Read Komrem LUKE 12 Bible Online

LUKE 12 - Komrem bible

LUKE 12

¹Mipui lishing lishing ho’ntûp heia, inkhat in inkhat chunga ke anchoi leo jo pha, Jesu’n ahma inkeia asonlehei hneng ahri, “Phariseehei chea inphut leh an-inṭhat hlemsak a inphut insing thei ruh.

²A’nsûnsi heirakip mazerpet sik kae; a’n-ip rakip manhretpet sik kae.

³Khava sōa khō inthim thōia nanṭong hri kha sûn kani vâra a’nthei sik kae, khana kot inkam innbinga nanta hri ṭong kha innchunga khōtlâng a’n-ôn sik kae.

⁴“Kaṭhōnhei, kahri pek chei kae, taksa kathat tor, abânchu heite katlo tor mak hei kha ṭitmak hei ruh.

⁵Tu mo ṭit sik kha manhmu chei rong: taksa athatsōa, rathla kha hmeikhura hlon manhlutna ratha kanei, Pathen kha ṭit ruh. Ataksen ruh, nantaṭit sik kha ama kha kae!

⁶“Vasak pum 5 cheng hni sik a a’njōr changmak mo? Kha’num ankâra inkhatbek Pathen in mahngi mak.

⁷Nanlua sam rajang kapha akhenga atintapet kae. Khava jâra ṭitmak ruh; Nangni chu vasak katamtak kanek a nanman akatam jôk kae!

⁸“Ke’n kahri manchên pek chei kae mipui hmaikunga kami achangna inlârsōt kha, Mihring Sapa’n Pathen ngevahei hmaikunga khanga amalâr sik kae.

⁹Tâk-kha mihei hmaikunga kei kahnōm mak mi kha, Mihring Sapa’n Pathen ngevahei hmaikunga ahnōm mak sik kae.

¹⁰“Tu enum Mihring Sapa dōina ṭongkahri kha inngei indam sik; tâk Rathla Intheng dōina ṭongse kahri kha inngei indam mak ning.

¹¹“Anmani intûpna innpuia, vaikarôn leh ṭōnkarônhei hmaikunga ṭong tan sik a anṭhōi chei pha, heikhonga inhrung sik, heimo masôn sik tia malung mandong mak ruh.

¹²Ajârchu Rathla Intheng in aphatak a khan nanta hri sik kha amanthei sik chei.”

¹³Mipui kâra inkhat in Jesu hnenga, “Oja, kanpa’n aleidahlon nei leh hao kha ka-upa’n a’nsempuina sik eng ahri pek roh,” ati.

¹⁴Jesu’n amasôn, “Eh kaṭhōn, nangni nei kasem sik a leh nanṭong katan sik a kei tu’n mo amatung eng?”

¹⁵Khana ama’n anmani hei seng hneng ahri manjôna, “Phâmrai setna rakip a inphut insing thei una inhrung kaṭha ruh; ajârchu heituk anei inum khahei khan mi inkhat hringkhō kadiktak kha antasyemsōt tor changmak,” ati.

¹⁶Khava sōa Jesu’n tekâk hi aleihri pek hei: “Mikahao inkhat in sâk leh in hingja sōkna ram inkhat anei.

¹⁷Ama’n abinga amandona, ‘Kasâng rakip dana sik hmun neimak jo eng. Ke’n heimo katlo sik jo?’

¹⁸Abinga inbek a, ‘Hinga ke’n tlo jo rong; kasâng rakip leh kanei rakip dana sik kasasōr ṭhet eng sona akalen chet inkhat sak rong.

¹⁹Khava sōa ke’n kabing hnenga, Vâng kaṭhapa! Nang in neinâk akaṭha rakip kum katamtak nakhopna sik nanei jo. Sâk jo roh, in jo roh, nabinga hringkhō kahōia om jo roh, inti sik eng,’ ati.

²⁰Tâk-kha Pathen in ahnenga, ‘Eh mikamo! Tûnjân tak nahringkhō a’nchai sik jo kae, nabinga sik naleimanbuk neinâk seng hi hnunga tuta sik jo mo?’ ati.”

