Read Komrem LUKE 8 Bible Online

LUKE 8 - Komrem bible

LUKE 8

¹Pha chomkhat sō leh Jesu’n khōpuihei leh khōte heia kalôna Pathen Rengram Ṭong Kaṭha ahrilea kae. Sonle 12 he’n ama anleisepui.

²Khang’khan nuhmei ṭhahrep anshunga rathla kaṭhamak leh annat amandam hei kha’num anleijuia kae: Mary (Magdalene inti) ashunga rathla kaṭhamak 7 ahnong sōt peknu,

³Herod ṭongtana hmun a ṭōnkatlo Khuza nuhmei Joanna, khana Susanna leh nuhmei ralak katamtak hei, Jesu leh sonlehei chunga inthōpuina aleikapek hei seng kha kae.

⁴Mihei kha khōpui inkhat a inphut inkhat a Jesu hneng kahong heia, mipui anho’ntûp pha, Jesu’n hiva tekâk hi ahri pek hei:

⁵“Pha khat a mi inkhat hmuchi kavor kasesōt, ama’n hleia hmuchi kha avora, ṭhahrep khat chu mi hrona hlamdunga katla, vahe’n anhrut a ansâk jo.

⁶Ṭhahrep hlung kâra katla, khava hmuchi kha ahong keksōt pha aralei a’ndapmak jâra invōia kachâr jo.

⁷Ṭhahrep rahling chap kâra katla, rahling kha leh kakeksap heia akabuksi jo.

⁸Khana ṭhahrep chu ralei ṭhatna katla a hmuchi kha kakek a, kakhanga akara 100 et inra a kae.” Khana Jesu’n achaina, “Kōr kanei in rangei ruh!” ati.

⁹Asonlehei khan ṭong tekâk kha heitina mo tia andera,

¹⁰Jesu’n amasôn hei, “Pathen Rengram in-ip manhretna kha nangni inpek jo chei; tâk milak-hei hneng chu ṭong tekâk a a’nhri kae, khava jâra anmani’n an-en inum hmumak hei ning, anrangei inum theimak hei ning.”

¹¹“Hivahi tekâk kha kae: hmuchi kha Pathen ṭong kae.

¹²Hlamdunga akatla hmuchihei khachu ṭong inhri katheihei kha kae; tâk anmalunga antaksenna sik leh anhringna sik a a’npek ṭong kha Seitan kahonga alosōt pek jo hei.

¹³Hlung kâra akatla hmuchihei khachu, ṭong inhri katheia inpâk a akalo hei kha kae. Tâk-kha anshunga inritak a rajung aṭhōmak jâra, anmani’n pha bongkhat chu antaksen, tâk enmansinna ahong pha leh anmani katlu ri jo hei.

¹⁴Rahling kâra katla hmuchihei khachu aṭong katheihei kae; tâk raleichung hringkhō inrengna, haona leh hōina’n akatōm heia akabuksi hei, khana ankara kha ahei tik a hmintor mak hei.

¹⁵Ralei thaiṭhatna akatla hmuchihei khachu aṭong kathei, akaṭha malung karôn, aṭong kajui khana an-inramak kârseng takkatlo hei kha kae.

¹⁶“Tute’num thaihmei vâr inkhat hrai thōia det phungmak. Khava kanek a mihei anheihlut pha vâr kha anhmuna sik thaihmei matungna chunga anmatunga kae.

¹⁷Hei-achang inum a’nthup kha vânga malârsōt sik kae, khana hei-achang inum makhu khuma aka-om kha a’nhmusōt ngerna sik khōvâra malârsōt sik kae.

¹⁸“Khava jâra heikhong mo nanta rangei insing thei ruh; ajârchu heikhat akanei kha inpeksa sik hei, tâk heite akaneimak kha ajingte anei tia amandon kapha losōtpek sik hei kae.”

¹⁹Jesu nu leh asōpuihei ahnenga kahong hei, tâk mipui antam jâra ahnenga hlut tor mak hei.

²⁰Mi inkhat in Jesu hneng, “Nanu leh nasōpui he’n anhmuhnōm chea vânga kangir hei,” ati.

²¹Jesu’n ankhenga hnenga, “Pathen ṭong inngeia, akajuihei kha kanu leh kasōpuihei kha kae,” ati.

²²Ni khat Jesu asonlehei leh rakōng inkhat a kachōng heia anhnenga, “Eini’n dîr hi rakan me sona rekhat ting son se rih,” ati hei. Khang’khan anmani intôr jo hei.

²³Khang’khan anmani an-intôrlai, Jesu leikaje jo. Thlipui inhnaktak inkhat dîrting khan jōng kahrângsuk a rakōng shunga tui siprong ati jo, ankhenga khōdeng kathei sik a ka-om jo hei.

²⁴Sonlehei kha Jesu hneng kahong heia anmathōia, ahnenga, “Apu, Apu! Keini thirung kanti jo,” anhongtia kae. Jesu kathōia thlipui kahrâng hnenga leh tui in-nông hnenga khan ṭong apek a, thlipui kahrâng leh tui in-nông kha kabâng jo hei, kadai hnger joa kae.

²⁵Khava pha ama’n sonlehei hneng, “Khomo nantaksenna?” ati hei. Tâk-kha anmani’n anmandon-hla a kaṭi jo hei, khana anmani khat leh khat in, “Hiva mi hi tu mo? Ama’n thli leh tui in-nông ṭong apek heia, aṭong anjuia kae!” anti.

²⁶Galilee dîra inphut anmani’n Gerasa ramri ting intôr inthlung jo hei.

