Read Komrem LUKE 23 Bible Online

LUKE 23 - Komrem bible

LUKE 23

¹Khava pha anmani ankhenga kangirsōt heia, Jesu kha Pilate hmaikunga anṭhōi jo,

²anmani’n anmahera anhri: “Hiva mipa hin kanmihei hlamlea aṭhōi hei, Rengkalen Caesar hneng ramsêrṭhei pek makna sik ahri, khana ama abinga Reng, Messiah inchangsak a kae.”

³Pilate in Jesu hneng ader, “Nang Jehudihei Reng che kha mo?” Jesu’n amasôn, “Nang in khanga nati jo.”

⁴Khan chu Pilate in thempu kalenhei hneng leh mipuihei hneng, “Hiva mipa masetna sik a ajâr heite hmumak eng,” ati.

⁵Tâk-kha anmani’n anmanhnak chet a, “Ama’n Judea ram pumpuia aṭong mantheina vâng hin mihei inchokna amasō jo. Galileea aphut a tûnchu hinahin kahong jo,” anti.

⁶Pilate in kha athei pha, “Ama hi Galilee mi mo?” tia ader hei.

⁷Khana ama’n Jesu hi Herod vairônna ramṭhen a mi achang amanhret pha, Herod hneng Jesu kha atir jo, khava laitak khan Herod Jerusalema leika-om.

⁸Herod in Jesu ahmu pha, inpâk hranghra, ajârchu ama’n Jesu chungchâng ṭong aleitheia aleihmu hnōmna kasôt jo. Jesu ṭōn-inlak tlo hmu sik a le’nhōra kae.

⁹Khava jâra Herod in Jesu kha ṭong katamtak aleider, tâk Jesu’n heite leimasôn mak.

¹⁰Thempu kalenhei leh dân ojahei hmating hong inhnengsōt heia inhnaktak a Jesu anmaher maset a kae.

¹¹Herod leh asepei he’n anmanuisōa semtlo hōina anleinei. Anmani’n pōn innem anmansia Pilate hneng anleitir male jo.

¹²Khava ning tak a inphut Herod leh Pilate ṭhōn inchang jo hei; ajârchu khava hma seng anmani ale’n enkada hei kae.

¹³Pilate in thempu kalenhei, hlamkakeihei khana mipuihei abek mantûp heia,

¹⁴anhnenga ati, “Nangni’n hiva mipa hi mihei hlamle kaṭhōi kae tia kahnenga nanheiṭhōi. Tûn ke’n ama nanhmai kunga enmansinna kanei, tâk nanmaherna kapōa aṭhena heite hmumak eng.

¹⁵Herod inum heite aṭhena ahmu mak jâra ahei tir male nôk jo. Hiva mi hin thina sik rahōi kasōk atloṭhe heite om mak.

¹⁶Ke’n ama kavōk sik a kha kamasō sik jo.”

¹⁷Rakan Kût pha rakip a Pilate in anmani sik kurkhum a inphut mi inkhat amasō pek ri heia kae.

¹⁸Tâk-kha anmani ankhenga ka-ông heia, “Ama that roh! Barabbas amasō pek roh!” anti.

¹⁹(Khōpui shunga inchok inhâng aleimasōk jâra leh rerûk a mi athat jâra Barabbas kha kurkhum a anta leikhum kae.)

²⁰Pilate in Jesu amasō hnōm jâra mipuihei hneng aleingek nôk hei.

²¹Tâk-kha anmani ka-ông heia, “Makhei hlon roh, makhei hlon roh,” anti.

²²Pilate in vōi 3 tlukna anhnenga ahri, “Heimo atloṭhe aka-om? Thatna sik rahōi kasōk atloṭhe ke’n heite hmusōt mak eng. Ke’n ama kavōk sik a kha kamasō sik jo.”

²³Tâk-kha Jesu kha thingrake chunga ahem mankopna sik a anrasa inhnak chen a ka-ông hei, achaina pena anmanhnōm nger joa kae.

²⁴Khava jâra Pilate in antader kha ahnōm pek jo heia Jesu thatna sik ṭong amathlâk jo.

²⁵Bōina insō leh rerûk a mi athat jâra kurkhum a a’nkhumpa kha anmani maduna dungjuia amasō pek jo hei, khana Jesu chunga antamadu dungjuia antlona sik apek sōt jo hei.

²⁶Sepei he’n Jesu anṭhōisōt jo khana anmani’n khanga anselai arahming Simon inti Cyrenea inphut khōpuia akahong mi inkhat an-intōpui, ama kha anleisur jo, thingrake kha anmandoma Jesu kahnung anmanjui.

²⁷Mipui katamtak in akahnung anleijui; anmani kâra nuhmei ṭhahrep ama sik a akaṭap leh a’n-ôi le’nvei hei.

²⁸Jesu’n anmani langting inheia ahri, “Jerusalem sanuhei! Kei sik jâra ṭap mak ruh, tâk nangni nanbing sik a leh nansahei sik a ṭap ruh.

