Read Komrem LUKE 6 Bible Online

LUKE 6 - Komrem bible

LUKE 6

¹Châmhngat kani ning inkhat a Jesu sabi hlei laia ahroa leikase. Asonle he’n savui anmajuia ankut a ankahnura asai kha ansâk a kae.

²Pharisee ṭhahrep in “Nidân in Châmhngat kania tlomak sik ati kha nangni’n heisa mo nantatlo?” anti.

³Jesu’n amasôn hei, “David in ami a’nṭhōipui hei leh anvon aṭâm pha anta leitlo kha teimak chei mo?

⁴Ama Pathen inna kahlut a, Pathen hnenga a’ntōk buhlom kha aloa asâk a, ami he’m aleipek heia kae. Khavakha thempuhei teilo tu inkhat in asâk inchu nidân kadōi kae.”

⁵Khana Jesu’n achaina ahria, “Mihring sapa kha Châmhngat kani Rōngpu kha kae,” ati.

⁶Châmhngat kani ning inkhat a intûpna innpuia Jesu kahlut a amanthei hei. Khava hmun a khan akut changting akangōi mi inkhat leika-om.

⁷Dân ojahei leh Phariseehei ṭhahrep in Jesu ṭōntlo ṭhena chunga maset pek theina sik ajâr ṭhahrep anleimadua; anmani’n Châmhngat kania mi tu achang inum Jesu’n amandam sik kha anlei en mathlip a anleihlōa ka-om hei.

⁸Tâk-kha Jesu’n anmani malung mandon kha amanhret a kut kangōipa hneng, “Nang ngir inna hiva hmating hin hong roh,” ati. Mipa kha kathōisōt a anhma vakangira kae.

⁹Khava pha Jesu’n anhnenga ahri, “Châmhngat kani ning nidân in heimo tlo sik ahnōm pek me? Mi manrim sik mo, a-emak leh mi inthōpui sik mo? Mi inkhat hringkhō hukmanhring sik mo a-emak leh manhmang sik mo?”

¹⁰Ama’n anmani a-en manve bit heia, mipa hneng khan, “Nakut razit roh,” ati. Ama’n akut arazit a akut kha kadam jo.

¹¹Tâk-kha anmani anhnuk kana hêr joa, Jesu chunga heimo antatlo tor sik tia anmani anbinga inbek jo hei.

¹²Khava phatak a khan Jesu derna kanei sik a tlâng inkhat a kase jo, khava hmun a khan jânsôt Pathen hneng aleidera kae.

¹³Khō ahong vâr pha ama’n asonlehei ahnenga abek heia 12 akadeisōt jo hei, khana anrahming sonle tia aphō jo hei, khahei khachu;

¹⁴Simon (ama’n Peter tia arahming aphō); khana anaipa Andrew; Jacob leh John, Philip leh Bartholomew,

¹⁵Matthew, leh Thomas, Alphaeus sapa James leh Simon (Aram inlungsetpa tia’m anbek)

¹⁶James sapa Judah leh Judah Iscariot, akajōrpa hei hi kae.

¹⁷Tlânga inphut anmani leh jōng inṭhōisuk heia, hmun incham inkhat a asonle katamtak hei leh Jesu kangirsap heia kae. Khava hmun a khan Judea ram pumpuia mi katamtak, ti chu Jerusalema inphut Tyre leh Sidon tuipang kimvea, khōpui heia inphut mipui katamtak,

¹⁸aṭong hri inngei sik leh annatna amandam sik a kahong heia kae. Rathla kaṭhamak in khōdeng amanthei hei kha’m kahong heia amandam hei.

¹⁹Ankhenga amandam sik hei anmadua mi rakip in ama sitnger sik a anmandon et a kae.

²⁰Jesu’n asonlehei a-en heia ahri: “Sara kachang nangni nanmahâm kaṭha; Pathen rengram kha nanta kae!

²¹“Tuna von kaṭâm nangni nanmahâm kaṭha; nangni alakakhop sik chei kae! Tuna akaṭap nangni nanmahâm kaṭha; nangni nantala manui sik kae!

²²“Mihring sapa sik jâra, nangni mi’n anhōt cheia, anhnōm mak cheia, inzak anpek chei pha, khana mikaṭhamak anti chei pha, nanmahâm kaṭha!

²³Khang’khan antlo chei pha, inpâk a lâm ruh, ajârchu inpâkman kalentak nangni sik a marvâna dapek jo chei kae. Ajârchu anpusōn he’num khava kapōhrep a sânkathemhei kha anleitlo heia kae.

²⁴“Tâk-kha tuna akahao nangni sik a heituk ṭitpek ka-om chei mo; nangni’n hringkhō kahōi nanlei hmang joa kae!

²⁵“Tuna von kakhop nangni heituk ṭitpek ka-om chei mo; nanvon alakaṭâm sik kae! Tûnlaia a’nnui nangni heituk ṭitpek ka-om chei mo; alakaṭap cheia ṭajai nantalasui sik kae!

