Read Komrem LUKE 14 Bible Online

LUKE 14 - Komrem bible

LUKE 14

¹Châmhngat kani ning inkhat a Pharisee kâra hlamkakei inkhat inna bu kasâk sik a Jesu leikase; khana mihe’n Jesu kha anlei en madip ṭhak a kae.

²Enruh, akut ake a’nṭhōm inkhat Jesu hneng kahonga,

³Jesu’n dân ojahei leh Phariseehei ader heia, “Châmhngat kania mi mandam sik nidân in aphe mo aphemak mo?” ati hei.

⁴Tâk-kha anmani leikadai hnger hei. Khava pha Jesu’n mipa kha asit a amandama atirsōt jo.

⁵Khava sōa Jesu’n anhnenga ader hei, “Nankâra mi inkhat in sapa inkhat a-emak leh sehratche inkhat anei kha Châmhngat kania tuikhur kōk a atlâk inhlut inchu inrangtak a Châmhngat kani ning khan keisōt mak tin chei mo?”

⁶Tâk-kha hiva chunga heite leimasôn tor mak hei.

⁷Hmelâk ṭhahrep in in-ongna hmun kalûrpen antakadei kha aleihmua ankhenga hnenga hiva ṭong tekâk hi aleihri:

⁸“Hmōiṭhōina revei sik a mi’n anbek chei inchu, hmun kalûrpena in-ong mak ruh. Ajârchu nang kanek a akalûrdet mi inkhat aleibek thei.

⁹Nankabekpa kha kahong sik a kha ‘Hiva hmun hi ama hin chen rasoh,’ ahong ti sik. Khava pha inzak sik jo che khana nang thōi katōngpen hmun a in-ong sik jo che.

¹⁰Khava kanek a mi’n nang anbek che pha, se ina hmun inhnempena va’n-ong roh, khava pha inn kapupa kha kahong sik a kha nanhnenga, ‘Kaṭhōn, hiva hmun kaṭhating hin hong in-ong roh,” ahong ti sik che. Khana khan khōhme rakip hmaikunga kajana nachen sik.

¹¹Ajârchu binga a’nlensak mi kha mansinsak kachang sik, khana abinga a’nsinsak mi kha choi manshâng sik kae.”

¹²Jesu’n akabekpa hnenga kha’num ahri, “Nang in jîngkâra a-emak leh khōhlei thlai sâkna heia naṭhōn leh nasōpui, napare patung, mikahao nakhō-navenhei bekmak hei roh, akinchu anmani’n anbek nôk chea anvei male sik che.

¹³Nang in sâktlânga mi navei pha leh, sarahei, akalôn theimak hei, ke inkhōi hei, hmitkachohei, bek hei roh;

¹⁴nang vâng inpek sik che, ajârchu anmani’n nang male tor mak tin che. Mikadik-hei ṭhōisōt ning Pathen in nang amale sik che.”

¹⁵Dokhâng chunga a’n-ong pase inkhat in kha athei pha Jesu hneng ati, “Pathen Rengram dokhâng chunga thlaithleng ka-ô sik hei kha heituk a mahâm kaṭha hei mo!”

¹⁶Jesu’n ahnenga ati: “Pha khat a mi inkhat in revei kalentak inkhat aleitloa, mi katamtak aleibek hei.

¹⁷Khava revei thlaisâk sik pha a, ahmelâk-hei kabek sik a asōk-hei atir hei, ‘Heirakip mantluksō jo kae, hong jo ruh,’ tia anvamanthei hei.

¹⁸Tâk-kha ankhenga inkhat khat in inlepsōtna anjonga, hma inkeipenpa khan asōk hnenga, ‘Kei hlei inkhat karachôk, akase nger enga kava-en sik kae, arangei mandam pa roh,’ ati.

¹⁹Alak inkhatpa’n, ‘Ke’n sehrat kop 5 karachôk hei, aka-en manchên akase sik eng kae, arangei mandam roh,’ ati.

²⁰Ahlop inkhat in, ‘Kei lu kalahôngbi kae, achang jâra kei hongtor mak jo ning,’ ati.

²¹“Sōkpa kha inlea akapupa hneng hihei rakip hi ava manthei jo. Khava inn kapupa kha ahnuk kana joa asōk hneng ahri, ‘Hlampuia leh khōpui hlamsōa vase ina sara khōdeng kathei inreng invai hei, a’nhling theimak, kut leh ke katlek khana hmitkachohei inranga vaṭhōi hei roh.’

²²Inrangtak a sōk khan amasôn, ‘Apu, nahri dungjuia intlo jo, tâk tûnum omtheina innden katamtak lakarōk,’ ati.

²³Khava jâra a-Rōngpu khan asōkpa hneng, ‘Hlamlena leh vânga se ina, mihei vaṭhōi hei roh, ka-inn hi sip rasoh!

²⁴Ke’n kahri pek chei kae, ke’n hme kalâk-hei inkhatbek inum kabu ka-an mantem mak hei ning,’ ati.”

²⁵Vōi khat mipui katamtak Jesu leh inṭhōia leikase hei, ama inheia anhnenga aleihri,

²⁶“Tu enum kahnenga hongrong kati mi khan, anu-apa, anuhmei asa, a-u anai khana abinga ahringkhō hnung kasung achangmak inchu kasonle chang tor mak ning.

²⁷Khava anthingrake indoma kakahnung kajuimak mi kha kasonle chang tor mak hei ning.

²⁸“Nangni kâra mi inkhat in innphôr inshâng kasak sik a a’ntluk inchu, ahma inkeia a’n-onga atorna katlunga sêr kahlut sik hisâp asuktōa, atluk leh tlukmak sik kha a-en sik kae.

²⁹Khavakha na-en dekmak inchu, innhmun deng kha naphut a nachaitor mak jo’nchu, khava kahmu rakip in anmanuisō sik che.

³⁰‘Hiva mipa hin inn hi sak sik a aleiphut, tâk tlosōt tor mak jo,’ anti sik che.

³¹“Reng inkhat in aremi 10,000 aching hei leh a’nrepui sik a akahong rengpa remi 20,000 kha re a’ntukpui tor sik mo ti kha hmapena a’n-onga amandon sik kasōk.

³²Khana ama’n re a’ntukpui tor mak sik achang inchu, are intukpui sik rengpa kha hmun kahlajap a a-omlai, inbek incham theina akahri sik a mi atir sik kasōk.”

³³Jesu’n ṭong achaia, “Khava kapōa nannei rakip nandahlon mak inchu nangni tûte inkhatbek kasonle chang tor mak tin chei.

³⁴“Chi hi kaṭha, tâk chi kha a-êna asep jo’nchu, man-ê nôkna sik ahlam omak.

³⁵Khavakha ralei thai sik a leh hârbuk sik a’m hnemmak jo; inhlonsōt jo. Kōr nannei inchu rangei ruh!”