Read Komrem LUKE 9 Bible Online

LUKE 9 - Komrem bible

LUKE 9

¹Jesu’n sonle 12 abek heia, anmani’n ṭai rakip antahnong sōt sik leh nat rakip antamandam sik a ratha apek jo hei.

²Khava sōa Pathen Rengram ṭong kahrile sik leh akanahei indam sik a,

³anhnenga hihei hi ahrisōa atir jo hei: “Khōhme nanse pha heite inrôn mak ruh: khōnghre, mârsha, buhlom, sêr, zakkō akop kapha inrôn mak ruh.

⁴Khōpui kha nandahlon mak kârseng anratōna chei inna khan omṭhak ruh.

⁵Khova hmun achang inum anratō makna cheia, mihe’n anleirahlâng makna chei khōpuia khan, sâkhi sik a nankebōk kha kathing mathlapek hei una dahlon hei ruh.”

⁶Khava pha sonlehei khan andahlona khō rakip a kalôn heia, hmun rakip a Ṭong Kaṭha anvahria akana mihei anmandam jo hei.

⁷Galilee vaikarôn Herod in, omchen kasōk rakip athei pha, amalung inhmak jo, ajârchu mi ṭhahrep in, “Tui Inhlutpa John kha ajōng inlea kahring nôk jo,” anti.

⁸Khana alak he’n, “Elijah ajōng inle nôk kae,” anti; alak her khat nôk in, “Hmalaia sânkathem akathihei inkhat ajōng inle nôk kae,” anti.

⁹Herod in, “Ke’n John khachu alu katan jo kae; tâk hiva aṭong kathei ama hi tu sik pen jo mo?” ati. Khana ama’n Jesu ahmuhnōm hêra kae.

¹⁰Sonlehei kha hong inle jo heia Jesu hneng antatlo heirakip anmanthei jo. Ama’n anmani aṭhōi heia Bethsaida inti khōpui inkhat a asepui jo hei.

¹¹Mipui in khava ṭong kha anthei pha anjui jo, ama’n anmani aleiratō heia Pathen Rengram ṭong ahri pek jo hei, khana dam indu hei kha aleimandam hei.

¹²Khōhlei kani atlâk sik jo pha, sonle 12 hei kha Jesu hneng kahong heia anvahri, “Mipuihei kha hiva hnenga khō leh hlei rahōn heia ansea sâk sik leh rekna sik anva’n jongna sik manse jo hei roh, ajârchu hivahi ramthōi kae.”

¹³Tâk-kha Jesu’n anhnenga ati, “Nangni’n anmani tasâk sik heikhat pek hei ruh.” Anmani’n anmasôn, “Keini tanei khachu akhenga buhlom pheng 5 leh nga 2 rōk kae. Mipui hiseng tasâk sik kanse leh kanta varachôk sik namadu mo?”

¹⁴(Ajârchu mipuihei kha pase 5,000 kapō hei kae). Jesu’n asonlehei hneng ati, “Mihei kha 50 et a, arup-rup a, man-ong hei ruh.”

¹⁵Sonlehei khan khanga antlosōa,

¹⁶Jesu’n buhlom pheng 5 leh nga 2 kha aloa, marvânting a-enna anmani sik Pathen amanpâk a akhōia khava mihei hneng antasem sik a sonlehei apek jo hei.

¹⁷Ankhenga anmani’n ansâk et a katluk jo hei; khana sonle he’n mihei tasâk manhlei kha hrai 12 anhrutsōt a kae.

¹⁸Ni khat Jesu’n abinga aderlai, asonlehei ahnenga kahong hei. Anhnenga ader hei, “Mipui he’n kei tu mo anti eng?”

¹⁹Anmani’n anmasôn, “Ṭhahrep in Tui Inhlutpa John kae anti che. Ahlop he’n Elijah kae anti che, alak in hmalaia sânkathemhei kâra inkhat ahong kahring nôk kae anti che,”

²⁰Khana ama’n ader hei, “Nangni’n kei tu mo nanti eng?” Peter in amasôn, “Nang Pathen Messiah che kae.”

