Read Komrem LUKE 19 Bible Online

LUKE 19 - Komrem bible

LUKE 19

¹Jesu Jerichoa khanga kasea kathleng thang jo.

²Khana khan ramsêr kaṭhei kalenpen arahming Zacchaeus inti mikahaotak inkhat leika-om.

³Ama’n Jesu kha tu achang hmu nger rong tia aleimandon, tâk ama kha mi kasin inkhat leikae khana mipui kâra inphut Jesu kha leihmu tor mak.

⁴Khava jâra Jesu hmuna sik a mipui hma leikatlâna anhongna sik hlampanga theipōng kung inkhat chunga leikake jo.

⁵Khana Jesu’n khava hmun kha aheiphâk pha, a-entoua ahnenga, “Eh Zacchaeus! inranga jōng ṭum roh, ajârchu tuning kei na-inna akatlung nger sik eng kae,” ati.

⁶Zacchaeus inrangtak a jōng kaṭuma, inpâktak a ama aralama kae.

⁷Akahmu mi rakip kachōr inphut heia, “Ama mikase inkhat inna akatlung sik a kase jo,” anti.

⁸Zacchaeus kangirsōt a Rōngpu hneng, “Enroh, apu, ke’n kanei aṭim sarahei kapek sik, khana ke’n mi inkhat nei dik loa kaleilo a-om inum aja 4 a kamale sik,” ati.

⁹Jesu’n ahnenga ati, “Tuning hiva innshunga hukmanhringna jōng katlung jo; ajârchu hiva mipa hi’m Abraham sōn inkhat kae.

¹⁰Mihring Sapa kha a’nhmanghei kajong leh kahuk sik a akajōng kae.”

¹¹Mihe’n aṭong kha anlei rangeilai Jesu’n tekâk inkhat ahri pek hei. Tûnchu ama’n Jerusalem aphâkvet jo, khana anmani’n Pathen Rengram kha a’nlârbei sik joa anleimandona kae.

¹²Khava jâra ama’n ati, “Pha khat a phung kalen mi inkhat leika-om; ama kha ram kahlatak a reng hmun kalo sik a leikase, khava sōa ahong inle sik a le’ntluk.

¹³Ama ase mak hma asōk 10 abek heia sana sêr cheng khat et apek hei, anhnenga, ‘Kasesōt shunga hivahin invei theina lei-en ruh,’ ati.

¹⁴Tûnchu, ama mikhet he’n anleihōt jo, khava jâra reng hmun kapek sikpa hneng tirle antira, ‘Ama kanreng kachang sik a madu mak ung’ anva manti jo.

¹⁵“Akinna mipa kha reng inkhat a hong inle jo. Khavatak a asōk-hei anhong inlârna sik ṭong apek jo hei, heija sâm mo antamanpung manhretna sik a kae.

¹⁶Hma inkeipa kahonga ahnenga, ‘Apu, ke’n 10 kaman pungsa,’ ati.

¹⁷Ama’n ahnenga, ‘Kaṭha natlo jo, nang sōk kaṭha che kae! Neinâk katlômtek chunga nang taksenthei nachang jâra, khōpui 10 chunga vai kamanrôn sik che,’ ati.

¹⁸Sōk 2 tluknapa kahonga ahnenga, ‘Apu, nang in napek eng vâng khan sana chêng 5 kaman pungsa’, ati.

¹⁹Hivapa hneng hin ama’n ati, “Nang in khōpui 5 chunga vai narôn sik kae.”

²⁰“Sōk ahlop inkhat kha kahonga, ‘Apu, napek eng sêr kha pōnhar vâng kakhit a kathup; hin ka-om.

²¹Nang kaṭit che, ajârchu mi kakhôk inkhat che kae. Nata kachangmak kha nang in nachom, khana navormak kha nang in na-ât,’ ati.

²²Ama’n ahnenga: ‘Sōk kaṭhamak nang, nabeisō khet ṭong vânga khan kamaset sik che kae. Nang in mi kakhôk kachang namanhret, kata kachangmak kachom, kavor mak ka-ât namanhret.

²³Kha achang inchu kaṭha jo, heisa mo kasêr kha sêr dana bank a nava damak? Naleida achang inchu kei kahe’nle pha hin athōi leh kahmu sik kae,’ ati.

