Read Komrem MARK 12 Bible Online

MARK 12 - Komrem bible

MARK 12

¹Khava sōa Jesu’n anmani hneng tekâk a aleihri pek hei: “Pha khat a vomhrui kung kaling mi inkhat leika-om, arahōn kimve akhâr, vomhrui ep-maherna khur acho, khana rahōn hngâkna berte asyem. Khava sōa arahōn kha akathlōhei hneng asân jo khana a-inn adahlona khōhmea kase jo.

²Akarâ lōk pha kha ahong tlung jo pha, ama’n asōk inkhat avomhrui rahōn kasânhei hneng hleisân kalo sik a aleitir.

³Rahōn kasânhei khan sōk kha ansura anvōk, heite pek loa antir male jo.

⁴Khava sōa hlei kapu khan sōk hlop inkhat atir nôk, rahōn kasânhei khan alu anleivōk-khôk pek a, inzakpui katluk a anleipek.

⁵Akapu khan sōk hlop inkhat atir nôk, anmani’n anleithat jo, khana alak katamtak he’m khang’khan anleitlo jo hei, loikhat anleivōk hei, loikhat anleithat jo hei.

⁶Tir sik a inkhat rōk aka-om khachu, asapa marittak kha kae. Achaina pena asapa kha hlei kasânhei hneng atir jo. Ama’n ati, “Kasapa hichu anmani’n anleikaja sik tia inngam eng.”

⁷Tâk khava rahōn kasânhei khan khat leh khat inbektō heia, ‘Ama hi rahōn kapupa sapa kae, hong ruh, that rih, khana akarōi hei hi nita kachang sik jo!’ anti.

⁸Khava jâra anmani’n sapa kha ansura, anthat jo, khana akalōng kha rahōn vângting anhlonsōt jo.

⁹“Kha achang inchu rahōn kapupa khan heimo atlo sik jo?” tia Jesu’n ader hei. “Ama kahong sik a kha rahōn kasânhei kha athat sik hei khana rahōn kha mihlop hneng amansân sik jo hei.

¹⁰Kadiktak a hiva ṭong intheng hi nanleitei sik jo: ‘Inn kasak he’n ṭhamak tia antahlonsōt jo hlung kha, ankâra apui karônpen kachang jo.

¹¹Hivahi Rōngpu tatlo kae; Hmit-hmua heituk a a’nlak jo mo!’”

¹²Jehudi hlamkakeihei khan Jesu sur sik a le’ntluk hei, ajârchu ama tekâk leitlo hei kha anmani kadōia ahri kae tia anmanhret. Tâk mipuihei kha anṭit hei jâra andahlona kase jo hei.

¹³Ṭongderna vânga ama surtheina sik, Pharisee ṭhahrep leh Herod mi ṭhahrep Jesu hnenga anleitir hei.

¹⁴Anmani ahnenga kahong heia ander, “Oja, nang in mihei mandonna heite khôk sakloa akadik nahri ti hi kanmanhret. Nang in tûte hmai enmak che, tâk mihei sik a Pathen lungdo kha kadik a namanthei hei. Khana Roman Rengkalen Caesar hnenga ramsêrṭhei pek sik hi nidân kadōi mo kae? Nipek sik mo? Nipek mak sik mo?”

¹⁵Tâk Jesu’n anmani inhlemsak kha amanhret a amasôn hei, “Heisa mo nanta-enmansin eng? dangka sêr inkhat kha heichoi ruh, enrong.”

¹⁶Anmani’n sêr inkhat anheichoi, ama’n ader hei, “Tu lim leh tu rahming mo a’nzet hei hi?”. “Rengkalen Caesar ta kae,” tia anmasôn.

¹⁷Jesu’n anhnenga, “Caesar ta kha Caesar pek ruh, khana Pathen ta kha Pathen pek ruh,” ati. Khana anmani’n Jesu chunga andet-hla hêr joa kae.

¹⁸Khava sōa Sadducee ṭhahrep, mihring hi thia inphut thōi nôk mak ning kati loihei, Jesu hneng kahong hei khana anti,

¹⁹“Oja, Moses’n hiva dân hi keini sik a aleimazet: ‘Mi inkhat athia sa neiloa anuhmei adahlon jo’nchu, asōpuipa khan renghmeinu kha a-ompui nger sik, ajârchu anmani 2 tamatet sahei kha akathipa sahei kae tia a’nlo theina sik a kae.

²⁰Pha khat a sōpui unai 7 leika-om hei; upapenpa khan nuhmei anei jo, khana sa neiloa kathi jo.

²¹Khava sōa 2 tluknapa khan anuhmei kha a-ompui jo, ama kha’m sa neiloa kathi nôk jo, khana 3 tluknapa kha’m khang tlit a kathi jo;

²²khana alak-hei seng kha’m khanga kati jo hei: unai 7 hei khan nuhmeinu kha an-ompui et khana sa neiloa kathipet jo hei. Khava sōa hnung kakhôrpena nuhmeinu kha’m kathi jo.

