Read Komrem LUKE 18 Bible Online

LUKE 18 - Komrem bible

LUKE 18

¹Khava sōa anmani’n malung tlâklo hêra ahei tik a anderna sik Jesu’n hiva ṭong tekâk hi amanthei heia kae.

²Jesu’n ahri, “Khōpui inkhat a Pathen kaṭitmak, mihe’m kajana kaneimak, ṭongkatan inkhat leika-om.

³Khava khōpuia khan renghmeinu inkhat leika-om, amanu kha ṭong katanpa hneng kahong ṭhak a ama inhrung theina sik a avahri, “Ani ka-en kada heia inphut ahuk roh!” ati.

⁴Pha bongkhat chu leihnōm pek mak; tâk hnunga chu ama’n amandona, ‘Ke’n Pathen kaṭitmak a heitea kasak mak inum,

⁵hiva renghmeinu hin akachok ṭhak jo eng adikna kha achenna sik enpek jo parong, kha achangmak inchu kahong ṭhak sik a kha thōktor mak jo ning,’ ati.”

⁶Khana Rōngpu khan ahrisa, “Akadik mak ṭongkatan pa’n ahri kha rangei ruh!

⁷Tûn Pathen mihe’n sûn leh jân inthōpuina sik a akaṭap hei kha donloa ada sik hei mo? Anmani inthōpuina sik ama a’n-êng sik mo?

⁸Ke’n kahri pek chei kae, ama’n anmani hukna sik ṭong atan sik khana inrangtak a atlo sik. Tâk-kha, Mihring Sapa kha ajōng pha leh raleichunga akataksen mi ahmu sik hei nâk mo?”

⁹Anbinga mikadik a a’nhlamrin hei, milak chu heitea kateimak hei hneng um Jesu’n hiva ṭong tekâk hi ahri nôk:

¹⁰“Mi 2 akader sik a bek-inna kase hei, mi inkhat kha Pharisee kae, inkhat kha ramsêr kaṭhei kae.

¹¹“Pharisee kha abinga inkârjap a kangira hinga ader, ‘Pathen kamanpâk che, kei milak-hei kapōa akajông, akadik mak, mihei kapōa phâmrai kase changmak eng, kamanpâk che ti chu kei hi sosonna aka-om ramsêr kaṭheipa kapō’m changmak eng.

¹²Kani vekhat a vōi 2 thlai kahngōi, kanei rakip sem sôm kapek a kae,’ ati.

¹³“Tâk-kha ramsêr kaṭheipa kha kahlajap a kangira marvânting kapha’m ahmai mahe tor loa, a-ôp akabena, ‘Pathen, kei mikaset eng kae, aheilungset roh!’ ati.

¹⁴Jesu’n ati, “Ke’n kahri pek chei kae, Pharisee changloa, ramsêr kaṭheipa kha a-inna a’nle pha Pathen hneng dikna achen jôk a kae. Ajârchu, binga a’nchoi inshâng rakip kha insu-inhnem sik, tâk binga a’nsinsak rakip kha choi manshâng sik kae.”

¹⁵Mi ṭhahrep in naipanghei Jesu’n anchunga akut adapek sik a anheiṭhōi hei. Sonle he’n anhmu heia anleirasei hei,

¹⁶tâk Jesu’n naipanghei kha ahnenga abek heia ati, “Naipanghei kha kahnenga heimanhong hei ruh, khâm mak hei ruh, ajârchu Pathen Rengram kha hiva kapō hei chen kae.

¹⁷Hivahi mandon ruh! Tu enum hiva naipanghei inkhat kapōa Pathen Rengram inhlângmak mi kha khana khan hlut hêrmak ning.”

¹⁸Jehudi hlamkakei inkhat in Jesu ader, “Oja kaṭha, kumsôt hringna kachen theina sik heimo katlo sik?

¹⁹Jesu’n ahnenga ati, “Heisa mo akaṭha nati eng? Pathen teilo tûte akaṭha om mak.

