Read Komrem LUKE 21 Bible Online

LUKE 21 - Komrem bible

LUKE 21

¹Jesu’n a-en manve heia Bek-inn shunga sêr manbukna mikahao he’n kutchoi antamathlâk kha ahmu hei,

²khana sara khōdeng kathei renghmeinu in peisa 2 amathlâk kha aleihmu.

³Ama’n ati, “Ke’n kahri pek chei kae, milak-hei seng tapek kanek a hiva renghmeinu tapek hin aja katam jôk.

⁴Ajârchu milak he’nchu akatam anneina shunga inphut anṭhensōt a antatōk kae; tâk amanu hinchu asara changa ahringna shunga aneiseng kha apek kae.”

⁵Anmani kâra mi ṭhahrep khat in Bek-inn chungchânga anhria, Pathen sik a kutchoi pek hei leh hlung inne inkam hei hi heituk-hrep a akaṭha jo hei mo anti. Jesu’n ati,

⁶“Nangni’n nantahmu hlung rakip inkhatbek an-omna et a sukset loa indahlon mak ning; inkhat et a suk mathlâk sik hei kae.”

⁷Anmani’n ahnenga anhri, “Oja, khavakha heitik leh mo ajōng katlung sik? Khana khavakha asōk sik ting hei mêrchîkna mo aka-om sik?”

⁸Jesu’n ati, “Nangni mihe’n anhōn mathlâk makna sik chei insing thei ruh. Ajârchu mi katamtak in kei sik a ṭongkahri ung antia kahong sik hei, ‘Kei ama eng kha kae,’ khana, ‘Apha jōng katlung jo,’ anti sik.

⁹Tâk-kha juimak hei ruh; ajârchu khavahei kha hma inkeia ajōng kasōk nger sik kae; tâk khavakha pha a’nchaina lachang mak ning.”

¹⁰Khava sōa ama’n ahri nôk, “Ram inkhat leh ram inkhat, rengram inkhat leh rengram inkhat re intuk sik hei.

¹¹Lingnu inhnaktak a innok sik, sâk kakhôk sik, natse hmun rakip a kasōk sik, ṭit ka-omtatak leh hme inlak bōirōk a hong kasōk sik.

¹²Hihei seng hi asōk mak hma, nangni ansur sik chei khana anmanrim sik chei; intûpna innheia ṭong tan sik a anpek sōt sik chei khana kurkhum a ankhum sik chei; kei jâra renghei leh vaikarônhei hmaikunga ankeimanhlut sik chei.

¹³Hivahi nangni sik a Ṭong Kaṭha hrina sik pha kaṭha kachang sik.

¹⁴Nanbinga heikhonga mo a’nhrung sik ung tia nan-Inreng makna sik a hmatak a malung insyem kaṭha ruh;

¹⁵ajârchu nan-inrepuihei tûte’n anmakhetor makna sik chei leh anmasônthei makna sik chei singna leh themna ṭong beisō ke’n kapek sik chei.

¹⁶Nangni nanpa he’n, nansōpui he’n, nanpare patung he’n, nanṭhōn he’n, mikut a anpek sōt sik chei; nangni ṭhahrep chu anthat sik cheia kae.

¹⁷Kei jâra nangni mi rakip in an-en kada sik chei.

¹⁸Tâk-kha nanlu chunga sam razang khatbek inhmang mak ning.

¹⁹Kahnet a ngir ruh, nanbinga inhuk sik chei.

²⁰“Remi he’n Jerusalem antakake khum nangni’n nanhmu pha a’nhmangna sik pha kahnai jo ti manhret ruh.

²¹Khava pha Judea ram a ka-om mihei hmebungting tlân hei rasoh. Khana khōpuia ka-om he’n khōpui kha dahlon hei rasoh; khan chu khava ram a vângtinga aka-om he’n khōpui shunga hlutmak hei rasoh.

²²Ajârchu khava kani kha ṭong inthenga ale’nzet inhlut rakip hui atlungna sik ‘Karâk Ning’ kani akachang sik kae.

²³Khava kanihei pha shunga nai kavonhei leh naidông kaneihei sik a heituk a ṭitpek aka-om sik mo! Hiva ram shunga hin ṭit ka-om dehlana jōng katlung sik, khana hiva mihei chunga Pathen hnuk natna jōng katlung sik a kae.

²⁴Ṭhahrep chemjâm vâng anthat sik hei, khana ram rakip a sōk a ankei sik hei; anpha atluk mak kârseng Jât-hlop he’n Jerusalem kha antachōn rachi sik kae.

²⁵“Kani leh thla khana ârsi chunga omchen inlak hong kasōk sik. Raleichung ram rakip mihei malung inrim sik khana tui-ôngpui leh tui in-nông rasa anṭit sik.

²⁶Raleichung pumpuia heimo ahong kasōk sik ti ṭitna khan inhmak sik hei; ajârchu marvân chunga ratha neina hei hi’m anngaia anhlam hrona inphut hnongsōt sik hei kae.

²⁷Khava pha Mihring Sapa kha jōng inlâr sik, ratha kaneitak a leh kalûrtak a sumtuk chunga kajōng sik.

²⁸Hivahei hi ajōngsōk inphut jo’nchu, ngir sōt ruh, nanlu radâk una khō thlir ruh, ajârchu nan-inhuk inhringna sik hong kahnai jo.”

²⁹Khava sōa Jesu’n tekâk hi ahri pek hei, “Theichangkung leh thingkung ralak seng hi mandonsōt ruh.

³⁰Thingbō heiso a’ndôna abō ahongcher nanhmu jo’nchu, khōlum kahnai jo ti nanmanhret.

³¹Kha leh in-anghrep a, hivahei hi ahon’phut jo’nchu, Pathen rengram kha jōng katlungbei sik jo ti nanmanhret sik.

³²“Mandon ruh, tûnlaia mihei hi anthisō mak hma hiva rakip hei hi ajōng katlung sik kae.

³³Marvân leh ralei chu inhmang sik, tâk kei ṭong chu inhmang mak ning.

³⁴“Insing thei ruh! Revei katamtak tlona sik rōk leh ju inruina sik khana hiva hringkhō sik a malung dongna khan nanbinga inpek inhlutmak ruh, akinchu khava Kani khan manhret manloa

³⁵chângkap kapōa asurkhâk sik chei. Ajârchu ralei hmuntina mi rakip chunga hivahi ajōng katlung sik kae.

³⁶Ajōng kasōk sik omchen heia inphut nanhringsōt torna sik leh Mihring Sapa hmaikunga ngir torna ratha nanchenna sik pha rakip a derṭhak una inrin ṭhak ruh.”

³⁷Jesu’n ani tina Bek-inna aleimanthei ṭhak hei; tâk jân jân a chu kasesōt a Olive Tlânga vaka-om ria kae.

³⁸Mi rakip hei kha jîngkâr hmatak Bek-inna aṭong hri inngei sik ahnenga kahong ri heia kae.