Read Komrem MARK 9 Bible Online

MARK 9 - Komrem bible

MARK 9

¹Khana Jesu’n anhnenga aleihrisa, “Ke’n kahri pek chei kae, Pathen Rengram kha ratha kaneitak a ajōng ṭum anhmumak kârseng alakathi mak sik mi ṭhahrep hinahin ka-om heia kae.”

²Ni 6 sōa Jesu’n Peter, James khana John, tlâng inshâng inkhat chunga aleiṭhōi hei, khava hmun a anbing rōk a leika-om hei. Anmani’n khanga anlei enlai Jesu hme inthlengna kha leikasōk jo,

³khana apōnsihei kha hongkachek jo, raleichunga tu inkhat tasôp manchektor sik kanek a kachek.

⁴Khava sōa sonle 3 hei khan Elijah leh Moses leh Jesu an-inbek kha anleihmu.

⁵Peter kaṭongsōt a Jesu hneng ahri, “Oja, eini hiva hmun a ni-om hi heituk a akahōi jo mo! Eini’n rebuk 3 sâk rih, nang sik inkhat, Moses sik inkhat, khana Elijah sik inkhat.”

⁶Ama leh alak-hei kha kaṭihêr jo heia ama’n heimo ahri leimanhret mak a kae.

⁷Khava sōa sumtuk inkhat jōngkasōk a adaihlim khan amakhusi jo hei khana sumtuk a inphut rasa inkhat kajōnga, “Ama hi ka-Sapa marittak kae, aṭong rangei ruh,” ati.

⁸Anmani’n inrangtak a ankimve an-enlele tâk tûte leihmu mak jo hei; Jesu rōk kha ankâra leika-om.

⁹Anmani tlânga inphut anjōng ṭumsuk lai, “Mihring Sapa kha thina inphut athōisōt mak kârseng, nantahmu kha tûte hneng hrisōt mak ruh,” tia Jesu’n ṭong apek hei.

¹⁰Anmani’n aṭongpek-hei kha anjui, tâk anmani rōk kâra ṭong kha inbekna anneia, “‘Thina inphut ṭhōisōt,’ ti hi heitina mo?” anti.

¹¹Khana anmani’n Jesu ander, “Dân oja he’n Elijah hma inkeia kajōng sik antati hi heisik jâra mo?”

¹²Ama tamasônna kha hi kae, “Heirakip intluk sik a Elijah hma inkeia akajōng sik mông kae. Kha’num heisa mo ṭong intheng in mihring Sapa kha khōdeng athei hêr sik khana antahnōm mak sik kae, tia ahri?

¹³Hei-achang inum ke’n kahri pek chei kae, Elijah kha akajōngdek jo kae, khana achungchânga ṭong intheng in ahri kapōa, mihe’n ama kha antamadu hrep a achunga anleitlo joa kae.”

¹⁴Anmani sonle lak-hei hneng anhong pha, mipui katamtak ankimvea anleika-om hei kha anvahmu khana anmani kha Dân oja ṭhahrep he’n anle’nkhepui heia kae.

¹⁵Mipui he’n Jesu anhmu pha, inlak ansak hêr, khana ahnenga katlân heia chibei anvapek a kae.

¹⁶Jesu’n asonlehei hneng ader hei, “Hei chungchânga mo anmani leh a’nkhe chei?”

¹⁷Mipui kâra pase inkhat in amasôn, “Oja, ke’n kasapa nahnenga kaheiṭhōi kae, ajârchu rathla kaṭhamak ashunga ka-oma ṭongthei mak jo.

¹⁸Rathla khan ama akanok kataia, raleia katlua, aha akarôt a, achiphōn kasōk, khana atakpum akei razit ria kae. Rathla kha anhnongsōtna sik ke’n nasonlehei kangek hei, anmani’n hnongsōt tor mak hei.”

¹⁹Jesu’n anhnenga ati, “Heituk a taksenna kaneimak mi chei mo! Heituk kasôt mo kala’nṭhōipui sik chei? Heituk kasôt mo kala-omsap pui sik chei? Naipangpa kha kahnenga heiṭhōi ruh!”

²⁰Khana anmani’n ama kha ahnenga anheiṭhōi. Rathla khan Jesu aheihmulim bât leh, naipangpa kha akei ra-ea raleichunga katlua, inkhōn inlet a, abeia achiphōn kasōk jo.

²¹Jesu’n apa hneng ader, “Hinga atina hi heituk mo akasôt jo?” Khana apa’n, “Anaipang chang laia inphut jo kae” tia amasôn.

²²“Pha katamtak rathla kaṭhamak khan hmeishunga leh tui shunga ahlon manhlut a thatna sik a atlo jo kae. Nang in nator inchu alungset inna a’nthōpui roh!’ ati.

²³Jesu’n ati, “Kadik, nang in nabinga naleitlo tor inchu nu! Taksen kanei mi sik a chu heirakip kae theipet.”

²⁴Apa khan inrangtak a hong ka-ônga, “Taksenna ke’n kanei, tâk pui tlukmak. Akatamdet kanei theina sik a’nthōpui roh!” ati.