²⁹Ajârchu, ‘Sa kaneimak, nai kavonhêr mak khana anetuia nai kaveihêr mak nuhmeihei kha heituk a mahâm kaṭha hei mo!’ tia mihe’n anhongtina sik kani kha hong katlung jo.

³⁰Khavakha mihe’n tlângbunghei hneng, ‘Kanchunga jōngtla roh!’ khan chu hmebunghei hneng, ‘Athup roh!’ anta hongtina sik pha jo kae!

³¹Ajârchu thing kha ahring lai hinga akasōk achang inchu, achâr pha heimo akachang sik?”

³²Ṭōnse katlo milak 2 he’m Jesu leh thatsap sik a anleikei hei.

³³Anmani’n “Lurōk,” inti hmun kha antlung pha, Jesu kha thingrakea anhem mankop jo, ṭōnse katlo inkhat kha achangting, inkhat kha aveiting anleimakhei jo hei.

³⁴Jesu’n ati, “Apa, rangei mandam hei roh! Ajârchu anmani’n heimo antatlo manhret mak hei.” Khana anmani’n ankâra vâng-enna anneia azakkō kha insem jo hei.

³⁵Jehudi hlamkakei he’n, “Ama’n milak ahuksōt hei; ama Pathen takadeisōt Messiah achang inchu abinga inhuk rasoh!” antia anmanuisōlai khan aleikangir mipui he’n heimo akasōk sik tia anlei en madip a kae!”

³⁶Sepeihei kha’num anmanuisōa: kahong heia ju anhongpek a

³⁷khana anti, “Nang Jehudihei reng nachang inchu, nabinga inhuk inhring roh.”

³⁸“Ama hi Jehudihei reng kae” tia alu chungdet a anmazet a anleitâr pek.

³⁹Ṭōnse katlo a’nkhei inkhatpa khan inzak apek a, “Nang Messiah kha changmak che mo? Nabinga inhuk roh, keini’m ahuk roh,” ati.

⁴⁰Tâk-kha inkhatpa khan araseia ati, “Nang Pathen ṭitmak che mo? Nang in ama leh in-angtlinga ṭong tanna kha nachen jo kae.

⁴¹Hei-achang inum eini tachen hichu akadik kae, eini’n nitlona rahōi kasōk hrep kha nihmu kae. Tâk-kha ama hichu akaṭhamak heite tlolo kae.”

⁴²Khana ama’n Jesu hneng, “Eh Jesu, nang in reng inkhat a nahong pha leh ahei mandonsōt roh,” ati.

⁴³Jesu’n ahnenga, “Tuning nang, paradise a aka-omsap sik mea intep eng,” ati.

⁴⁴Pung 12 radona inphut kani vârmak jo, khana pung 3 katlunga ralei pumpui inthim jo. Khana kani avâr mak lai shunga khan Bek-inn shunga pinden pōnzâr inkhei kha her hnia inhler jo.

⁴⁵

⁴⁶Khava pha Jesu’n rasa inhnaktak a a-ôna, “Apa, nakut chunga karathla kapek che,” ati. Hi ahria kathi jo.

⁴⁷Sepei ṭōnpui karônpa khan omchen kasōk hei kha ahmu pha ama’n Pathen amanpâk a ati, “Inchêntak a hiva mipa hi mikaṭha kae.”

⁴⁸Khana khava hmun a a’ntûp a aka-en hei seng khan omchen kasōk hei kha anhmua an-ôp ankabena an-innting inle jo hei.

⁴⁹Galileea inphut a aheikajui mipuihei leh Jesu inhret hei, kahlajap a akangir hei khan omchen kasōk hei kha anlei ena kae.

⁵⁰Judea ram a Arimathea khōa arahming Joseph inti mi inkhat leika-om. Ama kha mikadik leh kaja ka-om tak Pathen Rengram ajōng katlung sik aleikahngâk inkhat kae. Ama chu Sehmang-pachonghei kâra inkhat achang inum anṭong mathlâk leh anchunga akahnōm mak inkhat leikae.

⁵¹

⁵²Ama Pilate hmaikunga kasea Jesu kalōng kha avader.

⁵³Khava sōa ama’n Jesu kalōng kha akadom mathlâk a hruipōn innem neng vâng akatōma, hlung thlân inkhōrsa, tûte ala’nhre makna inkhat a avahre jo.

⁵⁴Khava kani kha inrin ning kae, Châmhngat kani a’nphut mak hma det kae.

⁵⁵Galileea inphut a Jesu kahnung aheikajui nupuihei khan Joseph kha anjuia Jesu kalōng aman jena leh ahrena thlân kha anvahmu.

⁵⁶Khava sōa anmani’n innting inle heia Jesu kalōng kano sik marim katui thai leh maru-marâng anleimantluk a kae. Dân dungjuia anmani’n Châmhngat kani ning khachu le’nhnga jo hei.