²¹Khana Jesu’n achaina ahri, “Anbinga sik a karōi inbuk hei, tâk Pathen hmit-hmua chu akahao mak hei kha hing’hin kachang sik hei.”

²²Khava sōa Jesu’n asonlehei hneng ati, “Khava jâra kahri pek chei kae nanhringna sik a sâk leh in a-emak leh pōnsi derkeihei jâra inrim mak ruh.

²³Ajârchu hringkhō hi bu kanek a akakhôk jôk kae. Khana taksa hi pōn leh der kanek a aka-khôk jôk kae.

²⁴Va-âk heiso enruh: anmani’n hmuchi tuk um tukmak hei, ât um ât mak hei, anmani’n sasōr a’m manbuk mak hei; Pathen in avei heia kae! Nangni chu vahei kanek a mankatam hêr chei kae.

²⁵Nankâra tu’n mo malung inrimhrat jâra ahringkhō ajingbek inseisa tor aka-om?

²⁶Nangni’n khang khava ṭōn kasintek inkhat hmen nantlosōt tor mak inchu, neinâk ralak sik a heisa mo nanmalung a’nrim?

²⁷Kahar pârhei so heikhonga akakek hei mo enruh: anmani’n pōn um khôngmak hei, ṭōn um tlomak hei. Tâk-kha kahri pek chei kae, Solomon Reng kapha’num ahaona rakip vâng a’nret ravâng, rei inkhat ṭhatna kha phator mak.

²⁸Tuning hin kapâra jîng kania akaṭōi, hmeishunga ro manvâm bât sik kaharhei inret kha Pathen kae. Ama’n nangni akakhe chet a amanretmak sik chei mo? Heituk a nantaksenna akasin mo!

²⁹“Khava jâra heimo sâk sik heimo in sik ti jongna rōk a nanmalung manrim mak ruh.

³⁰(Ajârchu khōvel he’n hihei hi khôk ansakpuia kae.) Hihei hi nanrangei ti hi nanpa’n amanhret pek cheia kae.

³¹Khava kanek a, arengram jôk kha jong ruh, khahei seng kha’m apeksa sik chei kae.

³²“Rup katlôm hei, ṭimak ruh, ajârchu nangni rengram pek sik chei hi nanpa lungdo kae.

³³Nanneihei jōr una, sara khōdeng kathei pek hei ruh; nanbinga sik a’nhmang theimak sêrkōk hei inda ruh khana akatlasam hêrmak sik marvâna nei leh hao kha manbuk ruh, ajârchu khahei kha inru’n marûk tor mak khana ra-nge’n sâktor mak a kae.

³⁴Ajârchu nannei omna khan nanmalung aka-om ṭhak sik kae.

³⁵“Hei-hei ahong inum inrin ṭhak ruh, nanthaihmei det una ṭōn tlo sik a intluk ṭhak ruh,

³⁶hmōiṭhōi reveina inphut ankapu ahe’nle kahngâk ṭhak sōk-hei kapō chang ruh. Ahong pha kot ahei raki leh inrangtak a anmahlâng pek sik jo.

³⁷Ankapu ajōng inle pha, kahlim senga leh inrin ṭhak a aleika-om sōk-hei kha heituk a mahâm kaṭhahei mo! Kahri pek chei kae, ama’n azakkō kalen kha ahliksōt sik a kha, anmani aman ong sik hei, khana arazen sik jo hei.

³⁸Khana ankapu kha ṭhangṭim a-emak leh kasôtdet a ahong inum inrin ṭhak a aleika-om ahmu sōt hei kha heituk a mahâm kaṭha hei mo!

³⁹Khana hivahi nanmanhret, ti chu inn inkhat kapupa khan inru kha heitik pha ahong sik aleimanhret inchu, inrin ṭhak a leika-om sik a kha a-inn kha akaphet manvea amanhlut mak sik kae.

⁴⁰Khana nangni um a’nrinṭhak sik chei kae, heijâra mo niti’nchu Mihring Sapa kha nanhlamrin mak laitak akajōng sik kae.”

