Read Komrem MARK 4 Bible Online

MARK 4 - Komrem bible

MARK 4

¹Jesu’n Galilee dîr panga mantheina aleiphut nôk jo. Ahnenga mipui ahon’tûp hei kha antamrei jo jâra rakōng shunga kahlut a in-ong jo. Rakōng kha tui chunga annam sôn jo khana mipuihei khan dîrpang tuikhama leikangir hei.

²ṭong katamtak aman theina heia khan tekâk hei aleihmanga anhnenga ahri:

³“Rangei ruh! Pha khat a mi inkhat hmuchi kavor sik a leikasōk a kae.

⁴Ama’n hmuchi kha khanga aleivora, ṭhahrep chu hlamdunga katla, khana vahei kajōng heia anleisâk jo.

⁵Ṭhahrep chu hlung chunga ralei inpana katla. Ralei kha a’npâ jâra hmuchi kha inrangtak a kakeksōt jo.

⁶Khava sōa, kani ahong inshâng pha, sakung kadông kha asat manvōi jo; arajung kha inthûk a aṭhōmak jâra sakung kadông kha inranga kachâr jo.

⁷Hmuchi ṭhahrep chu rahlingbuk kâra katla, rahling kha ahong khang pha sakung dông kha akabuksi jo, khahei kha heite inramak jo hei.

⁸Tâk hmuchi ṭhahrep chu ralei ṭhatna hmun a katla, hmuchihei kha kakeksōt hei, kakhangsōt hei khana inra hei: ṭhahrep in arahme 30, ṭhahrep in 60 khana ṭhahrep in 100 inra hei.”

⁹Khana Jesu’n achaina ahri, “Kōr nannei inchu rangei ruh!”

¹⁰Jesu kha abinga aleiom pha, aṭong leikathei loi ṭhahrep leh asonle 12 hei ahnenga kahong hei, khana ṭong tekâk kha ahri manchên pekna sik heia anleidera kae.

¹¹Jesu’n amasôn hei, “Pathen Rengram in-ip kha nangni inpek jo chei. Tâk vânga aka-om milak he’nchu heirakip hi ṭong tekâk vâng antathei sik kae,

¹²hinga achangna sik a kae, khachu: “Anmani’n enchu an-en sik, tâk hmumak hei ning; anmani’n rangei chu anrangei sik, tâk manhret mak hei ning. Ajârchu anmani’n khanga anleitlo’nchu, anmani Pathen hneng he’nle sik jo hei, khana ama’n aleirangei mandam sik jo hei.’”

¹³Khava sōa Jesu’n ader hei, “Hiva tekâk hi manhret mak chei mo? Chu achang inchu, heikhong mo tekâk heikhat nantamanhret tor sik?

¹⁴Hmuchi kavorpa’n Pathen ṭong kha avor kae.

¹⁵Mi ṭhahrep chu hlamdunga anvor hmuchi kapō hei kae; ṭong kha antheilim bât leh, Seitan kha kahonga ṭong invor kha alosōt bât jo.

¹⁶Milak-hei khan hlung kâra a’nvor hmuchi kapō hei kae. Ṭongrôn kha antheilim bât leh inpâktak a anrahlâng.

¹⁷Tâk khava khan anlungri shunga hlutmak, khana akasôt om mak. Khava ṭong jâra suk manrimna a-emak leh khōdeng theina ahong om pha, inrangtak a anmasō jo.

¹⁸Milak-hei khan rahling kâr heia a’nvor hmuchi kapō hei kae. Hiva mihei hi ṭong katheihei kha kae,

¹⁹tâk hiva hringkhō sik a malung dongna, nei leh hao maduna, khana aralak madu rangeina katamtak hongkahlut a ṭong kha ankabuk sia kara neimak jo hei.

²⁰Tâk milak-hei khan ralei ṭhatna a’nvor hmuchi kapō hei kae. Anmani’n ṭong kha anthei, anrahlâng, khana kara annei: ṭhahrep in aja 30, 60, khana 100 inra heia kae.”

