Read Komrem LUKE 15 Bible Online

LUKE 15 - Komrem bible

LUKE 15

¹Pha khat a ramsêr kaṭheihei leh mikaset-hei Jesu ṭonghri inngei sik a kahong hei.

²Phariseehei leh dân oja he’n inchok anphut a, “Hiva mipa hin mikaset-hei arahlâng heia thlai asâksap pui hei,” anti.

³Khava jâra Jesu’n hiva tekâk hi aleihri pek hei.

⁴“Nankâra mi inkhat in kemōng 100 aneia ankâra inkhat inhmang jo, nang in heimo natlo? 99 hei kha ram thōia nadahlon heia inkhat a’nhmang kha nahmu mak kârseng navajong lelea kae.

⁵A’nhmang kha nahmu pha, inpâk pum a nadâr chunga nahei kadoma kae.

⁶Khana inn naheitlung pha naṭhōnhei leh nakhō-navenhei nabek mantûp heia, ‘Kei inpâk hêr eng, kakemōng inhmang kha kahmu jo. A’npâk puiruh,’ nati!

⁷Kha leh in-anghrep a, malung thleng sik inngeimak kajathei 99 kanek a mikaset inkhat in amalung athleng jâra marvân chunga inpâkna ka-om chet sik ti hi ke’n kahri pek chei kae.”

⁸“Nuhmei inkhat in dangka 10 aneia dangka inkhat amanhmang inchu, amanu’n heimo atlo? Ama’n thaihmei adet a, a-innshung aphetpet a ahmu mak kârseng kaṭhadek a ajonga kae.

⁹Amanu’n ahmu pha aṭhōnhei leh akhō avenhei abek heia. ‘Kei inpâk hêr eng, kaser inhmang kha kahmu jo. A’npâk puiruh,’ ati.

¹⁰Kha leh in-anghrep a mikaset inkhat malung thleng jâra Pathen ngevahei inpâk hei ti hi ke’n kahri pek chei kae.”

¹¹Jesu’n abâna ahri nôk, “Mi inkhat in sapa 2 anei.

¹²Naipangpa khan apa hneng, ‘Apa, kachen sik karōi kha tûn apek jo roh,’ ati. Khava jâra anpa’n asa 2 hei chen sik sâm karōi kha asempek jo hei.

¹³Kani ṭhahrep sōa, naipangpa khan achen rakip kha a’njōra, sêr arôna, inn adahlon jo. Ram kahlatak a leikasea khana khan akanimak hringkhōa asêr kha ahmang sō jo.

¹⁴Anei rakip amanhmang sō jo. Khava pha ram a khan sâk hong kakhôk jo, khana ama’n heite leinei mak jo.

¹⁵Khava jâra ama khava ram a mi inkhat hneng ṭōn katloa vaka-oma, amapa khan avok kakhem sik aleitir jo.

¹⁶Ama’n vok thlaia be karahei vâng avon amankhop tor sik tia amandon, tâk tûte’n heite leipek mak hei.

¹⁷Achaina ama’n ahong manhret jo pha ati, ‘Kapa inna aminêk rakip he’n sâk inhleia annei, ke’nchu hin sâk kahngōia ka-om eng!

¹⁸Kei thōi eng sona kapa hnenga se jo rong khana vati rong, Apa, nang leh Pathen kadōia ke’n setna katlo jo.

¹⁹Nasapa inti sik a karahōi sōk mak jo eng; nang in nada hei sōk inkhat kapōa ahmang jo roh.’

²⁰Khava jâra apa hnenga a’nle sik a kathōi jo. “Ama inna inphut kahlajap a ahonglai apa’n aleihmu jo; alungset hêr joa ajōna asapa kha avamajôp a kae.

²¹Asapa khan aleiti, ‘Apa, nang leh Pathen kadōia setna katlo jo. Nasapa inti sik a rahōi changmak jo eng.’

²²Tâk-kha apa khan asōk-hei abek heia ‘Inrangtak a pōn kaṭhapen heilo una mansi ruh. Akut a kutkhi, akea kekōk mannei ruh.

²³Khana sehrat tere akathaipen vaṭhōi una that ruh, revei inkhat a nit rih!

²⁴Ajârchu hiva kasapa hi aleikathi jo kae, tâk tûnchu kahring jo; ama le’nhmang jo, tâk tûnchu inhmu nôk jo,’ ati. Khana revei kha inphut jo hei.

²⁵“Khava lai khan asa upapa chu hleia leikasea kae. Ama inna he’nlea innhneng aheiphâk pha, lâm leh khōng rasa athei jo.

²⁶Ama’n sōk-hei kâra inkhat abek a ‘Heijo mo?’ tia ader.

²⁷Sōk khan ahnenga, ‘Nanaipa inna he’nle jo, khana nanpa’n ama kadam senga ahmu nôk jâra rathla hōmna sehrat tere akathai inkhat athat kae,’ ati.

²⁸“Khava pha asa upapa kha ahnuk kana hêr joa inna hlutmak jo; khava jâra apa heikasōk a ahong hlutna sik a avamathlem.

²⁹Tâk-kha ama’n apa kha amasôna, ‘Enroh, kum hiseng sōk kapōa ṭōn kahei tlo jo, naṭong inkhatbek um juilo tlomak eng. Heimo napek jo eng? Kete inkhatbek um kaṭim kare hei leh revei tlona sik apek mak che!

³⁰Tâk-kha hiva nasapa, nanei rakip notijōrhei chunga akasu inhmangpa hi inna ahon’le pha chu sehrat tere kathai nathat pek a kae!’ ati.

³¹Apa’n aleimasôn, ‘Kasapa, nang chu ahei tik a kei leh inna aka-omsap ṭhak me kae, khana kanei rakip hi nata kae.

³²Tâk-kha nanaipa hichu aleikathi kha tûnchu kahring jo, khana ale’nhmang jo kha, tûnchu nihmu jo, khava jâra revei nitloa a’npâk sik me kae,’ ati.”