Read Komrem LUKE 24 Bible Online

LUKE 24 - Komrem bible

LUKE 24

¹Kanive hma-inkei ning jîngkâr hmatak nuhmeihei khan antamantluk marim katui hei kha anchoia thlâna kase hei.

²Thlânkhur kot khârna hlung ale’nhliksōt kha anvahmu jo.

³Khava jâra anmani thlânkhur shunga kahlut jo hei. Tâk-kha Rōngpu Jesu taksa kalōng kha anmani’n hmumak jo hei.

⁴Khava chunga inhmak a anngirlai, manhret manloa pōn kachek kasi pase 2 anhnenga jōng kangir hei.

⁵Nupuihei kha kaṭirei jo heia thōiting anhmai anmaluk jo, khahei khan anhnenga, “Heisa mo nangni’n akahring kha akathihei kâra nantajong?

⁶Ama kathōisōt jo; hin om mak jo. Galileea a-omlai nanhnenga aleihri pek chei:

⁷‘Mihring Sapa kha thingrakea hem mankop sik a mikasehei kut a pek sōt sik kae, ni 3 sōa kahringa akathōisōt sik kae’ aleiti kha mandonsōt ruh.”

⁸Khava pha nupuihei khan aṭong hri kha anmandonsōt a,

⁹Thlâna inphut inle heia, sonle 11 hei hneng leh alak-hei seng hneng omchen kasōk rakip anvahri pek jo hei.

¹⁰Nupuihei khachu Magdalene Mary, Joanna, James nu Mary khana anmani leh a’nṭhōi nuhmei lak he’n sonlehei hneng hihei hi anvahri pek hei.

¹¹Tâk-kha sonlehei khan nuhmeihei ṭonghri kha hme hria antahri kae tia anleiloa leitaksen mak hei.

¹²Tâk-kha Peter kangirsōt a thlânting katlân jo; khana ama inkuna a-en pha hruipōn inze teilo heite leihmu mak. Heimo akachang jo tia amandonhla pum a innting inle jo.

¹³Khava ning tak khan Jesu kahnung kajuihei kâra mi 2 Emmaus inti khō inkhat Jerusalema inphut Kilometre 11 kapō inkâra akahla kha anleijōn.

¹⁴Anmani 2 he’n omchen kasōk rakip ṭong kha anhria leikase hei.

¹⁵Anmani khanga inbek heia anselai khan, Jesu’n asor manhnai heia ale’nṭhōipui hei.

¹⁶Anmani’n anhmu ravâng ahme leimanhret tor mak hei.

¹⁷Jesu’n anhnenga, “Nangni nanse pum a heiṭong mo a’nbe chei?” tia ader hei. Anmani anhmai kanguirenga leikangir hei.

¹⁸Khava pha ankâra arahming, Cleopas intipa khan ahnenga, “Tûnlai kani ṭhahrep shunga Jerusalema omchen kasōk manhret lo khōhme kha nang rōk che mo?” ati.

¹⁹“Heimo akasōk?” tia aleider hei. “Nazareth Jesu chunga ṭōn kasōk hei kha,” tia anmasôn. “Ama hi sânkathem inkhat, Pathen leh mi rakip in aṭōntlo leh aṭong hria ratha kaneitak inkhat a antalo kae.

²⁰Nithempu kalenhei leh vaikarôn he’n thatna sik a anpek sōt a, thingrakea anhem mankop a kae.

²¹Israelhei kahuk inhring sik kha ama kachang sik tia keini le’nhōr ung! Khahei rakip chunga, hiva ṭōn kasōk hi tuning ni 3 katluk jo.

²²Kankâra nuhmei ṭhahrep he’n animanpir hêr ung; jîngkâr hmatak thlâna vakase hei,

²³tâk akalōng kha vahmu mak jo hei. Ama kahring jo tia ankahri pek ngeva hmangtalâra kanhmu hei antia he’nle hei.

²⁴Kanloi hei kâra ṭhahrep thlâna vakase heia nuhmeihei tahri kapōa thlân kha anvahmu, tâk ama khet chu vahmu mak jo hei.”

²⁵Khava sōa Jesu’n anhnenga ati, “Heituk-hrep a akamo chei mo, sânkathemhei tahrisōt rakip taksenna sik heituk a a’nsûm jo chei mo!

²⁶Messiah khan inrengna khahei seng ade nger sik khava sō leh alûrna shunga akahlut sik changmak mo?”