²⁷Jesu tuipang ahei sōk pha, khōpuia inphut, ṭai karôn mi inkhat in a’ntōpuia kae. Mipa kha pha kasôttak pōnsi derkei loa inn kadahlona, thlânlôna khurshung rōk a leika-om.

²⁸Ama’n Jesu ahmu pha rasa inhnaktak a ka-ônga, ahmai kunga inkuna: “Eh A’nshângpen Pathen Sapa Jesu, kei heimo namanlo sik eng? Khōdeng theina apek mak roh,” tia angêk.

²⁹Ama’n hinga ati hi rathla kaṭhamak kha ama inphut asesōtna sik Jesu’n ṭong aleipek jo jâra kae. Hmun katamtak a rathla kaṭhamak khan aleisur ri, khana thirhrui vâng ankhit a, rake antukkhum ravâng amaher thlek a ṭai khan nêrdiram thōia aṭhōi ria kae.

³⁰Jesu’n ama hneng, “Narahming heimo?” tia ader. Ama’n amasôn, “Karahming ‘Ajâm’ kae.” Ajârchu ṭai katamtak ashunga kahlut heia kae.

³¹Ṭaihei khan adongna kase dôpkhura atir makna sik hei Jesu hneng anleingêk.

³²Hmebung panga khan vok katamtak anleikhem hei. Ṭaihei khan vok-hei hneng anhlutna sik Jesu hneng ander pha aleimanhlut jo hei.

³³Khava jâra mipa inphut kasōk heia vok-hei hneng kase jo hei. Vok rup-hei seng kha karehrâpting katlânsuk heia dîr shunga kahlut hlon jo hei.

³⁴Vok kakhemhei khan omchen kasōk anhmu pha, katlân heia khōpui shunga leh hleipuk heia anvahri manthang joa kae.

³⁵Mihei kha omchen ka-en sik a heikasōk hei, Jesu hneng anhong pha, ṭai sōksōtna mipa kha pōn a’nsia malung kahlim senga Jesu ke kunga an-ong kha anhmu pha anmani ankhenga kaṭi jo hei.

³⁶Khava aleikahmu hei khan heikhonga amandam mo ti kha mihei anleihri pek hei.

³⁷Mipuihei kha ankhenga kaṭirei jo heia khava ram a inphut Jesu asesōtna sik anngek a kae. Khava jâra Jesu rakōnga kahlut a adahlon jo hei.

³⁸Ṭaihei sōksōtna mipa khan Jesu hneng, “Ke’m hongrong,” ati. Tâk-kha Jesu’n ahri pek a,

³⁹“Na-inna inle roh, Pathen in heimo atlopek che kha vahri roh.” Mipa kha khōpui shunga kalôna Jesu’n aleitlo pek kha avahri jo.

⁴⁰Jesu dîr rekhat ting ahe’nle pha, mipui in anleiratō, ajârchu anmani’n anleihngâk ṭhak a kae.

⁴¹Khava sōa khō khat a intûpna innpuia ṭōnkarôn mi inkhat arahming Jairus inti kahonga, Jesu ke kunga hong-inkuna a-inna ahongpekna sik a avangek.

⁴²Ajârchu kum 12 katluk jo sanu inkhat rōk anei kha akathi sik a ka-om jo. Jesu’n khang’khan aselai, mipui in ama ankatōmbit a kae.

⁴³Ankâra kum 12 inhnaktak a thi kajung nuhmei inkhat leika-om: thempuhei hneng anei rakip aleimanhlut sō jo tâk tûte’n leimandam tor mak hei.

⁴⁴Amanu kha mipui kâra Jesu kahnungting apōnhmor avasit a, khava laitak athi jung kha kabâng jo.

⁴⁵Jesu’n ader hei, “Tu mo ani kasit?” Mi rakip in changmak ung anti pha, Peter in, “Oja, mipui in inhneng che-chea ankatōm chea kae,” ati.

⁴⁶Tâk-kha Jesu’n, “Mi inkhat in asit eng, ajârchu keia inphut ratha hratna asōksōt kha kamanhret a kae,” ati.

⁴⁷Nuhmei khan ani manhret sōt jo ti inhret a, ratha innok pum a kahonga, Jesu ke hma hong-inkun jo. Khana khan mi rakip hma khan, ama’n heisik a mo asit khachu khava laitak heikhonga mo akadam jo ti kha ahri jo.

⁴⁸Jesu’n amanu hneng, “Sanu nataksen in amandam jo che, kamōnga se jo roh,” ati.

⁴⁹Jesu’n hi ahrilai, ṭōnkarônpa inna inphut tirle inkhat kahonga, “Nasanu kha kathi jo, oja kha manbōi mak jo roh” tia Jairus hneng ahong manthei.

⁵⁰Tâk-kha Jesu’n kha atheia Jairus hneng, “Ṭimak roh, taksen rōk taksen roh, kadam sik,” ati.

⁵¹Ama an-inn kha atlung pha, naipangnu apa leh anu khana Peter, Jacob leh John teilo tûte inna kahlut sik leiphemak.

⁵²Khana ka-om rakip naipang sik jâra leikaṭap hei. Jesu’n, “Ṭap mak ruh, naipang hi thimak, akaje hnâm kae,” ati.

⁵³Anmani rakip in anleimanuisō, ajârchu amanu thi kha anleimanhret joa kae.

⁵⁴Tâk-kha Jesu’n naipangnu kut amatua abek a, “Naipang, thōi roh!” ati.

⁵⁵Hongkahring malea inrangtak a hongkathōi jo, khana heikhat mansâkna sik Jesu’n ṭong apek hei.

⁵⁶Anu leh apa’n anmandon-hla hêr jo, tâk tûte hneng omchen kha anhrisōt makna sik Jesu’n ṭong aleipek hei.