²⁵Mipuihei khan anmani anta honghnai hei kha Jesu’n ahmu pha, ama’n rathla kaṭhamak hneng khan ṭong apek, “Akaṭong theimak leh kōr kaset rathla nang naipangpa a inphut nahei sōkna sik khana ashunga nahlut nôk hêrmakna sik ke’n ṭong kapek che kae!”

²⁶Rathla kha inhnaktak a kapenga naipangpa kha hme kasetak a akei ra-êa, kasōksōt jo. Naipang kha akathi kalōng ka-ang jo, khana mi rakip in, “Ama kathi jo!” anleiti.

²⁷Tâk Jesu’n naipangpa kut kha amatua akei mathōisōt a kangirsōt jo.

²⁸Jesu’n innshung ahlut sōa, asonle he’n marûk a ahnenga anleider, “Heisa mo keini’n rathla kha kantahnong sōt tor mak?”

²⁹Jesu’n amasôn hei, “Hinghiva hi derna rōk in ahnong sōt tor kae, alak heite’n tor mak.”

³⁰Jesu leh asonle he’n khava hmun kha andahlona Galilee anpetana kase jo hei. Jesu’n a-omna hmun hi tûte inkhat tamanhret sik leimadu mak,

³¹ajârchu ama’n asonlehei mantheina aleinei hei: “Mihring Sapa kha akathat sik mihei kut chunga anpek sōt sik khana ni 3 sō leh ama akahringsōt nôk sik kae.”

³²Tâk hiva mantheina hi heitina mo manhret tor mak hei, khan chu ama der sik um leikaṭi hei.

³³Anmani Capernauma kahong jo hei, khana innshung anhlut pha Jesu’n asonlehei hneng ader hei, “Nangni hlamdunga khan hei ṭong mo a’nkhe chei?”

³⁴Tâk anmani’n leimasôn mak hei, ajârchu hlam a an-inkhena khachu anmani tu mo akalenpen sik ti chungchânga kae.

³⁵Jesu in-onga, sonle 12 hei kha ahnenga abek heia, “Tu achang inum ahma kakei kachang hnōm khan ahnung kakhôrpen leh mi rakip sōk abinga a’nchang nger sik kae,” ati.

³⁶Khava sōa ama’n naipang inkhat avaṭhōia anhmai kunga amanngir. Ama’n akut vâng akakōa, anhnenga ahri,

³⁷“Tu achang inum kei rahminga hinghiva naipang inkhat inhlâng mi khan kei arahlâng eng kae, khana tu achang inum kei inhlâng mi khan, kei rōk arahlâng eng changloa, anijōng katirpa kha’m arahlâng kae.”

³⁸John in ahnenga ati, “Oja, mi inkhat in ṭaihei narahminga ahnong sōt hei keini’n kanhmu, ama eini ruploi a-emak jâra hai jo roh kantipek.”

³⁹Jesu’n anhnenga ahri pek hei, “Ama kha manbângna sik tlomak ruh; ajârchu kei rahminga ṭōn-inlak katlo jo mi khan khava kahnung bât a inrangtak a kei chunga ṭhatmak hri tor mak ning.

⁴⁰Ajârchu tu achang inum ani kadōimak mi kha eini sik a a’nṭang kae.

⁴¹Ke’n kadiktak a kahri pek chei kae, nangni keita nanchang jâra, tuidai kōklei inkhat rōk nankapek tu achang inum tloman arahlâng nger sik kae.

⁴²“Hiva naipang kasin inkhat taksenna eng kha manhmangna sik a tu mo inkhat in atlo’nchu khava mipa rînga chakri hlung kalentak makheipek a tui-ôngpui shunga hlon mathlâk kha ama sik kaṭha jôk sik a kae.

⁴³Khava jâra nakut inkhat in nataksenna amanhmang inchu, tuktan roh! Nakut 2 pum a akathi hêrmak hmeikhura nahlut sik kanek a kut inkhat rōk leh kumleikōa hringna nahlut sik kha kaṭha jôk.

⁴⁴Khana khan anmani kasâk rahlunghei kha thihêr mak hei, khana ankakâng hmei kha’m thihêr mak.

⁴⁵Khana nake inkhat in nataksenna amanhmang inchu, tuktan roh! Nake 2 pum a hmeikhura hlon manhlut nachang sik kanek a, ke inkhat kasea kumleikōa hringna nahlut sik kha kaṭha jôk.

⁴⁶Khana khan anmani kasâk rahlunghei kha thihêr mak hei, khana ankakâng hmei kha’m thihêr mak.

⁴⁷Khana nahmit inkhat in nataksenna amanhmang inchu, khersōt roh! Hmit 2 pum a hmeikhura hlon manhlut nachang sik kanek a, hmit inkhat rōk leh Pathen Rengram nahlut sik kha kaṭha jôk.

⁴⁸Khana khan ankasâk rahlunghei kha thihêr mak hei, khana ankaro hmei kha’m thihêr mak ning.’

⁴⁹“Ajârchu maichâm tōkna kha chi khan amantheng kapōa mi rakip hmei vânga ro mantheng sik hei kae.

⁵⁰“Chi hi akaṭha kae. Tâk a-êna kha asep jo’nchu, heikhong mo nantaman-ê thei nôk sik? Nangni ṭhōn inchangna chi kha nanbing kâra nei ruh, khana inkhat leh inkhat kamōnga om ruh.”