Read Komrem LUKE 20 Bible Online

LUKE 20 - Komrem bible

LUKE 20

¹Jesu’n ni khat Bek-inn shunga Ṭong Kaṭha kha amanthei heia ahrilelai, thempu kalenhei leh Dân ojahei khana upahei inchun a kahong heia,

²ahnenga anhonghri, “Hivahei tlotheina sik heiratha mo nanei, amanthei roh? Hiva ratha hi tu’n mo apek che?”

³Jesu’n amasôn heia, “Tûn ke’n ṭong inkhat der chei rong. Amanthei ruh,

⁴John tui manhlutna ratha kha mihringa inphut mo a-emak leh Pathena inphut mo?”

⁵Anmani anbing rōk a ankâra inbe heia, “Heimo niti sik? ‘Pathena inphut’ niti’n leh kha, ama’n ‘Khan chu John kha heisa mo nanta taksen mak?’ ati sik me.

⁶Khana ‘Mihringa inphut’ niti’n leh kha, hinna ka-om mipuihei hin eini hlung vâng andenghlon sik me, ajârchu John kha sânkathem inkhat kae, ti hi anmani akahnōm et hei kae.”

⁷Khava jâra anmani’n anmasôna, “Ama khona inphut akajōng mo ti keini’n manhret mak ung,” anti.

⁸Khana Jesu’n anhnenga, “Ke’num heiratha neina vâng hihei hi katlo mo ti hrimak ning,” ati.

⁹Khana Jesu’n mihei hneng hiva tekâk hi aleihri, “Mi inkhat vomhrui thei rahōn inkhat arahōna, khava thei rahōn kha mihei hneng asânsōt a, khava pha ama’n a-inn kha adahlona kase jo.

¹⁰Vomhrui thei kha alōk pha ahongtluk jo pha, ama chen kalo sik a asōk inkhat aleitir jo. Tâk-kha thei rahōn kasânhei khan sōkpa kha anleivōk a heite pek loa antir male jo.

¹¹Khava jâra ama’n sōk ahlop inkhat atir nôk a kae, tâk thei rahōn kasânhei khan ama’m anleivōk a, rahe kasetak a anleitloa, heite pek loa antirsōt jo.

¹²Khava pha ama’n sōk 3 tluknapa kha atir nôk a, thei rahōn kasânhei khan ama’m sungbi anleimanrôna, vângting anleihlonsōt jo.

¹³Khava pha vomhrui thei rahōn kapupa khan ahri, ‘Heimo ke’n katlo sik jo? Kasa hi tir jo rong, anmani’n soiloa ama hichu anleikaja sik!’ ati jo.

¹⁴Tâk-kha rahōn kasân he’n anhmu pha, inkhat leh inkhat inbek hei, ‘Ama hi rahōn kapupa sapa kae. Ama hi that jo rih, khana akarōi rakip einita kachang sik jo,’ anti.

¹⁵Khava jâra rahōn vângting anhlonsōt a anthat jo. “Khan chu, vomhrui rahōn kapupa khan anmani heimo amanlo sik jo hei?” Jesu’n ader hei.

¹⁶“Ama kahong sik khana mihei kha athat sik hei, khana vomhrui rahōn kha mihlop hneng asânsōt sik jo,” ati. Mihe’n kha anthei pha, “Kha changmak ning!” anti.

¹⁷Jesu’n anmani a-en heia ader hei, “Enchu, hiva ṭong intheng hi heitina mo? ‘Inn kasak he’n hnemna kase tia antahlonsōt hlung kha akarôn pen chopui kha kachang jo.’

¹⁸Khava hlung chunga a’npai inthlûk rakip ahar-ahak a insukset sik, khana hlung khan tu mo inkhat chunga adehlon inchu vaiphin kapōa asuk mannōi sik a kae,” ati.

¹⁹Dân ojahei leh thempu kalen he’n khava laitak a khan Jesu surna sik anmandona kae, ajârchu anmani dōina tekâk kha ahri kae ti anmanhret jo; tâk mipuihei kha anleiṭit heia kae.

²⁰Khava jâra pha kaṭha anleihngâk a kae. Anmani’n mi ṭhahrep malung intheng inhlemsak sik a marûk a sêr anleipek hei, khana Jesu kha ratha kanei Rome vaikarôn kut a pek sōt theina sik ṭongderna vâng aṭhena akasursōt sik anleitir hei.