²⁶“Nangni mi rakip in anhri manṭhat chei pha, heituk ṭitpek ka-om chei mo; anpusōn he’num akadik mak sânkathemhei kha khanga anta leihri manṭhat hei kae.

²⁷“Tâk-kha kaṭong kathei nangni kamanthei chei kae: nangni’n nanka-en inda hei lungset hei ruh, nankahōt hei anṭhatna sik tlopek hei ruh.

²⁸Nankahâksêr hei mahâmṭhat pek hei ruh; akanimak a nankatlo hei derpek hei ruh.

²⁹Mi inkhat in nangambe inkhat ting akaben inchu, lang khat ting um madopek roh; mi inkhat in nazakkō kalen akasut che’nchu, nazakkō ate kha’m peksa roh.

³⁰Tu enum nahnenga heikhat ader che kha pe roh, naneinâk hei kha achoi jo’nchu dermale mak roh.

³¹Nang sik a mihei namantlo hnōm kha mihei sik a’m khanga tlo roh.

³²“Nangni’n nan-inlungset hei rōk kha nanlungset inchu, heisik a mo mahâmṭhatna kha nantachen sik? Mikaset he’num ani’nlungset hei kha anlungset heia kae.

³³Nang hnenga ṭhatna katlohei rōk hneng nangni’n ṭhatna nantlo’nchu, heisik a mo mahâmṭhatna kha nanta rahlâng sik? Mikasehei kha’num khachu antatlo kae.

³⁴Nankapek inletor sik mi rōk hei kha nanneinâk heikhat nanmanpûk he’nchu, heimo nantahnempui sik aka-om? Mikasehei kha’num ankapek inletor sik hei kha anneinâk anmanpûk heia kae.

³⁵Kha changmak! Nanka-en inda hei kha lungset hei ruh, khana anṭhatna sik tlo ruh, khan chu anhnenga inphut hmu nôkna sik a mandon loa nanneinâk manpûk hei ruh. Kha achang inchu nangni’n vâng kalentak nanchen sik, khana A’nshângpen Pathen sa kachang sik chei. Ajârchu ama kha mikaṭhamak-hei leh mi kanimak hei sik a akaṭha kae.

³⁶Nanpa lungset kathem achang kapōa nangni lungset them ruh.

³⁷“Milak ṭong tanmak ruh, nanṭong Pathen in tanmak ning; mi masetmak ruh, Pathen in masetmak chei ning, mi rangei mandam ruh, Pathen in arangei mandam sik chei.

³⁸Milak-hei pe hei ruh, nangni Pathen in apek sik chei. Akasip phet, pek hnōmtak a inthōpuina, nankut inhlei leoa abunpek sik chei. Milak sik a natena kha nang sik a Pathen tahmang sik tena kha kae,” ati.”

³⁹Khana Jesu’n hiva tekâk hi aleihri pek hei, “Hmitkacho inkhat in hmitkacho inkhat hlam keithei mak; akei inchu, an-inhnia khur kōk a katla inhlut sik hei.

⁴⁰Lekha inchu naipang kha a-oja kanek a akalen jôk changmak; tâk a’nthemchûk kha achai jo pha a-oja kapōa hongkachang sik.

⁴¹“Nahmit a innim inkamre ka-om chu donlo chea, nasōpui hmit a innim kasintek ka-om kha heijâra mo na-en?

⁴²Nahmit a innim inkamre ka-om kha hmutorlo chea heikhong mo nasōpui hneng, ‘Sōpui, nahmit a innim kasintek kha losōtpek che rong,’ nati tor sik? Mi inṭhat hlemsak! Hmakakeia nahmit a innim inkamre kha losōt hi roh, khava sō leh nasōpui hmit a innim kasintek kha nahmu tor sik a kae.

⁴³“Thingkung kaṭha inkhat a kara kaṭhamak inra phungmak, a-emak leh thingkung kaṭhamak a kara kaṭha inra phungmak.

⁴⁴Thingkung rakip akara vâng inhret; rahlingbuk a inphut a theichang kara ṭhōtphung mak chei.

⁴⁵Mikaṭha khan akaṭha manbukna malunga inphut akaṭha amasō; mikaṭhamak khan akaṭhamak manbukna malunga inphut akaṭhamak amasō. Ajârchu malunga akasip phet kha bei in ahrisōt kae.

⁴⁶“Kahri khachu tlolo cheia, heisa mo ‘Rōngpu, Rōngpu,’ nantati eng?

⁴⁷Tu enum kahnenga kahonga, kaṭong katheia, akajui mi kha, tu leh mo a’n-ang ti kha ke’n manhmu chei rong.

⁴⁸Ama khachu a-inn asak pha, innhmun inthûktak a kacho, hlungpui chunga kadeng mi kha kae. Tuidung pang tui inlet inthla jo, tui mathlung in inn kha avasuk jo, tâk manhling tor mak, ajârchu inn kha kaṭhatak a asak kae.

⁴⁹Tâk-kha kaṭong katheia, akajuimak mi khachu hmun dengloa raleia inn kasak mi inkhat kapō kae; inn kha tuikalen in asuk pha inrangtak a katluk jo; atlûk kha heituk a inhnak jo mo!”