Read Komrem MARK 8 Bible Online

MARK 8 - Komrem bible

MARK 8

¹Sôt lo jen a mipui ahlop katamtak hong intûp nôk jo hei. Anmani’n sâk sik heite annei mak jo pha, Jesu’n asonlehei ahnenga abek heia ati,

²“Hiva mihei sik a kamalung kachâm, ajârchu anmani kei leh ni 3 hong ka-omsap jo ung, khana tûnhin sâk sik heite neimak jo hei.

³Ke’n anmani bu mansâk loa an-ina katir he’nchu ansena hlamhri invōi sik jo hei, ajârchu anmani ṭhahrep ram kahlatak a inphut akahong hei kae.”

⁴Asonle he’n ahnenga ander, “Mi hiseng veimankhopna sik buhlom hiva nêrdiram thōia hin tu’n mo ahmutor sik?”

⁵Jesu’n ader hei, “Buhlom heija mo nantanei?” Anmani’n, “Buhlom 7,” tia anmasôn.

⁶Jesu’n mipuihei kha raleia ani’n-ongna sik ṭong apek hei. Khava sōa ama’n buhlom 7 kha aloa, Pathen manpâkna anei, ahar akhōi heia mipuihei hneng semna sik asonlehei apek jo hei; khana sonle he’n khanga ansempek jo hei.

⁷Anmani’n nga kasin ajing um anneisa a kae. Jesu’n khava sik a khan Pathen manpâkna aneia khava nga kha’m antasemsa sik a asonlehei ahri pek hei.

⁸Ankhenga ansâk khana kakhop et hei, akasâk hei kha mi 4,000 kapō hei kae. Khava sōa sonle he’n antasâk manhlei ahar-ahak hrai 7 kasip anhrut a kae. Jesu’n mipuihei kha amansesōt jo hei

¹⁰khana inrangtak a asonlehei leh rakōng anchōnga Dalmanutha rambâkting kase jo hei.

¹¹Pharisee ṭhahrep Jesu hneng kahong heia inkhepui anleiphut jo. Anmani’n anchâng kam a man-ôk sik anleimadu, achang jâra Pathen manṭhatna achunga ka-om ti malârna ṭōn-inlak inkhat atlo sik a anleider.

¹²Jesu inphuhronga ati, “Heisa mo tûnlai khanga mihei hin ṭōn-inlak antader? Kahri pek chei kae, kha changmak! Hiva mihei hneng khang khava hmu manchênna kha inpek mak jo ning!”

¹³Adahlon heia, rakōng achōng nôk jo, khana dîr rekhat ting rakan sik a intôr jo hei.

¹⁴Sonle he’n ankhopna sik buhlom heirôn sik kha anleimahngi jo, rakōng chunga khan buhlom inkhat rōk annei jo.

¹⁵Jesu’n amanse hei, “Phariseehei leh Herod chea inphut insing thei una inrin ruh.”

¹⁶Anmani inbe heia, “Eini’n buhlom nineimak jo jâra ama’n hi ahri kae,” anti.

¹⁷Jesu’n an-inbekna kha amanhret jo, khava jâra ader hei, “Buhlom om mak jâra heisa mo nangni a’nbe chei? Tûn katlung lamanhret mak chei mo? Nanmalung khang hrep a alakasak chei mo?

¹⁸Nangni’n hmit nanneia, hmumak chei mo? Kōr nanneia, theimak chei mo? Lamandonsōt mak hi chei mo

¹⁹mi 5,000 sik a buhlom 5 har kakhōi kha? A’nhlei ahar-ahak hrai heija mo nanta hrutsōt?” Anmani’n anmasôn, “12,” anti.

²⁰“Khana mi 4,000 sik a buhlom 7 har kakhōi pha khan, a’nhlei ahar-ahak hrai heija mo kasip nanta hrutsōt?” Jesu’n ader hei. Anmani’n anmasôna, “7,” anti.

²¹Jesu’n ader hei, “Tûn katlung nangni’n lamanhret mak chei mo!”

²²Anmani Bethsaida a kahong jo hei khana khan mi ṭhahrep in hmitkacho inkhat Jesu hneng anheiṭhōia, asit sik a anleingek.

²³Jesu’n hmitkachopa kha akut a akeia khō vângting aṭhōisōt jo. Ahmit amachi thlōn peksōa, achunga akut adapek a ahnenga ader, “Heikhat nahmu tor mo?”

²⁴Mipa khan khō athlira, “Ke’n mihei kahmu tor jo, tâk anmani thingkung kalônle ka-ang hei,” ati.

²⁵Khana Jesu’n ahmit kha aleisit pek nôk. Khava pha khan chu mipa khan kasang kanga a-en jo, ahmit ahmutor jo, heirakip inchêna ahmu jo.

²⁶Khava sōa chu Jesu’n mipa kha, “Hiva khōshunga inle nôk mak jo roh,” tia ṭong apeksō leh a-innting atir jo.

²⁷Khava sōa Jesu leh asonlehei Caesarea Philippia hnenga khōheia kase heia kae. Hlam a ansena asonlehei hneng ader hei, “Mihe’n kei hi tu mo kae anti eng?”

²⁸Anmani’n anmasôn, “Mi ṭhahrep in Tui Inhlutpa John che anti; alak harkhat in Elijah che anti; alak harkhat in Sânkathemhei kâra inkhat che kae anti.”

²⁹Ama’n ader hei, “Nangni’n kei tu mo kae, nanti eng?” Peter in amasôn, “Nang Messiah che kae.”

³⁰Khava sōa Jesu’n ṭong apek hei, “Kachungchâng ṭong hi tûte hneng hrimak ruh.”

³¹Khava sōa Jesu’n asonlehei hneng manthei aphut a, “Mihring Sapa kha khōdeng athei hêr sik kae khana upahe’n, thempu kalen he’n, khana Dân oja he’n hnōm mak hei ning. Khana ama anthat sik, ni 3 sō leh kahringa akathōisōt sik kae,” ati.

³²Ama’n hivahi inthengtak a ahri pek hei. Khava jâra Peter in ama hmun hlopting aṭhōisōt a arasei manphut a kae.

³³Tâk Jesu’n akimvea inhea asonlehei kha a-en heia Peter kha aleirasei, “Kahnenga inphut sesōt roh, Seitan! Namandonna kha Pathena inphut changmak, tâk mihring chôndâna kae.”

³⁴Khava sōa Jesu’n mipuihei leh asonlehei kha ahnenga abek hei. Amanthei hei, “Tu achang inum mi inkhat in kakahnung juirong ati’nchu, ama binga a’ndon hêrmak sik kae, athingrake akadoma ajui sik eng kae.”

³⁵Ajârchu tu achang inum abinga hringkhō kahuk hnōm khan amanhmang sik; tâk tu achang inum kei sik a leh ṭong intheng sik a ahringkhō inhmang khan a’nhuk sik kae.

³⁶Mihe’n vânhnōi pumpui chen hei sona tâk anrathla a’nhmang inne, ahnemna heimo aka-om? Ahnemna om mak!

³⁷Anrathla chen malena sik a anmani’n antapektor heite om mak.

³⁸Mi inkhat in hiva bekṭong kase leh ṭhatmak pha shunga hin kei leh kaṭong mantheina chungchânga a’nzak inchu, Mihring Sapa khan Apa lûrna shunga ngeva intheng hei leh anjōng pha achungchânga a’nzak sik kae.