Read Komrem MARK 5 Bible Online

MARK 5 - Komrem bible

MARK 5

¹Jesu leh asonlehei Galilee Dîr rekhat ting, Gerasa ramṭhen hong katlung jo hei.

²Jesu rakōng chunga inphut ahei sōk lim a khan khava hmun a thlânkhura inphut ahei kasōk pase inkhat in ale’ntōpui hei. Hiva mipa hi ashunga rathla kaṭhamak aleirôna kae;

³khana thlânkhur shung heia aleika-om kae. Tute’num khit a antadator mak jo kae;

⁴ave-avea akut leh ake thîrhrui vâng anleikhit, tâk thirhrui kha akapot tanna, ake avōkna heia kae. Ama kha ratha aneihêr tûte’n leisur tor mak hei.

⁵Sûn leh jân thlânhei leh tlânghei katlung bit a kalôna, kapenga khana abinga hlunga insuk-khok a kae.

⁶Ama’n kahlajap a a-omlai Jesu kha aleihmu; khan chu katlâna ahmai kunga inkuna akamuk,

⁷khana ka-ônga, “A’nshângpen Pathen Sapa Jesu! Kei heimo namanlo hnōm eng? Pathen jâra, kangek che, kei karâkna apek mak roh!” ati.

⁸(Ama’n hinga aleiti hi Jesu’n, “Rathla kaṭhamak, hiva mipa hnenga inphut sōksōt roh,” ati jâra kae.)

⁹Khava jâra Jesu’n ahnenga, “Narahming heimo?” tia ader. Ama’n amasôna, “Karahming, ‘Ajâm,’ kae, ajârchu katam ung!” ati.

¹⁰Khana khava ramṭhen a inphut rathla kaṭhamak-hei kha atirsōt makna sik ama’n Jesu hneng angek a ka-oma kae.

¹¹Khava hnenga khan vok katamtak rup inkhat khava hmebung sira khan thlai ansâk a leika-om hei.

¹²Khava jâra rathlahei khan Jesu hneng, “Vok-hei hneng son atir roh, anshunga amanhlut roh,” anti.

¹³Amansesōt jo hei, rathla kaṭhamak-hei kha mipa inphut kasōksōt heia vok-hei shunga vakahlut jo hei. Vok-hei kha ankhenga aja 2,000 kapō hei kae, hmebung kare panga katlânsuk heia dîr shunga katla inhlut sō jo hei.

¹⁴Vok kakhemhei kha katlân heia khōpuihei leh hlei rajei heia anvahri manthang joa kae. Omchen kasōk ka-en sik a mihei kha leikasōk hei,

¹⁵khana anmani Jesu hneng anhong pha, rathla kaṭhamak katamtak karônpa kha anleihmu jo. Ama khana khan le’n onga, pōn a’nsia kahlim senga leika-om; khana ankhenga anleiṭit jo.

¹⁶Khava aleikahmu hei khan rathla kaṭhamak karôn mipa leh vok-hei chunga omchen kasōk kha mihei anhri pek jo hei.

¹⁷Khava jâra Jesu’n anram kha adahlon pekna sik heia anleingek.

¹⁸Jesu’n rakōng shunga ahlut pha, rathla kaṭhamak leikarônpa khan, “Nakahnung jui che rong!” tia aleingek.

¹⁹Tâk Jesu’n leihnōm pek mak. Khava kanek a, ahnenga aleihri pek, “Na-inna, na-innshunghei hneng inle roh, khana Rōngpu’n heituk-hrep mo nachunga atlopek che khana heituk-hrep lungset arôn che mo vamanthei hei roh.”

²⁰Khava jâra mipa kha kasesōt a Khōpui Sôm inti kha katlung bit a, Jesu’n ama sik heituk-hrep mo atlopek jo ti kha avahri pek hei. Khana akathei rakip in inlak anleisak.

