Read Komrem MARK 7 Bible Online

MARK 7 - Komrem bible

MARK 7

¹Jerusalema inphut akahong Pharisee leh Dân oja ṭhahrep Jesu hneng hong intûp hei.

²Asonle ṭhahrep in bekdân dungjuia a’nthengmak kut vâng bu antasâk kha anhmu hei, khachu, mihei sedân sik a Phariseehei mantheina ngai kha juiloa anmani’n ankut leisôp mak heia kae. (

³Ajârchu Phariseehei leh Jehudi seng in anpu anpa heia inphut insena ngai kha antajui ṭhak kae: ankut kaṭhadek a sôp loa chu, bu sâkphung mak hei;

⁴khan chu jōrtlânga inphut anta heichoi heikhat hmapena sôp mantheng loa sâkphung mak hei. Anmani’n pu leh pa heia inphut antarahlâng chôndân katamtak anjui, ti chu kōklei, bephu, sumbe khana jekhumhei sôp manthengna hlam ka-om et hei.)

⁵Khava jâra Phariseehei leh Dân ojahei khan Jesu hneng anleider, “Heisa mo nasonle he’n pi leh puhei mantheina nihei tlo ṭhak hi antajui mak, bekdân dungjuia kut innim pum a bu antasâk?”

⁶Jesu’n amasôn hei, “Nangnihei chungchânga ṭong leikasân Isaiah kha heituk a akadik jo mo! Ama tamazet kapōa, nangni hi mi inṭhatsak chei kae: ‘Hiva mihei hin anbei vâng rōk ankaja eng,’ Pathen in ati, ‘tâk anmalung chu keia inphut kahlatak a ka-om.

⁷Kei antakamuk eng hinum anmani sik ahnemna om mak, ajârchu khahei kha Pathen dân kapōhrep a mihring chôndân kha mi anmanthei hei!’

⁸“Nangni’n Pathen ṭongpek kha nanda hlona, mihring mantheina jôk kha nanjuia kae.”

⁹Khana Jesu’n amanjōm, “Nanbinga intheina kha mansena sik a, Pathen ṭongpek hlonsōtna akaliptak hlam chu nannei jo.

¹⁰Ajârchu Moses’n ṭong apek, ‘Nanu leh napa kaja roh; khana tu achang inum anu leh apa kahâksêr kha that sik kae,’ ati.

¹¹Tâk nangni mantheina khachu mi inkhat in hei-inkhat anu leh apa a’nthōpui theina anei inum ‘Hiva hichu Corban (Pathen tâ) kae’ nanti’nchu,

¹²ama’n anu leh apa a’nthōpui mak pha nanrangei mandam.

¹³Hing’hin nanmantheina kha miralak-hei hneng abân bâna nanmathlung khan Pathen ṭong kha atuktan jo. Khana hinghiva kapō katamtak um nangni’n nantloa kae.”

¹⁴Khava sōa Jesu’n mipuihei kha abek nôk heia anhnenga ahri, “Nankhenga kaṭong hri hi rangei ruh, khana manhret ruh.

¹⁵Vânga inphut heikhat mi inkhat shunga akahlut khan mi kha beklanga amantheng mak heite om mak. Mihring shunga inphut vânga ahong kasōk khan ama kha amantheng mak jôk kae.”

¹⁶Atheina sik kōr nannei inchu rangei ruh!

¹⁷Ama’n mipuihei kha adahlona innshung ahlut pha, asonle he’n aṭong hri kha amanchênna sik ander.

¹⁸Jesu’n anhnenga ati, “Nangni milak-hei kanek a manhretna neidetmak jo chei. Manhret mak chei mo? Vânga inphut heikhat mi inkhat shunga ahlut khan ama kha amantheng mak changdek mak,

¹⁹ajârchu khavakha amalung shunga hlutmak tâk avon shunga akahlut kae, khava sōa ataksa inphut vânga hong kasōk a kae.” (Hivahi ahria, Jesu’n sâk rakip intheng tia amalâr.)

²⁰Khana ama’n ahrisa, “Mi inkhat a inphut vâng ahong kasōksōt khan ama kha amantheng mak kae.

²¹Ajârchu mi malung shunga inphut ṭhatmak mandonna kha kasōk a khava khan ama kha ṭhatmak amantlo, jôngna, inrûkna, mi thatna,

²²mi nuhmei-puise setpuina, phâmrai kase, khana ṭhatmak rakip tlona; mihōnna, omchen ṭhatmakna, in-ersakna, hrimasetna, inlensakna khana mona,

²³hiva ṭhatmak rakip hei hi mihring malung shunga inphut ahei kasōk kae khana khava khan amantheng mak kae.”

²⁴Khava sōa Jesu’n khava hmun kha adahlona Tyre hnenga ramṭhen inkhat a kase jo. Ama inn inkhat shunga leikahlut khana khava hmun a a-om kha tûte inkhat tamanhret sik a leimadu mak, tâk inthup a leiomsôt tor mak jo.

²⁵Nupui inkhat, asanu shunga rathla kaṭhamak akahlut jo khan Jesu chungchânga athei pha inrangtak a kahonga akekunga hongkatlua kae.

²⁶Khava nupuinu kha Syria ram a Phoenicia ramtlâk a a’nte Jât-hlop mi inkhat kae. Amanu khan asanua inphut ṭai kha Jesu’n ahnong sōt pekna sik aleingek.

²⁷Tâk Jesu’n amasôn, “Hma inkeia naipanghei veimankhop hei hi rih. Naipanghei thlai kha lopek heia uihei hneng hlonpek sik hi dikmak.”

²⁸Amanu’n amasôn, “Oja, ui he’num naipanghei sâkbang dokhâng thōia akatla hei kha ansâk a kae!”

²⁹Khava jâra Jesu’n amanu hneng, “Khanga namasôn jâra khan na-innting inle jo roh, nasanua inphut ṭai akasōksōt kha navahmu sik jo,” ati.

³⁰Amanu kha inna kase jo khana asanu jekhum chunga akaje kha avahmu; ṭai kha asanua inphut kadiktak a leikasōk jo.

³¹Khava sōa Jesu’n Tyre ven kha adahlon jo khana Sidon apetana Galilee dîra leikase, Khōpui Sôm khat tlungna hlamdung kha aleijui.

³²Mi ṭhahrep in kōr kaset, khana kaṭha akaṭong theimak mi inkhat anheiṭhōia, Jesu’n achunga akut ada pekna sik a anleingek.

³³Khava jâra Jesu’n ama kha mipuiheia inphut abinga athōisōt a, akōr shung heia akutpârhei athōna amachi thlōnpek, khana amalei kha asitpek a kae.

³⁴Khava sōa Jesu’n marvânting a-ena, malung kana tak a inphuhronga, mipa hneng khan, “Ephphatha,” ati, “Inhlang roh!” tina kae.

³⁵Khava phatak a khan mipa kha akōr athei jo, khana amalei in-ak kha om mak jo, khana heite inpanloa ṭong ahrisōt joa kae.

³⁶Khava sōa anmani’n tûte hneng anhrisōt makna sik Jesu’n mipui hneng ṭong apek jo hei; tâk ama’n ṭong apek manhnak chet hei pha akakhe chet a anhrisōt joa kae.

³⁷Khana akathei rakip in andet-hla hêr jo. “Heirakip hi heituk injentak a atlo jo mo!” anti. “Kōr kaset kapha amanvâr, akaṭong theimak amanṭong thei,” antia kae.