heia kae.