²¹Khava sōa anmani’n tûte hneng anhrisōt makna sik Jesu’n inhnaktak a ṭong apek hei.

²²Hi’m aleihrisa, “Mihring Sapa kha khōdengthei ade nger sik kae, khana dân ojahei leh, thempuhei, khana upahe’n ama antahnōm mak sik kae. Khana ama anthat sik a kha ni 3 ning kahringa keimathōia aka-om sik kae.”

²³Khana ama’n ankhenga hnenga ahri, “Tu mo inkhat kei kajui hnōm in abinga a’ndon mak sik kae, ani tina athingrake akadom sik, khana ajui sik eng kae.

²⁴Ajârchu tu achang inum anrathla kahuk hnōm khan anmanhmang sik, tâk kei sik jâra anhringkhō inhmang khan anhûk manhring sik.

²⁵Mihe’n vânhnōi pumpui anchen inum, anrathla a’nhmanga a-emak leh mi’n antor jo’nchu heimo hnemna aka-om sik? Heite omak!

²⁶Mihe’n kei leh kaṭong manthei hei hi an-inzakpui achang inchu, Mihring Sapa khan alûrna leh apa lûrna khana angeva intheng hei lûrna leh inṭhōia ajōng pha a’nzakpui sik hei kae.

²⁷Kahri manchên pek chei kae, Pathen Rengram kha anhmu mak hma seng thina intō mak sik mi ṭhahrep hin ka-om hei.”

²⁸Ama’n hihei ahrina Kani vekhat sōa, Jesu’n Peter, Jacob leh John aṭhōi heia hmebung inkhat a Pathen kader sik a kase hei.

²⁹Ama’n aderlai, ahmaisō inthleng jo, khana apōnsi kha kachek-hlak jo.

³⁰Manhret manloa pase 2 he’n ama anlei inbekpui. Anmani kha Moses leh Elijah leikae hei,

³¹marvân lûrna leh jōng inlâr heia, Jesu’n Jerusalema avakathia Pathen ṭōnmantluk inrangtak a pui avamathluk sik chungchânga anlei inbekpui.

³²Peter leh aloihei seng chu leikaje hnger jo hei, tâk an-inṭhang pha Jesu kha kalûrtak a pase 2 leh anngirsap kha anhmu heia kae.

³³Mihe’n Jesu kha andahlon pha, Peter in ahnenga ati, “Oja, eini hinna ni-om hi heituk a akaṭha jo mo! Eini’n rabuk 3: inkhat nang sik, inkhat Moses sik khana inkhat Elijah sik nisak sik.” (Ama’n hei ahri inchêna leimanhret mak).

³⁴Khanga ṭong ahrilai sumtuk hlom inkhat inhmua arahle khan amakhusi jo hei; sumtuk in anmani chunga ajōng om pha leikaṭi jo hei.

³⁵Sumtuk kâra rasa inkhat in, “Ama hi ke’n kakadeisōt jo ka-Sapa kae, aṭong rangei ruh,” ati.

³⁶Rasa kha abâng jo pha Jesu rōk abinga leika-om. Sonle he’n hiva rakip chunga sip anleiti, khava lai khan antahmu rakip kha tûte hneng leihri mak hei.

³⁷Ajîng kania hmebunga inphut Jesu leh sonle inthum hei anjōngṭum pha mipui katamtak he’n Jesu anleiratō.

³⁸Mipui kâra inphut pase inkhat hong ka-ông, “Oja, kasapa ahong enpek roh, kasapa inkhat rōk kae!”

³⁹Rathla khan asur phatak leh ka-ônga, akei ra-ea ahlon mathlûk, abeia achiphōn amansōk a kae; arachi nenga masōvak mak ria kae.

⁴⁰Ke’n nasonlehei hneng antahnong sōt sik a kangek hei, tâk anmani’n leihnongsōt tor mak hei,” ati.

⁴¹Jesu’n amasôn, “Heituk taksenna kaneimak leh akaṭhe mi jo chei mo! Heituk kasôt mo ka-ompui sik chei? Heituk kasôt mo kadepui sik chei?” Khava sōa mipa hneng, “Nasapa kha hin heiṭhōi roh,” ati.

