Read Komrem LUKE 2 Bible Online

LUKE 2 - Komrem bible

LUKE 2

¹Augustus Rengkalen changlai Roman Rengram shunga mi rakip mija mazet manhlutna sik ṭongpek inkhat aleinei.

²Hiva ahma inkeipen mija teina hi a-om pha, Syria ram a vaikarôn kha Quirinius leikae.

³Mi rakip ama ama khōpui et a rahming kakhum leikase hei.

⁴Joseph Galilee ram a Nazareth khōpuia inphut Judea ram a Reng David intetna Bethlehem kajōna leikase. Joseph hi David sōn achang jâra khana khan aleikase kae.

⁵Ama’n a-ompui sik a aṭong intep puinu Mary leh rahming kakhum le’nṭhōi hei. Amanu achung leikahrik jo,

⁶Anmani Bethlehema antlung pha, Mary sik a nai neina sik pha katluk jo.

⁷Khana ahma inkei sapase inkhat amatet jo, pōn vâng akatōma ranthlai sâkna shunga amanje jo, anmani sik hme tlungna inn leirōk mak a kae.

⁸Khava ram a khan hleipuk a kemōng kakhem he’n jân a ankemōng anhngâk a leika-om hei.

⁹Anhnenga Rōngpu ngeva kha jōng inlâra, Rōngpu lûrna khan anchunga ara-âng manvâr hei. Anmani kaṭihêr jo hei,

¹⁰tâk ngeva khan anhnenga ati, “Ṭimak ruh! Mi rakip sik a inpâkna kalentak ṭong kaṭha kha kajōng rôn pek chei.

¹¹Tuningtak hin David khōpuia nankahuk inhringpa Christa Rōngpu kha jōng inte jo.

¹²Nangni chîkna sik kha hi kae: naite inkhat ranthlai sâkna shunga pōn vâng antakatōma antamanje nanvahmu sik.”

¹³Khava laitak khan manhret manloa marvân ngeva remi katamtak khava ngeva kha leh jōng inlâr heia, Pathen choi ka-ânna hla hi ansak:

¹⁴“Marvân chung inshângpena Pathen kha lûr rasoh, khana raleia amalung tlaina mihei chunga lung mōngna kha om rasoh!”

¹⁵Marvân ngevahei kha marvânting an-inlesō pha, kemōng kakhemhei kha inkhat leh inkhat inbe hei, “Eini Bethlehema vase rih, Rōngpu tamanthei me omchen kasōk hei hi va-en rih.”

¹⁶Khava jâra anmani inrangtak a kase heia Mary leh Joseph khana naite ranthlai sâkna shunga pōn vâng a’ntōm kha anvahmu hei.

¹⁷Kemōng kakhemhei khan ama anhmu pha, ngeva’n naite chungchânga aleihri hei kha anmanthei jo hei.

¹⁸Khanga kemōng kakhemhei ṭonghri kathei rakip in anmandon-hla et jo.

¹⁹Mary in khavahei seng kha amalunga avon ṭhak hei khana khahei chunga inritak a mandonna anei hei.

²⁰Ngeva’n ahri pek hei kapōa antahmu leh antathei hei seng jâra khan kemōng kakhemhei khan Pathen manpâkna hla ansak a inle jo hei.

²¹Kani vekhat sōa, naite kha vuntan sik ahongtluk jo pha, shunga avon mak hma ngeva’n aleihripeksa rahming, Jesu tia anphō joa kae.

²²Moses Dân ṭongpek dungjuia mantheng sōtna nunchen katlo sik Joseph leh Mary sik a pha kha hong katluk jo. Khava jâra anmani’n naite kha Jerusalema Rōngpu hneng tōk sik a anṭhōi jo,

²³Rōngpu dân inzet dungjuia: “Hma inkeipena a’nte pase rakip Rōngpu hneng tōk sik kae.”

²⁴Rōngpu dân dungjuia, vaṭhu 2 a-emak leh phervate 2 akatōk sik a anmani leikase hei.

²⁵Khava pha pase inkhat arahming Simeon inti Jerusalema leika-om. Ama Pathen kaṭit mikaṭha, Israelhei hukmanhringna sik ahngâk a aka-om inkhat kae. Rathla Intheng in ale’nṭhōipui

²⁶khana Rōngpu ṭongtep Messiah kha ahmu mak kârseng akathimak sik a aleihri manchên pek.

