Read Komrem LUKE 13 Bible Online

LUKE 13 - Komrem bible

LUKE 13

¹Galilee mihe’n Pathen hneng inthoina antōklai Pilate in mi athat hei ṭong kha mi ṭhahrep in Jesu hneng anleihri pek.

²Jesu’n aleimasôn hei, “Khava Galilee mihei khanga athat hei jâra Galilee mi rakip kâra anmani akasetpen jo hei kae tia nantamandon mo?

³Kha changmak! Kahri pek chei kae, nanmalung nanthleng mak inchu, nankhenga anmani kapōa akathi sik chei kae.

⁴Siloama inn inshâng ahongchim pha mi 18 adehlon hei kha Jerusalema mi rakip kâra akasetpen jo hei kae tia nantamandon mo?

⁵Kha changmak! Kahri pek chei kae, nanmalung nanthleng mak inchu, nankhenga anmani kapōa akathi sik chei kae.”

⁶Khava sōa Jesu’n hiva tekâk hi aleihri pek hei, “Mi inkhat in athei rahōn shunga theichangkung inkhat alinga kae. Ama theichang kunga akara kajong leikase tâk heite leihmu mak jo.

⁷Khava jâra ama’n rahōn kathlōhei hneng ahria, ‘Enruh, kei hiva theichang kara kajonga kum 3-set kahong ṭhak jo eng, akara heite hmumak eng. Phûr mathlûk jo ruh; heisik a mo ralei thai hi ahmangṭhak sik a?’ ati.

⁸Tâk-kha rahōn kathlōpa khan amasôna, ‘Apu, kum khat rōk chu hinga da hi roh, ke’n akimvea cho eng sona ralei thai sunmansi hi rong.

⁹Khana akumting a’nra jo’nchu kaṭha jo; tâk a’nramak jo’nchu naphûr mathlûk sik jo.”

¹⁰Châmhngat kani ning inkhat a intûpna innpuia Jesu’n aleimanthei hei.

¹¹Khana khan rathla kaṭhamak karôn nuhmei kum 18 akana jo leika-om; akei mankun joa intlunhrek a ngir tor mak jo.

¹²Jesu’n amanu kha ahmu pha abeksōt a, “Nuhmei, nang na’nhling tor makna inphut masō jo che kae,” ati.

¹³Achunga akut aleidapek, khavatak a amanu intlun joa Pathen amanpâk joa kae.

¹⁴Châmhngat kani ning Jesu’n mi amandam jâra khan khava intûpna innpui vaikarônpa kha ahnuk kana a mihei hneng aleihri, “Ṭōn tlona sik ni 6 ka-om; khava shunga hong una hong-inzen indam ruh, Châmhngat kania hongmak ruh!”

¹⁵Rōngpu’n amasôn, “Eh mi’nṭhat hlemsak nang! Nankâra Châmhngat kani ning nansehratche leh shakōrtung kha tui ka-in sik a anrōnga inphut nanmasōa kae.

¹⁶Seitan in kum 18 akhit karâk Abraham sanu hi Châmhngat kania masōthei changmak mo?” ati.

¹⁷Ama’n hi ahri pha aka-en kadahei seng inzak jo hei; khana mi rakip chu aṭōntlo kalûr rakip chunga khan inpâk jo hei.

¹⁸Jesu’n ader hei, “Pathen Rengram kha hei leh mo a’n-ang? Hei leh mo katekâk sik?

¹⁹Khava khachu, mi inkhat in anṭamhmu aloa arahōna avor kapō kha kae. Khavakha hong kakeksōt a thingkung inkhat hongkachang, khana chunga vahe’n abâk chunga rabu anchoma kae.”

²⁰Jesu’n ader nôk hei, “Pathen Rengram kha hei leh mo katekâk sik?

²¹Nuhmei inkhat in che aloa ajâm gram 40 ahongsêm manpōrsō mak kârseng amanvei kapō kha kae.”

²²Jesu kha Jerusalemting kajōna asena khōpuihei leh khōte ahroa aleimanthei hei.

²³Khana mi inkhat in ahnenga, “Rōngpu, mi akatlômtek rōk hukmanhring sik hei mo?” ati.

²⁴Jesu’n amasôn, “Kot inchip a hlutna sik tak tlo ruh; ajârchu mi katamtak in hlutna sik tak antlo sik tâk hlut tor mak hei ning.

²⁵Inn kapupa kha vōi khat chu akathōia kot alakir sik, khava pha nangni vângting kot nanrakia kangir sik cheia kha, ‘Apu, kot amahlang pek roh!’ nanti pha ama’n ahei masôn sik chei, ‘Nangni khona inphut akahong chei mo ke’n manhret mak chei eng!’ ati sik.

²⁶Khava pha nangni’n nanmasôn sik, ‘Keini’n nahmai kunga kansâk a kanlei-in, khana nang in kankhōpuia nalei manthei ung.’

²⁷Tâk-kha ama’n ati nôk sik, ‘Nangni khona inphut akahong chei mo manhret mak chei eng, sesōt ruh!’ ati sik.

²⁸Nangni anhei hlonsōt jo chei pha, Pathen rengram a Abraham, Isaac, Jacob, khana sânkathem rakip nanhmu hei pha, heituk a nanha nantakarôt a akaṭap sik jo chei mo!

²⁹Nisō leh tlaitlâk a, sak leh thlanga mihei kahong sik heia kha Pathen Rengram revei dokhânga in-ong sik hei.

³⁰Khava pha hnung kakhôr in hma akei sik, hmakakei in hnung akhôr sik.”

³¹Khava laitak khan Pharisee ṭhahrep kahong heia Jesu hneng anleihri, “Nang hinna inphut hmunhlop a sesōt jo roh, Herod in athat hnōm che.”

³²Jesu’n aleimasôn hei, “Se una khava ram-ui hneng vahri ruh: Ke’n ṭaihei kahnong sōt a tuning leh jîng a’m mi kaman dam hei, khana ni 3 ning kaṭōn kachai sik kae.

³³Kha achang inum tuning, ajing, atip a kasena hlam kalajōn hi sik a kae; Jerusalema tei loa hmunlak a sânkathem inkhat that sik hi dikmak.

³⁴“Jerusalem, Jerusalem! Nahnenga Pathen tajōngtir tirlehei hlung vâng nadeng hlon hei, sânkathemhei nathat hei! Ârpui in atehei amathla hnōia aka-unsi hei kapōa ke’n namihei vōi heija mo kabân vâng ka-unsi sik heia kamadu, tâk amantlo mak che.

³⁵Khava jâra nan-Bek-inn hi dahlona ka-om sik jo. Ke’n kahri manchên kae, nang in, ‘Rōngpu rahminga akajōng ama kha Pathen in mahâmṭhat apek,’ nati mak hma seng, nang in kei ahmu mak jo tin che.”