²⁴“Khava pha anhnenga akangir hei hnenga ama’n, ‘Ama hnenga sana sêr chêng khat kha lo una 10 kaneipa hneng pesa ruh,’ ati hei.

²⁵Anmani’n anhnenga anmasôna, ‘Apu, ama chu 10 aneidek jo kae!’ anti.

²⁶Ama’n amasôn hei, ‘Ke’n kahri pek chei kae tu achang inum akanei mi kha a’npesa sik kae, tâk akaneimak mi kha ajingte anei kapha kha’m a’nlosōt pek sik kae.

²⁷Tûn ke’n reng kachang sik ani-indumak kakadōi hei kha hin kahmai kunga heiṭhōi hei una that hei ruh,’ ati.”

²⁸Jesu’n kha ahrisōa anhma Jerusalemting leikase jo.

²⁹Ama’n Bethphage leh Bethany hneng aphâkna sik ahnai jo pha Olive Tlânga asonle 2 anhma atir heia

³⁰ṭong aleimanthei hei, “Nanhma khōa son se ruh; nangni nanhlut lim leh, tûte talachōng mak shakōrtungte inkhat a’nkhit nanhmu sik. Vasōt una hin heiṭhōi ruh.

³¹Khana mi’n, ‘Heisa mo nantasōt’ anti chei inchu, ‘Rōngpu’n hmang hnōmna anei,’ ti ruh,” ati hei.

³²Anmani kase heia Jesu’n ahri pek hei kapōa heirakip anmani’n anvahmua kae.

³³Anmani’n shakōrtungte kha ansōt pha, akapupa’n, “Heisa mo nantasōt?” ati hei.

³⁴Anmani’n anmasôn, “Rōngpu’n hmang hnōmna anei,” anti.

³⁵An-mani’n Jesu hneng anṭhōi jo. Khana anmani’n shakōrtungte chunga anpōn anpha a Jesu achunga anmanchōng jo.

³⁶Khanga achōng pha hlam a anmani’n anpōn anphapek a kae.

³⁷Ama’n Jerusalem ajōn manhnai jo pha, Olive Tlânga jōng ṭum sukna hlam a inphut asonle mi katamtak in aṭōn kalen tlohei rakip anhmu jâra rasa inhnaktak a Pathen manpâkna leh ama choi ka-ânna anphut jo:

³⁸“Rōngpu rahminga akajōng rengpa kha Pathen in mahâmṭhat pek rasoh! Marvâna mōngna om rasoh khana Pathen kha chunghnung pena lûrṭhak rasoh,” anti.

³⁹Khava sōa mipui kâra Pharisee ṭhahrep in Jesu hneng anhei hri, “Oja, nasonlehei hi andai hngerna sik rakôk hei roh!”

⁴⁰Jesu’n amasôn hei, “Anmani andai hnger inchu, hlunghei hi ahong ka-ôngsōt sik hei kae.” ati.

⁴¹Ama’n khōpui kha ahei hnai jo, aheihmu pha ṭajai asuikhum jo,

⁴²hinga ati, “Tuning hin lungmōng chenna sik a heimo arangei kha namanhret inchu nu! Tâk-kha nang in khahei kha hmutor mak che.

⁴³Nare he’n nakimvea ankakurkhum sik che, nahlam rakip ankhâr sik a kha rekur antuk khumna sik che kani alajōng katlung sik kae.

⁴⁴Anmani’n nang leh nakur bang shunga ka-om mi seng ansuksetpet sik; hlung inkhatbek um a-omna hmun a khan indahlon mak ning, ajârchu nakahuk inhring Pathen ajōngna sik pha leimanhret mak jo che.”

⁴⁵Jesu Bek-inn shunga kahlut a, neinâk kajōrhei kha hnongsōt aphut jo,

⁴⁶anhnenga ati, “Pathen in aleihri kha ṭong inthenga hinga inzet, ‘Ka-inn hi derna inn a’nti sik kae. Tâk-kha nangni’n inruhei inthupna khur nanmanchang jo!’”

⁴⁷Jesu’n ani tina Bek-inna aleimanthei hei. Thempu kalenhei leh Dân ojahei, khana hlamkakei he’n ama anleithat hnōm jo,

⁴⁸tâk khava tlona sik hlam leihmu tor mak hei, ajârchu mi rakip in aṭong hri kha rahme khatbek manhmang loa anlei rangeia kae.