Read Komrem MARK 15 Bible Online

MARK 15 - Komrem bible

MARK 15

¹Jîngkâr hmatak thempu kalen he’n upahei, Dân ojahei leh Sehmang-Pachonghei ankhenga inrangtak a an-inhmupui hei, khana ṭōn mantlukna annei jo. Anmani’n Jesu thirhruia ankhit a, ankeisōt jo khana Pilate kut chunga anvapek jo.

²Pilate in ṭong ader, “Nang Jehudihei Reng che mo?” Khana Jesu’n amasôn, “Nang in nahrisōt jo.”

³Thempu Kalen he’n Jesu kha ajâr katamtak a themmô anpek a anmaher jo.

⁴khava jâra Pilate in avea ader nôk, “Nang in masôn mak tin che mo? Nachunga themmôna anpekna rakip so rangei roh!”

⁵Khava tlit kha’num Jesu’n ṭong inkhatbek leihri mak khava jâra Pilate in adet-hla jo.

⁶Rakan revei pha rakip a kurkhum a a’nkhum inkhat amasō pek roh tia mipui in ander pha, Pilate in aleimasō pek ri heia kae.

⁷Khava lai khan kurkhum a Barabbas inti mi inkhat, vaikarôn kadōia rerûk a mikathat-hei leh leika-omsap hei.

⁸Mipuihei khan Pilate hneng anhong intûp pha angaia alumlona hei kha anleidera kae;

⁹Pilate in amasôn hei, “Jehudihei Rengpa kha kamasōpek sik cheia nanta madu mo?”

¹⁰Thempu Kalen he’n Jesu chunga thangset annei jâra akut chunga anta heipek sōt kae ti kha Pilate in kaṭhadek a amanhret.

¹¹Tâk thempu kalenhei khan mipuihei kha anmathok heia, Barabbas jôk kha amasō sik a anmander hei.

¹²Pilate in anhnenga ahri nôk, “Khan chu Jehudihei Rengpa ama hi heihmen kamanlo sik?”

¹³Anmani’n ka-ông male heia, “Thingrakea makhei roh,” anti.

¹⁴Pilate in anhnenga ader hei, “Heijâra mo, heiṭōnse mo atlo jo?” Tâk anmani kakhe chet a ka-ông heia “Thingrakea makhei roh,” antia kae.

¹⁵Pilate in mipui malung mantlai sik amadu jâra Barabbas amasō pek jo heia Jesu kha amanjem heia thingrakea makhei hlon sik a apek jo hei.

¹⁶Sepei he’n Jesu kha Ram vaikarônpa innpui telai shunga ankeimanhlut jo khana anloihei seng kha anbek mantûp jo hei.

¹⁷Anmani’n pōn sendup inkhat Jesu anmansi jo, rahlinga inphut a’nsyem lukhu alu chunga anmankhu jo.

¹⁸Khava sōa kamuk anphut a, “Jehudihei Rengpa, ahringsei sôt rasoh!” anti.

¹⁹Anmani’n tîngpum vâng alu anvōk, anmachi thlōn, khana anmarkhup anthlep a inkun heia ankamuk a kae.

²⁰Manuisōna kha a’nchaisōa, pōn sendup kha anhlikpek a, ama pōn kha anmansi male jo. Khava sōa thingrakea makhei hlon sik a ankeisōn joa kae.

²¹Hlamdunga anmani’n mi inkhat arahming Simon inti mi inkhat aram a inphut khōpuia akahong anleiratōa, sepei he’n ama kha Jesu thingrake kha rumhrat a anleimandom. (Simon kha Cyrenea mi kae khana Alexander leh Rufus hei pa kae.)

²²Anmani’n Jesu kha Golgotha, hiva tina chu “Lurōk hmun” intia khan anṭhōi jo.

²³Khana khan ju leh myrrh inti hlei antamanhei kha man-inna sik a anleitlo, tâk Jesu’n lei-in mak a kae.

²⁴Khava sōa Jesu kha thingrakea anhem mankop a apōn har kha tu tachen sik mo tia vâng-enna anneia insem jo hei.

²⁵Thingrakea antahem mankop kha jîngkâr pungkōa kae.

