Read Komrem MARK 13 Bible Online

MARK 13 - Komrem bible

MARK 13

¹Jesu’n Bek-inn aheidahlon jo pha, asonle inkhat in ahnenga ati, “Enroh, Oja! Hlunghei leh innhei hi heituk a a’nlak jo hei mo!”

²Jesu’n amasôn, “Innpui kalen insak hei hi nahmu mo? Hlunghei hi inkhatbek um an-omna et a indahlon mak hei ning; hihei hi inkhat et hlon mathlâk sik hei kae.”

³Bek-inn rekhat ting Jesu kha Olive Tlâng chunga le’n ong, khava pha Peter, James, John khana Andrew hei ahlop binga kahong hei.

⁴“Hivahi heitik leh mo akasōk sik amanthei roh, khana hiseng hongsōkna sik pha kha hong katlung jo ti manhmuna sik heimo ahong kasōk sik amanthei roh,” anvati.

⁵Jesu’n anhnenga ati, “Insing thei ruh, tûte’n anhōn mathlâk makna sik chei tlo ruh.

⁶Mi katamtak he’n kei sik a ṭongkahri ung kae antia kahong sik hei khana, ‘Kei ama eng kae!’ anti sik, khana mi katamtak anhōn mathlâk sik hei.

⁷Re intuk rasa kahnaitek a leh kahlatak a nanthei pha ṭimak ruh. Khavakha ahong kasōk nger sik kae, tâk khahei khan a’nchaina lachang mak.

⁸Ramhei inkhat leh inkhat indōi sik hei, khana rengram inkhat leh inkhat inbuhlu sik hei. Hmun rakip a lingnu innok sik, sâk katâng sik hei. Khahei kha naiha kaphu nat inphutna kapōhrep hei kae.

⁹“Nangni nanbinga a’nsingthei nger sik chei kae. Nangni ansur sik chei khana ṭong tanna hmun a ankeisō sik chei. Khana intûpna innpui heia anvōk sik chei, kei sik a ṭong kaṭha nanva hripekna heia vaikarônhei leh renghei hmaikunga kangir sik chei.

¹⁰Tâk a’nchaina kha ajōng tlung mak hma ṭong kaṭha hi mi rakip hneng a’nhri nger sik kae.

¹¹Khana nangni ansur cheia khana ṭongtan hmun a anṭhōi chei pha, heimo hri sik tia ahma inkeia nanmalung mandong mak ruh; apha kha ahong tlung shunga ṭong a’npe chei kha hri ruh. Ajârchu nangni tahri sik ṭong kha nangnia changmak, Rathla Inthenga inphut ajōng kasōk sik kae.

¹²Mihe’n ansōpui khet hei kha that sik a anpek sōt sik hei, khana pa he’n ansahei kha khanga antlo sik hei. Sahe’n annu anpa an-inrepui sik hei khana anthat sik hei.

¹³Kei jâra mi rakip in nangni anhōt sik chei. Tâk atorna katlunga akadehrat kha huksōt akachang sik a kae.”

¹⁴“‘Ṭit-inpir ka-om tak’ kha, a-om makna sik hmun a ahong ngir sōt kha nanhmu sik.” (Akatei hnenga ṭongmanthei: hiva tina hi manhret nger roh!). Khava pha Judea ram a ka-om hei kha tlâng ting akatlânsōt nger sik hei kae.

¹⁵A-inn phuchunga ka-om mi tu inkhat khan innshunga aneinâk kalo sik a pha manhmang mak rasoh.

¹⁶Khan chu hleia ka-om mi khan apōn kalo sik a a-inna ahe’nle mak sik kae.

¹⁷Khava kani heia khan nai kavonhei leh naidông netui kavei hei sik a heituk ṭitpek aka-om sik mo!

¹⁸Hihei hi phebi lai achang makna sik Pathen hneng der ruh!

¹⁹Ajârchu khava kani heia inrimna hei kha, Pathen in vânhnōi asyem manphut bia inphut tûn katlunga mihringhei tamanhret inrimna hei seng kanek a akakhôk chet sik kae.

²⁰Tâk Rōngpu’n khava kanihei kha amantôi hei; amantôimak inchu, tûte hringmak hei ning. Hei-achang inum ami kadeisōt hei sik jâra kanihei kha amantôi jo kae.

²¹“Khava pha tu mo inkhat in, ‘Enruh, Messiah kha hin ka-om!’ a-emak leh, ‘Enruh, son ama ka-om,’ antia achang inum taksen mak ruh.

²²Ajârchu Messiah kadikmak leh sânkathem kadikmak hong kasōk sik hei. Ṭōn-inlak leh det-hlana antlo sik, a-ethei inchu kadeisōt mihei kapha hōn mathlâkna sik antlo sik.

²³Insing theitak a om ruh! Apha kha ahong tlung mak hma heirakip kamanthei chei kae.

²⁴“Khōdeng theina a’nchaisō pha kani hong inthim sik, thla vârmak jo ning,

²⁵ârsihei marvâna inphut katla sik hei, khana bōirōk a ratha hratna hei kha anhlam hroa inphut hnongsōt kachang sik hei.

²⁶Khava sōa Mihring Sapa kha jōng inlâr sik, alûrna aratha hratna leh inṭhōia sumtuk chunga kajōng sik.

²⁷Ralei hmor chaina inphut Pathen in kadeisōt mihei kachom intûp sik a ngevahei rakir manlia ajōngtir sik hei.

²⁸“Theichangkung in inchuna kha mannei chei rasoh. Theichangbâk hei ajîk ahong in-êma adôn ahongchera khana abōther ahongsôn jo’nchu, khōlum pha kahnai jo ti nanmanhret.

²⁹Kha leh in-angtlinga hiva omchenhei hi anhongsōk nanhmu jo’nchu, pha kahnai jo, ama jōngna sik a intluk jo ti hi manhret ruh.

³⁰Tûna akahring mihei hi anthisō pet mak hma omchen rakip hei hi akasōk sik hei kae ti hi mandonsōt ruh.

³¹Marvân leh ralei chu inhmang sik, tâk kei ṭong chu inhmang hêrmak ning.

³²“Achang ravâng akahong sik kani leh pha kha tûte’n manhret mak hei, marvân ngevahei leh Sapa’num manhret mak hei; Pa rōk in amanhret kae.

³³Kasingthei tak a inrin ṭhak ruh, ajârchu apha kha heitik ajōng tlung sik manhret mak chei.

³⁴Hivahi mi inkhat in asōk-hei anṭōn tlo et sik asempek heia, akot kahngâkpa hneng a-en rave ṭhakna sik ṭong apeksō leh a-inna inphut khōhmea akasesōt a asōk-hei ṭōn amanngan hei kapō kha kae.

³⁵Khava jâra inrin ṭhak ruh, ajârchu inn kapupa kha heitik akajōng sik manhret mak chei, khōhlei a-emak leh ṭhangṭim a-emak leh jîngkâr a-emak leh kani sōk a kachang thei.

³⁶Manhret manloa ama ajōng tlung jo’nchu, nalei kaje kha hmuhêr mak che rasoh.

³⁷Khana nanhnenga kahri hi mi rakip hnenga kahri jo kae: Inrin ruh!”