Read Komrem MARK 10 Bible Online

MARK 10 - Komrem bible

MARK 10

¹Khava sōa Jesu’n khava hmun kha adahlon jo, Judea ramting kase jo, khana Jordan tuidung arakan jo. Mipuihei ahnenga hong intûp nôk jo hei, ama’n angaia atlori kapōa anmani aleimanthei hei.

²Pharisee ṭhahrep ahnenga kahong hei khana anchâng kam a man-ôkna sik anleimantluk. Ahnenga ander, “Mi inkhat in anuhmei ada sik hi nidân in aphe mo, amanthei roh?”

³Jesu’n ṭongder leh inṭhōia amasôn hei, “Moses’n heikhong khova dân mo apek chei?”

⁴Anmani ṭong masôn chu, “Pase inkhat in inṭhenna lekha inkhat amazet a anuhmei kha a’nṭhen puina sik Moses’n ṭong aleipek.”

⁵Jesu’n anmani hneng ahri, “Nangni hi manse nan-intakrei jâra hiva dân hi Moses’n aleimazetpek chei kae.

⁶Tâk anphutbia syem manphut-lai khan chu, ṭong intheng in ahri kapōa, ‘Pathen in pase inkhat leh nuhmei inkhat asyem.

⁷Khava jâra khan pase’n anu leh apa adahlona, anuhmei leh a’nchun sik hei kae,

⁸khana 2 hei kha inkhat akachang sik hei kae.’ Khava jâra anmani kha 2 changmak jo hei, inkhat rōk kachang jo hei.

⁹Khan chu Pathen tamanchun jo hei kha mihring tûte inkhat in ṭhenmak hei rasoh.”

¹⁰Anmani innshunga an-inle pha, sonle he’n Jesu hneng khava ṭong chungchânga anleider.

¹¹Jesu’n anhnenga ahri pek hei, “Anuhmei kada a nuhmei lak ka-ompui mipa khan anuhmei kadōia akajông kae.

¹²Kha leh in-angtlinga apuise kada a pase-lak ka-ompui minu kha’m apuise kadōia akajông kae.”

¹³Mi ṭhahrep in naipanghei kha anchunga Jesu’n akut ada pekna sik hei ahnenga anheiṭhōi hei, tâk sonlehei khan mihei kha anleirasei hei.

¹⁴Jesu’n kha amanhret pha, ahnuk kana a, asonlehei hneng ati, “Naipanghei kha kahnenga heimanhong hei ruh, khâm mak hei ruh, ajârchu Pathen Rengram kha anmani kapō hei ta kae.

¹⁵Ke’n kadiktak a kahri pek chei kae tu achang inum Pathen Rengram kha hiva naipang inkhat kapōa a’nhlângmak mi kha khana khan hlut hêrmak ning.”

¹⁶Khava sōa Jesu’n naipanghei kha akakō heia, anmani inkha-khat chunga akut ada a, mahâmṭhat aleipek heia kae.

¹⁷Jesu’n ahlam hro aphut nôk pha, mi inkhat hong katlâna ahmai kunga hong-inkuna, ahnenga ader, “Akaṭha Oja, kumsôt hringna kachen theina sik ke’n heimo katlo nger sik?”

¹⁸Jesu’n ahnenga ader, “Heisa mo akaṭha nati eng? Pathen tei loa akaṭha tûte om mak.

¹⁹Nang in Ṭongpek kha namanhret: Mi that mak roh; jông mak roh; inru mak roh; dikmak a mi maher mak roh; mi hōnmak roh; nanu napa kaja roh.”

²⁰Mipa khan amasôn, “Oja, hiva ṭongpek senghei hichu kasinlaia inphut kahei jui jo hei kae.”

²¹Jesu’n ama lungset pum a a-en kanga, ahnenga ati, “Nang napui tlukmakna inkhat rōk ka-om. Se roh, nanei rakip vajōr roh, khana sara khōdeng katheihei pek hei roh, khana nang in marvâna karōi nanei sik; khava sōa hong ina kakahnung ajui roh.”

²²Mipa khan hivahi athei pha, ahmaisō kamōk jo, malung inrima kasesōt jo, ajârchu ama hi mikahaotak kae.

²³Jesu’n asonlehei a-en manve bit heia anhnenga ati, “Mikahaohei Pathen Rengram hlut sik hi heituk-hrep a a’ntak jo mo!”

²⁴Sonlehei kha khava ṭong khan anmalung atôn jo, tâk Jesu’n ahri manjōm a, “Kasa kanai hei, Pathen Rengram hlut sik hi heituk-hrep a’ntak jo mo!

²⁵Ṭimphōi kōr a sharîngsei ahlut sik kanek a mikahao inkhat Pathen Rengram hlut sik kha intakdet a kae,” ati.

²⁶Ṭong kha anthei pha sonle he’n andet-hla hêr jo khana khat leh khat indertō hei, “Khan chu tu hmen a’nhuk tor sik?” anti.

²⁷Jesu’n anmani a-enkang heia amasôn hei, “Hivahi mihring sik a chu e-tor mak, tâk Pathen sik a chu akaehla om mak; Pathen sik a chu heirakip kaethei.”