²⁷Khana ama’n Moses lekha heia inphut sânkathemhei tamazet katlunga ṭong Intheng rabu rakip shunga achungchânga ale’nzet senghei kha aleihri manchên pek jo hei.

²⁸Anmani’n ankhō jōn kha antlung sik jo pha, ama akakhe chet a akase sik le’nhlem;

²⁹tâk anmani’n ankhâma, “Kani katla jo, inthimbei sik jo, reksap jo rih,” anti. Khava jâra ama kha anmani leh akarek sik a leikahlut jo.

³⁰Ama anmani leh dokhânga in-onga, buhlom kha aloa, mahâmṭhat apek a, khana akhōia anmani apek hei.

³¹Khava pha anhmit inhlâng joa anmani’n ama achang kha anmanhretsōt jo. Tâk-kha anhmit hmua inphut le’nhmang jo.

³²Anmani 2 kha inbe heia, “Ama leh hlamlena nihe’n ṭhōisaplai, Ṭong Intheng ahri manchêna a’nbekpui me lai khan nimalung shunga hmei insûk angmak mo?” inti heia kae.

³³Anmani khava phatak a khan kathōi heia Jerusalemting inle jo hei, khana sonle 11 leh alak-hei anle’ntûp kha anvahmu hei,

³⁴khahei khan anhnenga, “Rōngpu kha kadiktak a kathōi jo! Simon hneng inlâra kae!” anti.

³⁵Mi 2 hei kha’num anhnenga, anhlam hrona omchen kasōk leh, buhlom akhōi pha, Rōngpu achang antamanhretsōt omchen kha anhri manchên pek jo hei.

³⁶Anmani’n hiva ṭong hi anhrilai, manhret manloa Rōngpu kha ankâra hong kangira anhnenga, “Nanchunga malung mōngna om rasoh,” ati.

³⁷Anmani’n rathla inkhat antahmu kapōa anmandona, inpir heia kaṭihêr jo hei.

³⁸Tâk-kha ama’n anhnenga, “Heisa mo nanbinga a’nder cheia nanmalung inkei-chiona nantanei?

³⁹Enruh, kakut kake hei hi, kei eng kae, asit una a-en ruh; ajârchu rathla inkhat in kei kapōa taksa ravōi, ru leh châng neimak,” ati hei.

⁴⁰Ama’n hi ahria, akut akehei amalârpek heia kae.

⁴¹Khava katlunga hlamrin tor mak hei, anṭong theia le’npâk hêr hei khana andet-hla hêr; khava jâra ama’n anhnenga ader hei, “Hiva hmun a hin sâk thei heikhat nantanei mo?”

⁴²Anmani’n ahnenga nga sōngsa ahar inkhat anleipek,

⁴³Kha aloa anhmai kunga aleisâk a kae.

⁴⁴Khava sōa anhnenga ati, “Kei chungchânga Moses Dân shunga a’nzet rakip, sânkathemhei tamazet, khana Hlarabua ale’nzet kha ahong katlung sō nger sik kae tia nangni leh nileiom saplai kaleihri pek chei kha hivahei hi kae.”

⁴⁵Khava sō tōa Ṭong intheng kha anmanhretna sik anmalung amahlang pek jo hei,

⁴⁶khana anhnenga, “A’nzet kha hi kae: Messiah kha inrim khōdeng athei sik, ni 3 ning thina inphut kathōi sik,

⁴⁷khana Jerusalema inphut a jât rakip hneng malung thlengna leh set rangei mandamna sik ama rahminga ṭong inhri inthang sik kae.

⁴⁸Nangni hiva sâkhi chei kae.

⁴⁹Ke’n kapa ṭongtep kha nangni chunga kajōngtir pek sik chei. Tâk-kha nanchunga marvâna inphut ratha kha ajōng tlung mak hma seng khōpuia nangni om ruh.”

⁵⁰Khava sōa ama’n anmani kha Bethany katlunga aṭhōisōt heia, ama’n akut akalânga vâng aleipek hei.

⁵¹Ama’n vâng apek lai hei, ama marvân chungting kaketoua, anmani adahlon jo hei.

⁵²Anmani’n ama ankamuk a inpâktak a Jerusalemting inle jo hei.

⁵³Khana anmani Bek-inn shunga Pathen anchoi ka-ân ṭhak a ka-om jo hei.