²⁶Achunga maherna ṭong malârna kha, “Jehudihei Rengpa,” tia anleimazet.

²⁷Ama leh inṭhōia inru 2, inkhat achangting, inkhat aveiting thingrakea anmakheisa heia kae.

²⁸(“Ama mikaset-hei leh mahâmset achen puisap hei,” tia Ṭong intheng tahri kha hing’hin hui akatlung kae.)

²⁹Khava hnenga kalônle he’n Jesu anteitôma, anlu ankachuk a anti, “Aha! Bek-inn naṭhōt a ni 3 shunga nasak sik kae!

³⁰Tûn thingrakea inphut jōng ṭum jo roh, nabinga inhuk jo roh.”

³¹Khava kapōa thempu kalenhei leh Dân oja he’n Jesu anmanuisōa, inkhat leh inkhat inbe heia, “Ama’n milak chu ahuksōt a, abinga chu inhuksōt tor mak!

³²Israel Rengpa, Messiah kha tûn thingrakea inphut ajōng ṭum sik kha enrih, kha achang inchu nitaksen sik,” anti. Khana thingrakea ama leh antamakhei sap hei kha’num anteitôma kae.

³³Sûnṭimtak a inphut ram pumpui khō inthim in amakhusi jo, khavakha pung 3 katlung khanga leikati jo.

³⁴Pung 3 a Jesu kare inhnaktak a ka-ônga, “Eloi, Eloi lema sabachthani?” ati, khavakha, “Ka-Pathen, ka-Pathen, heisa mo nadahlon eng?” tina kae.

³⁵Khana aka-om mi ṭhahrep he’n antheia anti, “Enruh, ama’n Elijah abek a kae!”

³⁶Ankâra inkhat in pōnhlom kha vomhrui ju kathûra amachea khōnghre inkhat hmor vâng akathia, khan vâng Jesu hner katlunga akadompek a, “Hngâk rih! Elijah akajōnga ama akadom mathlâk sik mo, enrih!” ati.

³⁷Khana rasa inhnaktak a ka-ônga Jesu kha kathi jo.

³⁸Bek-inna pinden kha achunga inphut thōi katlunga her hnia inhler joa kae.

³⁹Khava hmun a thingrake hma a kangir sepei hlamkakei inkhat in Jesu thidân kha aleihmu. Ama’n, “Kadiktak a hiva mipa hi Pathen Sapa kae!” ati.

⁴⁰Akahlajap a inphut aleika-en nuhmei ṭhahrep leika-om hei. Ankâra khan Mary Magdalene, naipangpa James leh Joseph hei nu Mary, khana Salome hei kae.

⁴¹Anmani’n Jesu kha Galileea a-omlai anleijui khana anle’nthōpuia kae. Khava hmun a khan Jerusalema ama leh ahe’nṭhōi nuhmei katamtak um leika-omsa heia kae.

⁴²Arimathea khōa Joseph ajōng tlung kha khōhlei ting jo kae. Ama kha Pathen Rengram ajōng tlung sik aleikahngâk, kaja ka-om Sehmang-pachonghei kâra inkhat kae. Khava kani kha Inrin ning kae (ti chu, Châmhngat kani mak hma) khana Joseph khan kangamtak a Pilate hmaikunga vakasea ahnenga Jesu kalōng kha aleider.

⁴³

⁴⁴Pilate in Jesu kathi jo ti athei pha adet-hla hêr jo. Sepei hlamkakeipa kha abek a Jesu thina kha akasôt jo mo tia ader.

⁴⁵Sepei hlamkakeipa ṭong atheisōa Pilate in Joseph hneng Jesu kalōng kha alothei sik atipek.

⁴⁶Joseph in hruipōn innem neng arachôk a, akalōng kha akadom mathlâk a, pōn vâng khan akatōma hlung inkhōr thlân shunga anvahre jo. Khana thlânkot kha hlung kalen inkhat anmakhōna ankhârsi jo.

⁴⁷Khana Mary Magdalene leh Joseph nu Mary in anleihngâk a Jesu kalōng kha khon mo antada anlei ena anleihmua kae.