²⁸Khava sōa Peter in ahong hri, “Enroh, keini’n heirakip kandahlona nakahnung kanjuia kae.”

²⁹Jesu’n anhnenga ati, “Kadik, khana ke’n hi kahri pek chei kae, kei sik a leh ṭong kaṭha sik jâra a-inn, asōpui, anu-apa, asa-anai khana ahlei abe kadahlon mi kha,

³⁰tuna khanga hin kakhe chet a arahlâng sik. Ama’n araja kakhea inn, sōpui, sêr leh sa, nu leh pa, sha leh hleihei achen sik, khana suk manrim na’m ahmu sik; khana akahong sik khanga ama’n kumsôt hringna kha achen sik a kae.

³¹Tâk tuna hmakakei katamtak hnung ankhôr sik, khana tûna hnung kakhôr katamtak hma ankei sik.”

³²Tûn Jesu leh asonlehei Jerusalem kajōna hlamtunga kase jo hei. Jesu’n asonlehei, lung dongna akasip jo hei kha avakhe heia anhmating asonga leikase; khana akahnung kajui mihei kha kaṭi jo hei. Vōi khat nôk Jesu’n asonle 12 hei kha hmunhlop a aṭhōi hei, khana achunga ahong kasōk sik omchen aleimanthei hei.

³³“Rangei ruh, eini Jerusalem kajōna kase sik me; sova hmun a Mihring Sapa kha thempu kalenhei leh Dân ojahei kut chunga inpek sōt sik. Anmani’n thatna sik a anmaset sik, khana Jât-hlop hei kut chunga anpek sōt sik,

³⁴anmanuisō sik, anmachi thlōn sik, khana anvōk sik, khana antathat sik kae; tâk ni 3 sō leh kahringa akathōisōt sik kae.”

³⁵Khava sōa Zebedi sahei James leh John Jesu hneng kahong hei. Anmani’n anti, “Oja, keini sik natlopek sik unga kantamadu ṭhahrep ka-om jo.”

³⁶“Chuvachu heimo kae?” Jesu’n ader hei.

³⁷Anmasôna, “Narengram kalûra khan nareng in-ongna chunga na’n-ong pha, keini inkhat nachangting inkhat naveiting na’n-ong pui sik unga kanmadu,” anti.

³⁸Jesu’n anhneng ati, “Nangni’n nantader kha heimo kae manhret mak chei. Ke’n ka-in nger sik inrengna kōklei kha nanta intor sik mo? Kei tuihlut nger sik kapōa nangni akahlut tor sik chei mo?”

³⁹“Kantor sik,” tia anmasôn. Jesu’n anhnenga ati, “Nangni’n kei ta-in nger sik kōklei kha nan-in sik khana katuihlut nger sik kapōa kahlut sik chei.

⁴⁰Tâk kachangting leh kaveitinga a’n-ong sik kadeina ratha khachu ke’n neimak eng. Amantluk pek hei hnenga khava hmun kapek sik khachu Pathen kae.”

⁴¹Alak sonle 10 hei khan khava ṭong kha anthei pha, James leh John chunga khan anhnuk kana jo.

⁴²Achang jâra Jesu’n ankhenga ahnenga abek heia ahri, “Jât-hlop vaikarôn ung kati hei khan anmihei chunga ratha annei, khana hlamkakeihei khan pui katluk ratha annei.

⁴³Achang ravâng nangni kâra chu kha changmak. Nankâra inkhat in akalen achanghnōm inchu, alakseng hei sōk akachang sik kae;

⁴⁴khana nankâra inkhat in hma kakeipen achanghnōm inchu, mi rakip sōk akachang sik kae.

⁴⁵Ajârchu Mihring Sapa kha hmen razen sik a akajōng changmak; a’njen sik leh mi katamtak hei katlensōtna sik ahringkhō kapek a akajōng kae.”

⁴⁶Anmani Jerichoa kahong jo hei; khana Jesu’n asonlehei leh mipuihei leh inṭhōia anselai, Timaeus sapa Bartimaeus, hmitkacho, sâk kader kha hlampanga le’n onga kae.

⁴⁷Ama’n khavakha Nazareth Jesu kae tia athei pha, ama ka-ông inphut jo, “Jesu! David Sapa! Alungset roh!” ati.

⁴⁸Mi katamtak in anrasei, sip atina sik anmanthei. Tâk ama’n inhnakchet a a-ôna, “David Sapa, alungset roh!” ati.

⁴⁹Jesu kangira, “Heibe ruh,” ati. Khava jâra anmani’n hmitkachopa kha anheibek. “Inpâk roh! Inding roh, ama’n abek che,” antipek.

⁵⁰Ama’n apōn ahlon sōt a he’nthok a Jesu hneng kahong jo.

⁵¹“Nang sik a heimo namantlo hnōm eng?” Jesu’n ader. Hmitkachopa khan amasôn, “Oja, hmit hmu nôk sik kamadu.”

⁵²Jesu’n ahnenga, “Se jo roh, nataksen in amandam jo che,” atipek. Khavatak a khan ama’n khō ahmu thei jo khana hlam a khan Jesu kahnung ajui jo.