⁴¹Peter in, “Rōngpu, hiva ṭong tekâk hi keini sik a mo a-emak leh mi rakip sik a mo?” ati.

⁴²Rōngpu’n amasôn, “Khan chu akasing leh taksenthei kachang sōk kha tu mo? Ama khachu sōk lak-hei aphahrep a sâk sik akapek khana innshung pumpui katinta sik a akapupa’n anganse mi kha kae.

⁴³Anrōngpu a-inna ahe’nle pha, khanga aleikatlo ahmu sōt jo sōk kha heituk a mahâm kaṭha mo!

⁴⁴Kadiktak a ke’n kahri pek chei kae, khava sōkpa kha akapupa’n anei rakip katinta amanṭang sik a kae.

⁴⁵Tâk-kha sōk khan abinga akapu kha pha kasôttak he’nlevak mak ning tisonna, sâksona, insona, inrui jo sona, nuhmei-pase sōk ralak-hei kha avōk manphut a a-om inchu,

⁴⁶ni khat ama’n akapu jōng sik a ale’nhōr mak pha leh ale’nhret mak phatak a khan akapu kha hong inle sik jo. Akapu’n ama kha ṭong kajuimak hei chen kha amanchen sik a kha ahar-ahak a atuk rachen sik jo.

⁴⁷“Akapu tamantlo hnōm khachu amanhret, tâk akatlo sik a chu intluk lo, tlopek loa aka-om sōk khachu, inhnaktak a vōk a karâkna pek sik kae.

⁴⁸Tâk-kha akapu tamadu ṭōn chu manhret lo, heikhat avatloset jâra vōk a karâk sik akasōk jo kha inhnak loa vōkna karâkna kha pek sik kae. Akatam a’npe mi khana inphut akatam madu kae; khana akatamchet a’npe mia inphut akatamchet madu kae.

⁴⁹“Kei raleichunga hmei kahlon inthla akajōng eng kae. Khana kamadu kapōa hmei kha kasûk jo!

⁵⁰Karahlâng sik tui hlutna inkhat kanei, khana khavakha ke’n kachaimak kârseng heituk a inhnokna kanei jo mo!

⁵¹Raleichunga malung mōngna kapek sik a akajōng eng tia nantamandon eng mo? Kha changmak, ke’n kahri pek chei kae, nankasuk ṭhen jôk a akajōng eng kae.

⁵²Khava jâra tuna inphut mi 5 omna innshung inkhat kha insemṭhen sik hei, mi 3 in 2 andōi sik, mi 2 in 3 andōi sik.

⁵³Pa he’n sahei andōi sik, sahe’n pahei andōi sik hei; nu he’n sanuhei andōi sik, sanu he’n nuhei andōi sik hei; terpi he’n hmōihei andōi sik, hmōi he’n terpihei andōi sik hei.”

⁵⁴Jesu’n mipuihei hneng um ahri, “Nangni’n tlaitlâk tinga sumtuk akahong nanhmu pha leh, ‘Khō jōng kasûr sik,’ nantibât, sûr um kasûr ria kae.

⁵⁵Khana thlang tinga thli kahrâng nanthei pha, “Hong kalum sik,” nanti, lum um kalum takbak a kae.

⁵⁶Eh Inṭhat hlemsak-hei! Ralei leh marvân nan-enna ahong kasōk sik omchen nanmanhret tor; khan chu heisa mo tûnlai pha hichu nantamanhret tor mak?”

⁵⁷Akadik tlona sik a heisa mo nanbing chunga a’n-ensin mak chei?

⁵⁸Mi inkhat in ṭongtan hmun a amaher jo che’nchu, ṭongtan hmun a nase mak hma inchampuina sik torchena tlo roh. Natlo mak inchu ṭongkatan hmaikunga akei manhlut sik che, ama khan mi kasur kut a apek sōt sik che, kurkhum a ada sik jo che.

⁵⁹Ke’n kahri pek che kae, naleichoi achainapen peisa napek sō mak kârseng, khava hmun a ka-om sik jo che.