²¹Jesu’n ahri manjōm, “Tu inkhat in thaihmei inkhat ahei choi manhlut pha hrai thōia a-emak leh jekhum thōia ada phung mo? Amatungna chunga damak a mo?

²²A’nthup rakip inlârtak a keisō sik kae, khana makhu sia aleika-om rakip mahlâng sik kae.

²³Nangni’n kōr nannei inchu, rangei ruh!” ati.

²⁴Ama’n anhnenga ahrisa nôk, “Nanṭongthei chunga nanmalung pek ruh! Milak-hei chunga nantahmang ṭong tanna dânhei mama kha Pathen in nanchunga ajōng hmang sik, tâk a’nhnakdet sik kae.

²⁵Ajing akaneihei kha inpeksa sik hei; khana akanei hêrmak hei kha antanei kha’m kha losōtpek sik hei kae.”

²⁶Jesu’n khanga ahrisa nôk, “Pathen Rengram kha hiva kapō kae. Mi inkhat in ahleia hmuchi avor.

²⁷Ama jân a kaje, sûn leh kathōi, khana khava pha shung seng heia khan hmuchihei kha kakeksōt hei khana kakhang hei; kha’num heikhonga mo khanga akachang kha ama’n manhret mak.

²⁸Ralei khan abinga hmuchi kha amankhangsōt a kara amannei, ahma inkeia ajîk, khava sōa akai, khava sōa akara kasiptak savui hong kasōk.

²⁹Kara kha ahonghmin pha, mipa khan akoite vânga ât aphut jo, ajârchu sa-ât pha kha hong katlung jo.”

³⁰Jesu’n ader hei, “Pathen Rengram hi eini’n hei leh mo nitekâk sik? Khana hei tekâk vânga mo nihri manchên sik?

³¹Khavakha hiva kapō kae. Mipa inkhat in anṭamhmu inkhat alo, raleichunga hmuchi kasinpen kae, raleia avor mankek jo.

³²Bongkhat sōa hong kakeksōt a khana kahar kâra akalenpen inkhat hongkachang jo. Khana abâk kalen tatak asem jo khava chunga vahei kahong heia adaihlim a rabu an-inchom jo.”

³³Jesu’n hiva kapō tekâk katamtak ahmanga mihei hneng aṭong aleihri pek hei; antamanhret torchen kha ahri pek hei.

³⁴Tekâk tei loa anhnenga ṭong leihri mak, tâk abing rōk a asonlehei leh aleiom pha chu sonlehei hneng heirakip ahri manchên pek heia kae.

³⁵Khava ning bât a khōhleia, Jesu’n asonlehei hneng, “Eini dîr rekhat ting rakan me sona se jo rih,” ati hei.

³⁶Khava jâra mipuihei kha andahlon jo hei; asonlehei khan Jesu leichōng dekna rakōnga hong kachōng heia ama kha anṭhōi jo. Alak rakōng he’m khan leika-om hei.

³⁷Manhret theiloa thlipui inhnaktak heikahrâng jo, tui in-nông khan rakōng shunga tui ahong kathek manhlut jo, rakōng kha tui hongsip rong ati jo.

³⁸Jesu chu rakōng kahnungting leika-om, akut lukham amanchanga leikaje; asonle he’n anmathōa anti, “Oja, keini thirih kanti jo adonlo che mo?”

³⁹Jesu kangira thlipui hneng ṭong aleipek, “Dai hnger roh!” khan chu tui in-nông hneng ati, “Innok mak roh!” Khana thli kha kahai jo khana kadai hnger jo.

⁴⁰Khava sōa Jesu’n asonlehei hneng, “Heisa mo khangtuk hrep akaṭi chei? Tûn katlung taksenna neimak chei mo?” ati hei.

⁴¹Tâk anmani kaṭihêr jo hei khana anmani khat leh khat inbek heia, “Hiva mipa hi tu mo? Thli leh tui in-nông kapha’n aṭong anjui!” antia kae.