Read Komrem MARK 11 Bible Online

MARK 11 - Komrem bible

MARK 11

¹Anmani Jerusalem anhei sora, Bethphage leh Bethany khōpui hnenga, Olive Tlânga kahong jo hei. Jesu’n asonle 2 anhma atir hei,

²hinga mansena aleinei hei, “Nanhma khōa son se ruh, son nantlung lim bât leh shakōrtung atere tûte talachōng phungmak inkhat antakhit nanhmu sik. Khavakha heisōt una hin heikei ruh.

³Khana tu mo inkhat in, ‘Heisa mo kha nantatlo?’ ati chei inchu, ‘Rōngpu’n hmang hnōmna anei, aheithak male bât sik ti ruh,” ati hei.

⁴Khana anmani kase heia hlam a shakōrtung atere inkhat anta leikhit anvahmu. Anmani’n anvasōt lai,

⁵khava hmun a akangir ṭhahrep he’n anhnenga, “Heimo nantatlo, shakōrtung tere nantasōt mo?” anti hei.

⁶Anmani’n Jesu tamanthei hei kapōa khan anmasôn hei khana aleikangir hei khan anmanṭhōi jo hei.

⁷Anmani’n shakōrtung tere kha Jesu hneng anṭhōia, achunga khan anpōnhei anpha a, khan Jesu kachōng jo.

⁸Khana mi katamtak in hlam a anpōn anpha a, alak he’n hlei rajeia thingbō anvatuk a khana hlam a anphapek a kae.

⁹Khana ahma kase hei leh akahnung kajui mihei khan an-ôna, “Hosanna! Pathen manpâk ruh!, Rōngpu rahminga akajōng ama kha amahâm kaṭha!

¹⁰Akajōng sik nipa Reng David rengram kha Pathen in mahâmṭhat pek rasoh. Pathen manpâk ruh.

¹¹Jesu Jerusalema kasea, Bek-inn shunga kahlut a, khana ama’n heirakip a-en manve bit a kae. Tâk khōhlei ahongtluk jo jâra asonle 12 hei leh Bethany a kase jo hei.

¹²Ajîng kania, anmani Bethany a inphut anhong inle pha, Jesu avon leikaṭâm jo.

¹³Kahlatak a inphut theichangkung a’nbō hlep-hlup inkhat aleihmu, akara heikhat ka-om sik mo tia aka-en vakase. Tâk ahmun atlung pha, abō rōk avahmu jo, ajârchu theichanghei inra pha leichang mak a kae.

¹⁴Jesu’n theichangkung hneng khan ati, “Nakara tûte’n sâk nôk hêrmak jo hei rasoh!” Asonle he’n aṭong hri kha antheia kae.

¹⁵Anmani Jerusalem antlung pha, Jesu Bek-inna kasea, Bek-inna neinâk kajōr leh a’nchohei seng kha ahnong sōt jo hei. Ama’n sêr kathlenghei dokhâng leh pherva kajōrhei in-ongna hei kha amaletpek jo hei,

¹⁶khana bek-inn telaia khan neinâk karôn tûte inkhatbek leimanhlut mak hei.

¹⁷Jesu’n khava sōa mihei hneng amanthei hei, “Ṭong inthenga hivahi inzet khachu Pathen in ati, ‘Ka-inn hi jât rakip hei kamukna inn anti sik kae.’ Tâk nangni’n inruhei inthupna nanmanchang joa kae,” ati.

¹⁸Thempu kalenhei leh Dân oja he’n khavakha anthei jo, achang jâra ama thatna sik a hlam anjong manphut jo. Anmani’n ama kha anṭit, ajârchu mipuihei khan aman theina kha inlak anleisak a kae.

¹⁹Khōhlei ahong tlung jo pha, Jesu leh asonle he’n khōpui kha andahlon jo.

²⁰Abân jîngkâr hmatak, anmani hlam a anselai, theichangkung kha anhmua kae. Khavakha arajung katlunga leikachâr jo.

²¹Peer in omchen kasōk kha amandonsōt a ahnenga, “Oja, enroh, nahâksêr theichangkung so kachâr jo!” ati.

²²Jesu’n amasôn hei, “Pathen taksenna nei ruh.

²³Ke’n kadiktak a kahri pek chei kae, tu achang inum hiva hmebung hi a’nlirsōt a tui-ôngpui laia abinga a’nhlon inthlana sik ṭong apek a khana amalunga inkei-chiona neilo, tâk ahrina chunga kasōk sik tia akataksen mi kha a’ntlo pek sik kae.

²⁴Hiva jâra kamanthei chei kae: nangni’n nander pha khana hei-inkhat nanngek pha, kanhmu jo tia taksen ruh, nantader rakip kha a’npe sik chei kae.

²⁵Khana nangni’n nanngira nander pha, marvâna ka-om nanpa khan nantlo ṭhena rakip arangei mandamna sik chei, tu mo inkhat chunga malung hōimakna nantanei rakip kha rangei mandam hei ruh.”

²⁶Milak-hei nanrangei mandam mak he’nchu, marvâna ka-om nanpa khan nantlo ṭhena kha rangei mandam mak chei ning.

²⁷Anmani Jerusalema ave nôk a hong katlung hei. Khana Jesu Bek-inn shunga alônlelai, thempu kalenhei, Dân ojahei khana upahei ahnenga kahong hei,

²⁸khana ander, “Hivahei seng tlosōtna sik a heiratha mo nanei? Hiva ratha hi tu tapek che mo?”

²⁹Jesu’n amasôn hei, “Ke’n ṭong inkhat rōk der chei rong, khana nangni’n khavakha nanmasôn eng inchu, ke’n heiratha neina vânga mo hihei hi katlosōt kamanthei sik chei.

³⁰John in tui manhlutna ratha anei kha khona inphut mo, ahri pek ruh: Pathena inphut mo a-emak leh mihringa inphut mo?”

³¹Anbinga inkhe inphut jo hei: “Heimo niti sik? ‘Pathena inphut kae,’ niti’n leh kha ama’n, ‘Kha achang inchu heisa mo John kha nanta taksen mak? ati sik.

³²Khana ‘Mihringa inphut kae,’ niti’n leh kha heikhong sik.’” (Anmani’n mipuihei anleiṭit hei, ajârchu mi rakip in John kha sânkathem kae tia anlo.)

³³Achang jâra anmani ṭong masôn khachu, “Keini manhret mak ung.” Jesu’n anhnenga ati, “Kha achang inchu, ṭōnhei hi heiratha neina vânga mo katlo ti manthei mak jo chei ning.”