²³Tûnchu, thōi nôk ning mihei anthōisōt pha khan amanu kha tupen nuhmei mo akachang sik jo? Anmani 7 he’n ankhenga anta leiompui et kae.”

²⁴Jesu’n amasôn hei, “Heituk a nantaṭhe jo mo! Khana heijâra mo ti hi nanmanhret mo? Hivahi nangni’n ṭong intheng leh Pathen rathahrat kha nanmanhret mak jâra kae.

²⁵Ajârchu akathihei khan anthōisōt pha, anmani marvâna ngevahei ka-ang sik jo hei, lu hôngmak jo hei ning.

²⁶Tûnchu, akathi akathōisōt hei sik a: nangni’n Moses lekharabu thing bur hmeikâng ṭong inzet kha teiphung mak chei mo? Khava khan hinga inzet ti chu Pathen in Moses hneng, ‘Kei Abraham Pathen, Isaac Pathen, khana Jacob Pathen eng kae,’ ati.

²⁷Ama akahring hei Pathen kae, akathihei Pathen changmak. Nangni pui katluk a nanṭhe jo.”

²⁸Anmani inkhena kha akathei dân oja inkhat khana khan leika-om. Jesu’n Sadduceehei kaṭhatak a amasôn hei kha ama’n aleihmu, khava jâra ahnenga kahonga ṭong inkhat ader, “Ṭongpek kâra khō kha mo akakhôk pen?”

²⁹Jesu’n amasôn, “Akakhôk pen khachu hi kae: ‘Israel rangei roh! Rōngpu ni-Pathen hi Rōngpu inkhat rōk kha kae.

³⁰Rōngpu ni-Pathen kha namalung, narathla, namandonna, khana naratha hratna akhenga vâng lungset roh.’

³¹Khana 2 tlukna akakhôk pen ṭongpek khachu hi kae: ‘Nang nabinga na’nlungset kapōa nakhō naven lungset roh.’ Hiva 2 hei kanek a ṭongpek kalen ralak om mak.”

³²Dân oja khan Jesu hneng ati, “Kaṭhadek a nahri jo, Oja! Nang in nahri kapōa, akadik kae, ti chu Rōngpu rōk kha Pathen kae khana ama teilo Pathen alak om mak.

³³Khana namalung, namandonna, khana naratha hratna akhenga Pathen nalungset sik, khana nabinga a’nlungset che kapōa nakhō naven nalungset sik kae tina hin ranhring inthoina leh ro mankhutna kanek a akarôn pen kae.”

³⁴Kasing tak a amasôna kha Jesu’n ahmu, khana ahnenga ahri pek, “Nang Pathen Rengram a inphut inhlamak jo che.” Khava sōa chu tûte’n Jesu hneng ṭong der ngammak jo hei.

³⁵Jesu’n Bek-inn shunga amanthei lai hei, ṭong ader hei, “Dân oja he’n, huksōtpa Messiah kha David sōn akae sik tia heikhong mo antati tor?

³⁶David kha Rathla Intheng in amathok a amanhri: “Rōngpu khan ka-Rōngpu hneng ati: Na’ndōipui hei nakethōia kadamak kârseng, Kachangting hin in-ong roh.”

³⁷David khet in ama kha ‘Rōngpu’ ati; kha achang inchu heikhong mo huksōtpa Messiah kha David sōn akachang thei sik?” Mipui katamtak in Jesu ṭonghri kha kahōia anleirangei.

³⁸Khanga amanthei lai hei anhnenga ati, “Dân oja heia inphut insing thei ruh, zakkō inse sipuma akalôn hnōm hei, khana jōrna tetlânga kajana chibei antatlo sik a indu hei,

³⁹khana intûpna inna leh revei hmun a in-ongna kalûrpen indei hei.

⁴⁰Anmani’n renghmeinu heia inphut hnemna anjong khana innshung neinâk-hei anchom pek hei, mi tahmu sik a kasôt tatak a derna anneia kae. Anmani karâkna kha heirakip a akakhôkdet kachang sik!”

⁴¹Jesu kha Bek-inna sêr manbukna hmatak a a’n-onglai, mihei sêrtōk mathlâk kha alei-enlea kae. Mikahao katamtak he’n sêr hingjaja anmathlâk a kae;

⁴²khava sōa sara renghmei inkhat kahonga, khana sum-êng makhai 2, cheng khat leh in-ang, avamathlâk.

⁴³Jesu’n asonle abek mantûp heia khana anhnenga ahri, “Ke’n kahri pek chei kae, hiva sara renghmeinu hin milak-hei kanek a sêrtōkna thingbôm shunga akatampen amathlâk.

⁴⁴Ajârchu alak-hei seng in anneia inphut antaṭhensōt a antatōk kae, tâk amanu hin asara changa aneiseng, ahringna sik a amanbuk rakip kha apek kae.”