²⁰‘Jông mak roh, mi that mak roh, inru mak roh, maleisei sâkhi tlomak roh, nanu napa kaja roh,’ ti ṭongpek-hei kha namanhret a kae,” ati.

²¹Mipa khan amasôn, “Hiseng hi kasinlaia inphut kahei jui jo hei kae.”

²²Jesu’n kha athei pha, ahnenga, “Nang in natlo sik inkhat alavât; nanei rakip vajōr ina, nasêr kha sara khōdeng katheihei vasempek hei roh, khan chu marvâna karōi nanei sik, khana hong ina kakahnung ajui roh,” ati.

²³Tâk-kha ama’n kha athei pha amalung inrim jo, ajârchu ama mikahaotak inkhat kae.

²⁴Jesu’n amalung inrim kha ahmu pha ati, “Mikahao he’n Pathen Rengram anhlut sik hi heituk a a’ntak jo mo!

²⁵Mikahao inkhat Pathen Rengram ahlut sik kanek a ṭimphōi kōr a sharîngsei ahlut sik kabei jôk.”

²⁶Aṭong kathei mihei khan ahnenga ander, “Khan chu tu hmen hukmanhring akachang tor sik?”

²⁷Jesu’n amasôn hei, “Mihring sik a akae tor mak kha Pathen sik a tlohla heite om mak.”

²⁸Khava pha Peter in ahri, “Enroh keini’n kan-inn kandahlona nakahnung kanjuia kae.”

²⁹Jesu’n anhnenga, “Kadiktak a hi kahri pek chei kae. Tu enum Pathen Rengram sik jâra a-inn, anuhmei, asōpui, anu, apa, asahei kadahlon mi khan

³⁰tûnlai pha hin akatamchet ahmu sik, khana alakahong sik kum a kumleikōa hringna kha ahmu sik kae,” ati.

³¹Jesu’n sonle 12 hei ahlop a aṭhōi heia ati, “Rangei ruh! Mihring Sapa chunga sânkathem talei mazet rakip huitlungna sik hmun Jerusalem kajōna eini akase sik me kae.

³²Ama Jât-hlop hei kut chunga anpek sōt sik, anmani’n sem tlona annei sik, anmachi thlōn sik.

³³Anmani’n anvōk sik a kha anthat sik, tâk ni 3 ning ama akathōisōt sik a kae.”

³⁴Sonlehei khan hihei seng hi heite leimanhret mak hei; khava ṭong inhri kha anmani hneng a’n-ip achang jâra, Jesu’n ahri ṭong kha anmani’n leilothei mak hei.

³⁵Jesu Jericho hnenga kahonga, hlampanga kut indo hmitkacho inkhat le’n onga ka-om.

³⁶Mipui anhong kha athei pha ama’n ader hei, “Heijo mo?”

³⁷Anmani’n ahnenga, “Nazareth Jesu akahong kae,” anti.

³⁸Khana ama’n a-ôna, “David Sapa, Jesu! Kei alungset roh!” ati.

³⁹Ahma aka-om mihei khan anrasei, “Sip katia omhnâm roh.” Tâk-kha ama’n inhnakchet a a-ôna, “David Sapa, kei alungset roh,” aleiti.

⁴⁰Khava jâra Jesu kangira hmitkachopa kha ahnenga anta heiṭhōi sik a ṭong apek hei. Ama anhnenga ahong pha, Jesu’n ahnenga,

⁴¹“Heimo katlo pek sik che namadu?” Ama’n amasôn, “Apu, ke’n khō kahmu hnōm nôk.”

⁴²Khava pha Jesu’n ahnenga ati, “Khō hmu jo roh; nataksen in amandam jo che.”

⁴³Khavatak a khō ahmutor jo khana ama’n Pathen amanpâk a, Jesu kahnung ajui jo. Mipui he’n kha anhmu pha, ankhenga Pathen anchoi ka-ân jo.