Read Komrem LUKE 16 Bible Online

LUKE 16 - Komrem bible

LUKE 16

¹Jesu’n asonlehei hneng ahri, “Pha khat a nei katinta sik sōk inkhat akanei, mikahao inkhat leika-om. Anei katintapa khan asêr ahmang mathlâng pek jo tia anleimantheia,

²ama’n abek a ader, ‘Naṭong kathei hi heimo kae? Kanei tintana hisâp rabu kha kakip a heichoi jo roh, nang hi kanei katinta inkhat changthei mak jo tin che,’ ati.

³Nei katintapa khan abinga inbek a, ‘Kakapu pa’n kei kaṭōn amanbâng sik jo eng, heimo katlo sik? Khur kacho sik leh kha ratha neimak jo eng, khana kut indoa der lele sik leh kha inzak eng.

⁴Tûnchu tlo sik kamanhret jo! Kaṭōn kabâng pha, mihe’n an-ina anmathlungna sik eng ṭhōn nei jo hei rong,’ ati.

⁵“Khava jâra akapupa nei kabat hei seng abek jo hei. Ama’n hma kakeipa hneng, ‘Kakapupa nei heija mo nabat?’ tia ader.

⁶‘Ama’n amasôna, ‘olive thai be 100 kae,’ ati. Nei katintapa’n ahnenga, ‘Nahisâp kha hin ka-om, in-ong ina 50 rōk mazet roh,’ ati.

⁷Ahlop inkhat hneng ama’n ader, ‘Nang in heija mo nabat?’ Ama’n, ‘Gehu bora 1,000 kae,’ ati. Nei katintapa’n ahnenga, ‘Nahisâp kha hin ka-om, 800 rōk mazet roh,’ ati.

⁸“Malung intheng mak nei katinta khan kasing tak a atlo jâra akapupa khan amanpâk jo; ajârchu hiva raleichung mihei hin khōvâr mihei kanek a rirûk a anṭōn anmatu heia kae.”

⁹Jesu’n ahrisa, “Khava jâra kahri pek chei kae: raleichung neivâng ṭhōn insyem ruh, sêr kha atlang pha kumsôt inna nang anleiratō sik che.

¹⁰Ṭōn kasintek chunga taksenthei mi kha ṭōn kalentak chunga’m taksenthei kae; Ṭōn kasintek chunga malung intheng mak mi kha ṭōn kalentak chunga’m malung intheng mak ning.

¹¹Khava jâra nangni’n raleichung nei nanhmangna rōk a’m taksenthei nanchangmak inchu, nei kadiktak nanhmangna chunga heikhong mo nganse thei akachang sik chei?

¹²Khana milak inkhat nei chunga taksenthei nanchangmak inchu, nangnihei karōi chen sik kha tu’n mo apek sik chei?

¹³“Mi inkhat in akapupa 2 sōk chang tor mak: ama’n inkhat alungset sik, khana inkhat a-enkada sik. Inkhat ṭong ajui sik, inkhat ṭong juimak ning. Pathen sōk leh sêr sōk akoptōa nangni chang tor mak chei.”

¹⁴Khahei seng kha Pharisee he’n anthei pha Jesu kha anlei enkada a kae, ajârchu sêr anmadua kae.

¹⁵Jesu’n anhnenga aleiti: “Nangni hi mi tahmu sik a nanbinga a’ndiksak hrep chei kae, tâk Pathen in nanmalung amanhret. Ajârchu mihring in kalentak a amandon kha Pathen hmit-hmua chu heite hnemmak.

¹⁶“Moses Dân leh sânkathemhei tamazet khan Tui Inhlutpa John pha katlunga ṭōn aleitlo; khana inphut chu, Pathen rengram chungchânga ṭōn kaṭha kha intheina hong ka-om jo; mi rakip khana khan hlutna sik rahnak antlo.

¹⁷Tâk-kha Dân ṭongrahme kasinpen inkhat a’nhmang sik kanek a marvân leh ralei a’nhmang sik kabei jôk.

¹⁸“Tu enum anuhmei kada a nuhmei hlop ka-ompui kha mikajông kae; khana mi inkhat tada jo nuhmei ka-ompui mi kha’m mikajông kae.

¹⁹“Pha khat a mikahaotak, pōn mankatam vâng a’nvona khana ani tina akahōi aka-êm ṭhak inkhat leika-om.

²⁰Khana Lazarus inti misara, ataksa pum a akapâtpet jo inkhat leika-om, ama mikahaopa kot kunga anheiṭhōi ria kae.

²¹Ama’n mikahaopa bu sâkbang dokhâng thōia akatla kha asâk a avon mankhop sik a le’ntluk.

²²“Sarapa kha kathi jo khana marvân ngeva he’n Abraham hneng marvân reveina hmun a anṭhōi jo. Mikahaopa kha’m kathi joa anvûm jo.

²³Ama hmeikhur shunga khōdeng katheitak a a-omna inphut ahong ena kahlatak a Abraham leh ahnenga Lazarus ka-om kha ahmu hei.

²⁴Khava jâra ama’n ahongbek a, ‘Apa, Abraham! alungset ina Lazarus in akutpâr kha tuia heiphûm sona kamalei hi avamanchor mandai pekna sik eng ahei tir pek roh, ajârchu hiva hmei kaluma hin kei khōdeng kathei rei jo!’ ati.

²⁵“Tâk-kha Abraham in ati, ‘Eh sapa, mandon roh, nang hringkhōa neinâk kaṭha rakip le’npek jo che, Lazarus in akaṭhamak rakip aleichen jo. Tâk-kha tûnchu ama kahōia hin ka-om jo, nang in khōdeng nathei joa kae.

²⁶Khava chung nôk a, hintinga inphut nang omnating rakan sik a indu hei, khana nang omna tinga inphut hinting rakan indu hei tûte’n anrakan thei makna sik, nikâra kōk inthûktak inkhat ka-om.’

²⁷Mikahaopa khan ati, ‘Khan chu Apa Abraham! Lazarus kha kapa inna atir pek roh,

²⁸son sōpui 5 kaneihei anmani hiva khōdeng theina hmun hin anhong makna sik rōk a avahri pek rasoh.’

²⁹“Abraham in ati, ‘Nasōpui he’n Moses leh sânkathem annei hei, anmani tahri kha antarangei sik kae.’

³⁰Mikahaopa khan amasôna, ‘Apa Abraham, kharōk khan chu tlukmak a kae! Mi inkhat akathia inphut athōisōt a anhnenga avase’nchu anmalung anthleng sik,’ ati.

³¹Tâk-kha Abraham in ati, ‘Anmani’n Moses leh sânkathemhei ṭong anrangei mak inchu, thina inphut mi inkhat athōisōt inum manse tor dekmak hei ning.’”