⁴²Naipang kha ahonglai khan ṭai khan akei ra-ea raleia amathlûk jo. Tâk-kha Jesu’n rathla kaṭhamak kha araseia, pasenai kha amandam jo, khana apa hneng apek joa kae.

⁴³Mi rakip ankhenga Pathen rathahrat kalentak chunga khan inlak ansak joa kae. Jesu ṭōntlohei rakip kha mihei khan inlak ansak a leika-om ṭhak hei, khava pha ama’n asonlehei hneng ati,

⁴⁴“Ke’n kamanthei sik chei hi mahngi mak ruh! Mihring sapa kha mihei ratha neina thōia a’npesōt sik jo kae.”

⁴⁵Tâk-kha sonle he’n hivahi leimanhret phâkmak hei. Khavakha anmanhret makna sik ale’n-ip inkhat kae, khana anmani’n antader sik um kaṭi heia kae.

⁴⁶Sonlehei kâra tu mo akalenpen sik ti jâra inkhena inkhat leika-om.

⁴⁷Jesu’n anmani tamandon kha amanhret a, naipang inkhat avaṭhōia anhnenga amanngir,

⁴⁸khana anhnenga ati, “Tu enum karahminga hiva naipang inhlâng mi khan kei arahlâng eng kae; tu enum kei inhlâng mi khan ani heikatirpa kha arahlâng kae. Ajârchu nangni kâra akasinpen kha akalenpen kae.”

⁴⁹John in, “Oja, narahminga ṭai kahnong sōt mi inkhat keini’n kanhmu, ama nikâra a’nvei mi a-emak jâra kankhâma kae,” ati.

⁵⁰Jesu’n ama hneng, “Khâm mak ruh, ajârchu tu enum nankadōimak mi kha nangni sik a a’nṭang kae,” ati.

⁵¹Jesu kha marvâna ṭhōisōtna sik ahnai jo pha Jerusalem jōn sik a amandon joa kae.

⁵²Ama’n tirle aleitir hei; ama sik heirakip anleimantlukna sik Samaria khō inkhat a kahlut jo hei.

⁵³Tâk-kha Jesu kha Jerusalem kajōna ase sik kha a’nchên jâra khana aka-om mihei khan leirahlâng mak jo hei.

⁵⁴Asonle Jacob leh John in kha anhmu pha ahnenga, “Rōngpu, marvâna inphut hmei kantabek mathlâk a romanhmang sik hei namadu mo?” anti.[1]

⁵⁵Jesu inheia arasei hei khana ati, “Nangni heikhong Rathla tâ chei mo inhret mak chei; ajârchu Mihring Sapa kha hringkhō inhmang sik akajōng changmak, tâk ankahuk sik a kae.”

⁵⁶Khava sōa Jesu leh asonlehei khōhlopting kase jo hei.

⁵⁷Anmani khan hlam a anselai, pase inkhat in Jesu hneng, “Nasena hmun rakip a jui che rong,” ahong ti.

⁵⁸Jesu’n ahnenga ati, “Ram-ui he’n khur annei, vahe’n rabu annei, tâk Mihring Sapa chu lu manhngatna sik hmun neimak.”

⁵⁹Khana ama’n mihlop inkhat hneng, “Ajui roh,” ati. Tâk-kha khava mipa khan ati, “Apu, ahma inkeia kapa kahre sik vase hi rong.”

⁶⁰Jesu’n amasôn, “Akathi he’n ankathi kha hre hei rasoh. Nang chu se roh Pathen rengram vahri manthang roh.” ati.

⁶¹Mihlop inkhat in “Apu, ke’n jui che rong; tâk ahma inkeia ka-innshung mihei inthla sik a vase hi rong,” ati.

⁶²Jesu’n ama hneng ati, “Tu enum hlei kakhōi inphut jo mi khan akahnung a-en male’nchu ama kha Pathen rengram sik ahnemna om mak.”