²¹Jesu dîr rekhat ting inle nôk jo. Khava dîr panga khan mipui katamtak akimvea intûp jo hei.

²²Khava khōa intûpna inn synagogue a ṭōnkarôn, Jairus kahonga, khana Jesu kha ahmu pha akekunga abinga hong inbok a,

²³khana rahnaktak a aleingek, “Kasanu kasin kana hêr jo. Lungsettak a hong roh adamna sik leh ahringna sik achunga nakut avadapek roh.”

²⁴Khava sōa Jesu’n ama leh inṭhōia kase inphut jo. Mi katamtak leh Jesu le’nṭhōi heia mipui in ama kha ankatōmbit a kae.

²⁵Kum 12 thi kajunga khōdeng katheitak nuhmei inkhat leika-om,

²⁶thempu katamtak in anlei en ravâng leidammak. Asêr nei rakip amathlâng sō jo, tâk anat adampui kanek a pha rakip a kakhôk chet-chet jo.

²⁷Amanu’n Jesu chungchânga aleithei; khava jâra, mipui kâra kahonga akahnungting ahei juia,

²⁸abinga aleiti, “Apōnhmor bek um katôn inchu damna kahmu sik.”

²⁹Amanu’n apōn atôn jo, athi jung kha khava phatak a kabâng jo; khana a’nrengna kha kadam jo ti kha abing malung shunga le’nhret.

³⁰Khavatak a khan Jesu’n ama a inphut ratha akasōk kha amanhret jo, khava jâra ama’n akimvea a-en heia ader hei, “Tu’n mo kapōn asit?”

³¹Asonle he’n anmasôn, “Mipui hiseng in hingtuk hrep ankatōm che nahmu, heisa mo nakatôn kha nalader?”

³²Tâk Jesu’n khava katlo mi kha ahmun a sik a-en manve ṭhak a kae.

³³Nuhmeinu khan achunga omchen kasōk kha a’nhret a, ṭit innok pum a kahong jo, akekunga inkuna, akadik rakip kha ahri pek jo.

³⁴Jesu’n amanu hneng, “Sanu, nataksen in amandam jo che. Kamōnga se jo roh, na’nrengna inphut dam jo pa roh,” ati.

³⁵Jesu’n hi ahrilai, Jairus inna inphut ṭongkarôn mi ṭhahrep kahong heia ahnenga anleihri pek, “Nasanu kha kathi jo, Oja kha heisik a mo namanbōi sik?”

³⁶Jesu’n anṭong hri kha khôk saktak a rangei pek mak hei, tâk Jairus hnenga ahri, “Ṭimak roh, taksen rōk taksen roh.”

³⁷Khava sōa ama’n Peter, James khana anaipa John tei loa tûte akahnung leimanjui mak hei.

³⁸Jairus inna katlung jo hei, khana khan mihei bōina leh kare inhnaktak a akaṭap a’n-ôi hei rasa rakip Jesu’n aleithei.

³⁹Innshung kahlut a, anhnenga ati, “Heisa mo akabōi chei? Heisa mo akaṭap chei? Naipang hi akathi changmak, akaje hnâm kae.”

⁴⁰Anmani’n anleimanuisō, khava jâra anmani ankhenga vângting atirsōt hei, naipangnu anu leh apa khana asonle 3 hei aṭhōi heia naipangnu jena den shunga kahlut hei.

⁴¹Ama’n akut amatua, “Talitha, koum,” hiva tina chu, “Naipangnu, ke’n thō roh kati che kae,” ati.

⁴²Khavatak a khan naipangnu kha kathōisōt a kalôn lele jo. (Amanu kha kum 12 leikatluk jo.) Khavakha asōk a khan anmani’n andet-hla hêr jo.

⁴³Tâk tûte hneng anhrimakna sik Jesu’n ṭong inhnaktak apek hei, khana ama’n “Naipangnu kha sâk sik heikhat pek ruh,” ati hei.