²¹Anmitir hei khan ahnenga ander, “Oja, nang in nahri leh namanthei hei hi akadik kae. Khana mi hmai kajalo jen a, ôtum kasea Pathen lungdo chunga akadik kha namanthei hei ti keini’n kanmanhret.

²²Rome Rengkalen Caesar ramsêrṭhei pek sik leh pek mak sik hi nidân kadōi me mo kae? amanthei roh,” anti.

²³Tâk-kha Jesu’n anmani lungthim tlo kha amanhret a, anhnenga ati,

²⁴“Sêr inkhat amanhmu ruh, hiva chunga hin tu lim mo khana tu rahming mo a’nzet?” ati hei. Anmani’n, “Rengkalen Caesar ta kae,” tia anmasôn.

²⁵Ama’n anhnenga, “Chu achang inchu Caesar tâ kha Caesar hneng pek ruh, khana Pathen tâ kha Pathen hneng pek ruh,” ati hei.

²⁶Khava mihei hmaikunga khan chu heikhat bek a leisur tor mak jo hei, aṭong masôn hei kha andet-hla joa sip anleiti jo.

²⁷Sadducee ṭhahrep, thina inphut thōi nôkna omak kati loihei, Jesu hneng kahong heia anhri,

²⁸“Oja, keini sik Moses’n hiva dân hi aleimazet: ‘Mi inkhat in nuhmei inkhat aleineia sa neiloa athi dea adahlon jo’nchu, asōpuipa khan, asōpui akathipa sa kae ti a’nhret thei sik a, sa amanneina sik nuhmei kha a-ompui nger sik kae.’

²⁹Pha khat a unai sōpui pase 7 leika-om hei, upapen khan nuhmei inkhat anei jo, khana sa neiloa ama kathi jo.

³⁰Khava sōa 2 tluknapa leh 3 tluknapa khan,

³¹nuhmeinu kha abân bâna an-ompuia 7 hei kha in-ang et a sa neiloa khanga kathisō jo hei.

³²Achaina pena nuhmeinu kha’m kathi jo.

³³Tûnchu, thōi nôk ning amanu kha tupen nuhmei mo akachang sik jo? Amanu leh kha pase 7 he’n anta-ompui et kae!”

³⁴Jesu’n amasôn hei, “Hiva khanga hin pase leh nuhmei ka-om hei,

³⁵Tâk-kha akajōng sik khang shunga akahring sik a, thina inphut a akathōisōt sik rahōi kasōk pase leh nuhmeihei khachu lu hôngmak hei ning.

³⁶Anmani marvân ngeva ka-ang sik hei khana thithei mak hei ning, Pathen sahei kae ajârchu thina inphut akathōi jo hei kae.

³⁷Moses’n akathihei kahringa kathōisōt sik hei ti hi inthengtak a amanchêna kae. Thingbura hmei kasûk ṭong inzetna khan ama’n Rōngpu kha, ‘Abraham Pathen, Isaac Pathen, Jacob Pathen kae,’ ati.

³⁸Ama hi akahring hei Pathen kae, akathihei Pathen changmak, ama hneng chu mi rakip akahring hei kae.”

³⁹Dân oja ṭhahrep in anhrisōt, “Oja, ṭong masôn kaṭhatak inkhat kae.”

⁴⁰Ajârchu anmani’n Jesu kha kangamtak a ṭong dertor mak jo heia kae.

⁴¹Jesu’n ader hei, “Messiah kha David sōn kae, heikhong mo a’nti thei sik?

⁴²Ajârchu David khet in hlarabu shunga hinga ahri, ‘Rōngpu khan ka-Rōngpu hneng ahri: Na’ndōipui hei nake chōnpha a kadamak kârseng

⁴³Kachangting hin in-ong roh.’

⁴⁴Khang’khan David in, ‘Rōngpu,’ ati’nchu, heikhong mo Messiah kha David sōn akachang thei sik?”

⁴⁵Mipuihei seng in aṭong hri kha anrangeilai, Jesu’n asonlehei hneng aleihri,

⁴⁶“Dân ojahei, anzakkō inse annei pum a akalôn hnōm hei, jōrtlâng hmun a mihe’n kajana chibei antapek sik a indu hei, khana intûpna innpui leh reveina hmun a in-ongna kalûrpen indu heia inphut insing thei ruh;

⁴⁷anmani’n renghmeinu hei inn leh annei anchom pek hei, mihei tahmu sik a kasôt tatak a derna annei! Anmani karâkna chen sik kha akakhôk pen sik kae.”