Read Komrem MARK 2 Bible Online

MARK 2 - Komrem bible

MARK 2

¹Kani ṭhahrep sōa Jesu Capernaum khōa inle nôk, ama inna ka-om ti ṭong inthang joa kae.

²Mi katamtak ho’ntûp heia, kot khârkung kapha hmun leirōk mak jo. Jesu’n anhnenga ṭong kha aleihri pek hei

³khava pha pase 4 hong katlung hei, lang kangōi inkhat Jesu hneng anhei kadom.

⁴Mipui ansiprei jâra, mipa kha ahneng heimanthlung tor mak jo hei. Khava jâra anmani’n Jesu omna radona phuchung kha anṭhōt jo. Lang kangōipa kha a jena kapher vâng ahmai kunga anmakhei mathlâk jo.

⁵Jesu’n anmani khangtuk taksenna antanei kha ahmua Jesu’n lang kangōipa hneng, “Sapa, nasetnahei inngei indam jo che,” ati.

⁶Khava hmun a ale’n ong Dân oja ṭhahrep hei khan anbinga anleimandon,

⁷“Heikhong inmo ama’n hinga akaṭong tor? Hichu Pathen hmumasina kae! Setna inngei indam torchu Pathen rōk kae!”

⁸Khavatak a, Jesu’n anmalung mandon kha amanhret a, anhnenga, “Khang’khan heisa mo nantamandon?

⁹Hiva lang kangōipa hnenga, ‘Nasetnahei inngei indam jo che,’ ti hi leh, ‘Thōi roh, nakapher inlo roh, se jo roh,’ ti hi khomo akabei jôk?

¹⁰Khan chu Mihring Sapa khan raleichunga setnahei rangei mandamna ratha anei ti hi nanhnenga kamanhmu sik jo chei,” ati. Khana lang kangōipa hnenga,

¹¹“Ke’n nahnenga kahri kae, thōi roh, najena kapher inlo roh, khana na-inna se jo roh!” ati.

¹²Khanga ankhenga anlei enlai, mipa kha kathōia, akapher akadoma, inrangtak a kase jo. Anmani ankhenga andet-hla hêr jo khana Pathen anchoi ka-ânna anti, “Eini’n hinghiva kapō hi lahmu phung hêrmak me!”

¹³Jesu’n Galilee dîr pangting le’nle nôk jo. Mipui ahnenga kahong hei, khana ṭong mantheina aleiphut a kae.

¹⁴Ama khanga alônna, Alphaeus sapa Levi ramsêr ṭheina inna a’n-ong aleihmu. Jesu’n ahnenga, “Ajui roh,” ati. Levi kha kathōisōt a akahnung ajui jo.

¹⁵Hnunga chu Jesu kha Levi inna bu aleisâk a kae. Ramsêr kaṭhei katamtak hei leh mikase katamtak he’n Jesu kha anleijui khana anmani katamtak in ama leh asonlehei kha dokhânga bu anleisâkpui hei.

¹⁶Pharisee Dân oja ṭhahrep he’n, Jesu’n ramsêr kaṭhei leh mikasehei asâkpuisap hei kha anhmua, asonlehei hneng, “Heisa mo khang khava mihei asâkpuisap hei?” tia ander.

¹⁷Jesu’n atheia amasôn hei, “Akadam hei sik a thempu rangei mak, tâk akanahei sik a arangei kae. Kei mi kalûrhei kabea akajōng eng changmak, tâk mikasehei kabea akajōng eng kae,” ati.

¹⁸Rōi inkhat a John kahnung kajuihei leh Pharisee he’n bu anleihngōia kae. Mi ṭhahrep Jesu hneng kahong heia ander, “John sonlehei leh Pharisee sonle he’n bu anhngōi ri, tâk nang sonle he’nchu heisa mo antahngōi mak?”

¹⁹Jesu’n amasôn hei, “Hmōiṭhōina akahong hmelâk-hei kha sâk loa ankase sik nanmanhōi mo? Changthei mak ning! Hmōipa khan a-ompui hei lai seng khavakha tlomak hei ning.

²⁰Tâk hmōipa kha anmania inphut ṭhōisōtna kani kha lakahong sik, khava sō leh antahngōi sik kae.

²¹“Tûte’num pōnther ahar kha zakkō kalen marōa rabekkop phungmak; ajârchu pōnther har khan pōn marō kha akeihler sik a kha, akalendet akave aman om sik.

²²Khan nôk chu tûte inkhat in shavunpeng marōa juther daphung mak, ajârchu ju khan shavunpeng kha atumkhōi sik, khan chu ju leh shavunpeng kha inhmang sik jo hei. Khava kanek a, juther kha shavunpeng ther a da sik kae.”

²³Jesu’n Châmhngat kani ning gehu hlei laia ṭhahrep aleihroa kae. Khanga asonlehei leh anselai savui majui anphut jo.

²⁴Khava jâra Pharisee he’n Jesu hneng, “Enroh, Châmhngat kani ning nasonlehei tatlo hichu nidân kadōihei kae,” anti.

²⁵Jesu’n amasôn hei, “David in sâk sik heikhat amadu pha aleitlo kha nangni’n teiphung mak chei mo? David leh amihei anvon leikaṭâm jo,

²⁶khava jâra ama’n Pathen bek-inna kahlut a Pathen hnenga a’ntōksōt buhlom kha aleisâk. Hivahi Abiathar khan Thempu Kalen aleichanglaia akasōk omchen kae. Nidân dungjuia hiva buhlom hi thempu rōk in asâk thei kae, tâk David in aleisâk jo khana a’nṭhōipui he’m aleipek hei.”

²⁷Jesu’n achaina ahri, “Châmhngat kani kha mihringhei ṭhattheina sik a ansyem kae, mihring hi Châmhngat kani sik a ansyem changmak.

²⁸Khava jâra Mihring Sapa kha Châmhngat kani kapha sik um Rōngpu kae.”