Read Komrem MARK 3 Bible Online

MARK 3 - Komrem bible

MARK 3

¹Khava sōa Jesu intûpna innpuia inle nôk, khana khan kut kangōi mi inkhat leika-oma kae.

²Jesu khan akadik mak atlo tia a’nherhnōm mi ṭhahrep khana khan leika-om hei; khava jâra Châmhngat kani ning mipa kha amandam sik mo tia anlei en mathlip a kae.

³Jesu’n mipa hneng khan, “Hiva hmatinga hin heihong roh,” ati.

⁴Khava sōa Jesu’n mihei hneng ader hei, “Heimo Châmhngat kani ning eini tatlo sik a nidân in ahnōm pek me? Mi inthōpuina achangmak leh mi inhmangna mo? Mi inkhat hringkhō hukmanhring achangmak leh suk manhmang mo?” Tâk anmani’n heite masôn mak hei.

⁵Jesu’n a-en manve bit heia ahnuk leikana, tâk anmani sik a lungkhamna aleinei, ajârchu anmani anmalung kasak khana dikmak hei. Khava sōa mipa hnenga, “Nakut manzit roh,” ati. Ama’n amanzit a akut kha kadam jo.

⁶Khava jâra Phariseehei kha intûpna innpui kha andahlon jo, inrangtak a Herod mi ṭhahrep leh inhmutō jo hei, khana anmani’n Jesu thatna sik a ṭōn anmantluk jo.

⁷Jesu leh asonlehei Galilee Dîr langting leikasesōt hei, mi katamtak in anleijui. Anmani Galileea, Judea,

⁸Jerusalema, Indumea ramṭhen leh Jordan nisōtinga ramṭhen a, khana Tyre leh Sidon khōpui ramṭhen vena inphut hei kae. Hiva mi rakip hei hi Jesu hneng kahong hei ajârchu aṭōn tlohei kha anleitheia kae.

⁹Mipui kha katam hêr hei, mipui khan anhnenga ankacheptō makna sik, rakōng inkhat anmantluk pekna sik, asonlehei kha aleihri pek hei.

¹⁰Ama’n mi katamtak aleimandam hei khana mikana rakip hei khan ama antôn theina sik ahnengting hong inhnengtō heia kae.

¹¹Khana rathla kaṭhamak karônhei khan ama anhmu kataia, ahmai kunga katlu heia ka-ông heia, “Nang Pathen Sapa che kae!” anti.

¹²Ama tu mo kae ti hi tûte inkhat hneng anhrimakna sik rathla kaṭhamak-hei hneng ṭong rahnaktak a aleipek hei.

¹³Khava sōa Jesu’n tlâng chunga kakea ami madu hei seng ahnenga abek hei. Anmani ahnenga kahong hei,

¹⁴khana ama’n sonle tia aphō mi 12 akadei hei. “Kei leh aka-omsap sik a kakadeisōt jo chei kae,” tia ahri pek hei. “Ke’n nangni ṭong kahrile sik a katirsōt sik chei,

¹⁵khana rathla kaṭhamak hnongsōtna ratha kha nannei sik,” ati.

¹⁶Akadeisōt 12 kha hihei hi kae: Simon (Jesu’n Peter tia aleiphō);

¹⁷Zebedi sahei, James leh anaipa John (Jesu’n ‘Boanerge,’ tia aphō hei ti chu “Khō inphe Mihei” tina kae);

¹⁸Andreu, Philip, Bartholomew, Matthew, Thomas, khana Alphaeus sapa James, Thaddaeas, Aram inlungsetpa Simon,

¹⁹khana mikut chunga akapek sōtpa Judas Iscariot hei seng hi kae.

²⁰Khava sōa Jesu inna kase jo. Avea khanga mipui katamtak hong intûp nôk heia Jesu leh asonlehei kha bu sâkna sik pha leihmu mak hei.

²¹A-innkō he’n aṭong hi anthei pha, ama inkôk sik a leikasōksōt hei, ajârchu mipui he’n “Ama invet jo,” anleitia kae.

²²Jerusalema inphut Dân oja ṭhahrep akahong he’n, “Ashunga Beelzebul aka-om kae! Anmani hnongsōtna sik ahnenga ratha akapek kha ṭaihei rengpa kae,” anti.

²³Khava jâra Jesu’n mihei kha ahnenga abek heia, anhnenga ṭong tekâk a ahri, “Seitan in heikhong mo Seitan ahnong sōt tor sik?

²⁴Rengram inkhat kha abinga arup-rup a a’nsemṭhena khat leh khat an-indōitō jo’nchu, khava rengram kha kakōisō sik.

²⁵Innshung inkhat kha abinga arup-rup a a’nsemṭhena khat leh khat an-indōitō jo’nchu, khava innshung kha kakōisō sik.

²⁶Khang’khan Seitan rengram kha arup-rup a a’nsemṭhen jo’nchu akasôt om tor mak ning, tâk kakōi sik jo khana a’nchaina kha kachang sik jo.

²⁷“Mikahrat inkhat kha hma inkeia ankhit dekmak inchu, tûte’n a-innshunga hlut tor mak, khana aneinâk losōt tor mak ning; akhitsō leh rōk a-inn kha asukmanram tor kae.

²⁸“Kahri manchên pek chei kae mihringhei setna rakip leh akaṭhamak antahri rakip chu rangei mandam thei kae.

²⁹Tâk tu achang inum Rathla Intheng dōina kahri inset mi kha rangei mandam chenmak ning, ajârchu ama’n kumleikōa setna inkhat atlo jo kae,” ati.

³⁰(Mi ṭhahrep in, “Ama shunga rathla kaṭhamak ka-om,” anti jâra Jesu’n hi ahri kae.)

³¹Khava sōa Jesu anu leh asōpuihei hong katlung jo hei. Anmani khava inn vângting leikangir hei khana ama inhmupui sik a ṭong anleipek.

³²Jesu kimvea mipui le’n ong hei khana anmani’n ahnenga, “Enroh, nanu leh nanaipa hei, nanainu hei vânga ka-om hei, nang anjong che,” anti.

³³Jesu’n amasôn heia, “Tu mo kanu? Tuhei mo kanaipahei?” ati.

³⁴Ama’n akimvea a’n-ong hei kha a-en manve bit heia, “Enruh! Kanu leh kanaipahei kha hin ka-om hei!

³⁵Tu achang inum Pathen lungdo katlo kha kanaipahei, kanainuhei khana kanu kae,” ati.