Read Komrem DÂNRABU INHNINA 10 Bible Online

DÂNRABU INHNINA 10 - Komrem bible

DÂNRABU INHNINA 10

¹“Khava sōa RŌNGPU’n kahnenga ahri, ‘Hma a kapōa hlungpek 2 kheng roh, khahei dana sik thingbôm inkhat syem roh. Tlâng chunga kahnenga hongke roh,

²khana nang in navōkkhōi hlungpek heia kaleimazet hei kha nang hlungpek heia khan kamazet nôk sik hei, khahei kha thingbôm shunga nada sik hei kae.’

³“Khava jâra ke’n acacia thing vâng bôm inkhat kasyema khana hma kapōa hlungpek 2 kakhenga tlâng chunga leikake eng.

⁴Khava sōa tlâng chunga nanlei intûp lai hmei kâra inphut ṭong aleihria aleipek chei Ṭongpek Sôm kha, RŌNGPU’n hma inkeia a’nzet kapōhrep a hlungpek 2 chunga amazet a kae. RŌNGPU’n hlungpek hei kha kei aleipek eng,

⁵khana kei hong inhe enga tlânga inphut jōng kaṭumsuk eng. Khava sōa RŌNGPU’n amanthei eng kapōhrep a thingbôm kasyem shunga khan kaleida jo hei, khana inphut khahei kha khanga laka-om heia kae.”

⁶(Jaakanhei tuikhur heia inphut Israel sahei kha leikasesōt hei, Mosera hmun a leikase hei. Khana khan Aaron kathi joa anhre jo, asapa Eleazar in ama kathlenga thempu kachang jo.

⁷Khana inphut Gudgodah a kase hei khana tui katluk a omna Jotbatha a katlung hei.

⁸Tlânga khan RŌNGPU’n Levi phunga pase rakip Ṭongtep Bôm ka-ensui sik alei kadeisōt hei, thempu changa ama inzen sik leh ama rahminga mahâmṭhat mi hnenga kapek sik a. Hihei hi tûn katlung anṭōn lakachanga kae.

⁹Khava jâra Levi phung in phung hlop hei kapōa ram chen neimak hei; RŌNGPU nan-Pathen in aleitep dungjuia anmani chen khachu RŌNGPU thempu achangna hnemna kha kae jo.)

¹⁰“Hma a kapōa, tlâng chunga khan sûn leh jân ni 40 leika-om eng. RŌNGPU’n vōi khat nôk kaderna arangei pek enga nangni suk manhmang makna sik kha leikahnōma kae.

¹¹Khava sōa nanpu-nanpahei hneng pek sik a ale’ntepna ram kha nanchen theina sik a hlam hrona nanhlam kakei sik a kei hneng amanthei eng.

¹²“Tûnchu, Israel mipuihei, RŌNGPU nan-Pathen in nangnia inphut angek mankhôk pen kha rangei jo ruh: RŌNGPU kha kamuk ruh khana ama ṭongpek rakip kha tlo ruh. Nanmalung pumpuia ama lungset ruh khana razen ruh,

¹³adân rakip jui ruh. Nangni ṭhatchômna sik a khahei kha tuning kapek jo chei kae.

¹⁴Marvân inshângpen kapha’m RŌNGPU ta kae; ralei leh achunga ka-om rakip hi’m ama ta kae.

¹⁵Tâk RŌNGPU’n nanpu-nanpahei alungsetna kha khang hrep a kangar, mihlop-hei kanek a nangni kha akadei chei khana tûn katlung ama kadeisōt lakachang chei.

¹⁶Kha achang inchu, tuna inphut RŌNGPU ṭongpek kha jui ruh, malung kasak kha hai jo ruh.

¹⁷RŌNGPU nan-Pathen hi ratha neina rakip leh pathen rakip chunga akahratpen kae. Ama akalen leh ratha kanei kae, ama chu ṭit sik kha kae. Ama’n ôtum neimak khana ama’n sêrmarûk sâk mak.

¹⁸Ama’n nu leh pa kase leh renghmeihei kaṭha razen hei sik a intluk; nimihei kâra ka-om khōhmehei kha alungset hei, bu leh pōn apek hei.

¹⁹Kha achang inchu, khōhmehei chunga lungset malâr ruh, ajârchu nangni’m Egypt a khōhme leikachang cheia kae.

²⁰RŌNGPU nan-Pathen ṭong jui ruh khana ama rōk kha kamuk ruh. Ahnenga taksenthei chang ruh khana ama rahming rōk a intepna nei ruh.

²¹Ama choi ka-ân ruh, ama nan-Pathen kae. Nangni sik a aleitlo ṭōn kalen leh ṭōn inlak-hei kha nanhmit khet in nanhmu jo.

²²Nanpusōn he’n Egypt a anleise lai ankhenga mi 70 rōk hei kae. Tâk tûnchu RŌNGPU nan-Pathen in marvân ârsi jahrep a amanpung jo chei.