²⁷Rathla Intheng in hlam akeia, Simeon kha bek-inn shunga leikahlut jo. Khana naite Jesu sik dân tamadu omchen katlo sik a anu leh apa’n Bek-inn shunga anheiṭhōi manhlut pha,

²⁸Simeon in naite kha akut vâng apoma Pathen achoi ka-ân:

²⁹“Rōngpu tûnchu naṭongtep kha namathluk jo, nasōk malung kamōnga namasōthei sik jo eng.

³⁰Kahmit khet in nahuk manhringna kha kahmu jo,

³¹nang in mihring rakip hei hmaikunga naleimantluk kha:

³²Jât-hlop hei hnenga nahlam malârna sik vâr inkhat, khana nami Israelhei lûrna kapek sik kha hi kae.”

³³Naite chungchânga Simeon ṭonghri kha apa leh anu’n anmandon-hla joa kae,

³⁴Simeon in mahâmṭhat apek heia Mary hneng ati, “Hiva naite hi Israel mi katamtak hei insuksetna leh hukmanhringna sik a Pathen takadei kae. Mi katamtak he’n achunga dōina ṭong antahri sik leh anlungria marûk a antamandon hei kaphôngsōt sik a

³⁵Pathena inphut mêrchîkna inkhat akachang sik kae. Khana inrimna khan chemjâm kangeijap kapōa namalung akadôt sik kae.”

³⁶Khava hmun a Asher phung hruia Phanuel sanu arahming Anna inti sânkathem kater renghmeinu inkhat leika-om. Ama’n kum 7 rōk puise aneia atûn kum 84 katluk jo. Amanu’n Bek-inn kha dahlon phung hêrmak; sûn leh jân Pathen akamukṭhak, buhngōi leh derna aneiṭhak a kae.

³⁷

³⁸Khava laitak amanu hong katlunga, Pathen achoi ka-âna, Pathen in Jerusalem akatlensōt sik kahngâk-hei hneng naite chungchâng ṭong kha ahria kae.

³⁹Rōngpu dân dungjuia tlohlam kasōk seng kha anmani’n anchai jo pha, Galilee ram a an-inn omna Nazareth khōpuia inle jo hei.

⁴⁰Naite kha hong kakhanga aratha hong kangara, singna kasip phet a, Pathen mahâmṭhatna khan a’nthōpui ṭhak a kae.

⁴¹Akum katai Jesu nu leh pahei kha Rakan Kût pha Jerusalema kase ṭhak hei.

⁴²Jesu kum 12 atluk pha anngaia Rakan Kût a vakase hei.

⁴³Rakan Kût kha a’nchai pha anmani an-innting he’nle jo hei. Tâk-kha naipang Jesu khachu Jerusalema anleidahlon jo. Anu leh apa’n hivahi leimanhret mak hei.

⁴⁴Ama aloihei kâra le’nvei sik tia anleimandona, sûn nilun khanga kase jo hei, anmani’n an-innkōhei leh anṭhōnhei hneng anjong jo.

⁴⁵Anmani’n anhmumak jo pha, akajong sik Jerusalema inle jo hei.

⁴⁶Ni 3 tlûk ning Bek-inn shunga Jehudi ojahei kâra a’ntunga, arangei heia ṭong ader hei kha anvahmu sōt a kae.

⁴⁷Ama’n kasing tak a ṭong amasôn hei kha akathei rakip in anmandon-hla joa kae.

⁴⁸Anu leh apa’n anhmu pha, anmandon-hla a anu’n ahnenga, “Kasapa, heisa mo keini hneng hinga natlo? Napa leh ke’n nang malung inrimtak a kantajong che kae,” ati.

⁴⁹Ama’n amasôn hei, “Heisa mo nangni’n kei nantajong eng? Kei kapa inna ka-om sik hi manhret mak chei mo?”

⁵⁰Tâk-kha ama’n heimo ahrina ti anmani’n leimanhret mak hei.

⁵¹Khava jâra Jesu’n anu leh apa ṭong ajuina hmun Nazareth khōa anmani leh inṭhōia inle jo.

⁵²Khana Jesu kha taksa leh singna kakhanga, Pathen leh mihring lungsetna achen a kae.