Read Komrem DÂNRABU INHNINA 11 Bible Online

DÂNRABU INHNINA 11 - Komrem bible

DÂNRABU INHNINA 11

¹“RŌNGPU nan-Pathen kha lungset ruh khana pha rakip a ama dân rakip kha jui ruh.

²Tuning hin ama leh nan-inthoina shunga ama chungchânga manhretna nantachen hei kha mandonsōt ruh. Hiva manhretna kanei kha nangni chei kae, nansahei changmak. RŌNGPU lendân, aratha neina, atorna

³khana aṭōn inlak-hei kha nangni’n nanhmu. Ama’n Egypt reng leh aram shunga ṭōn khaseng atlosōt kha nanhmu.

⁴Heikhonga mo RŌNGPU’n Egypt sepeihei kha ahnong sōt hei, nangni anleihnong lai chei anshakorhei leh anshakor gârihei akhenga Tuipui Kasen a amanvursi hei kha nangni’n nanhmua kae. Nangni anleihnong lai chei khan.

⁵Hiva hmun nanheitlung mak hma nêrdiram thōia RŌNGPU’n heiralam mo nangnihei sik a atlosōt kha nanmanhret.

⁶Reuben phunga Eliab sapahei Dathan leh Abiram chunga heimo atlo kha mandon ruh. Mi rakip hmit-hmua ralei kakik khōia an-innshung, anpōn-inn, khana ansōk leh anran rakip hei leh alei made hei.

⁷Kadik, hiva RŌNGPU ṭōn kalen rakip akahmu khet khachu nangni chei kae.

⁸“Tuning kapek chei dân rakip hei hi jui ruh. Khan chu tuidung kha nanrakan tor sik khana nanhlutna sik ram kha nanhlō tor sik.

⁹Khana RŌNGPU’n nanpu-nanpahei leh ansōnhei pek sik a a’ntepna, haona leh ram ṭhatna shunga khan pha kasôttak ka-om sik chei.

¹⁰Nanta hlō sik ram kha hma nanlei omna Egypt kapō changmak. Khana khan, hmuchi nanvor pha hlei kha tui pekna sik a rahnak a a’nṭang chei kae;

¹¹tâk nanhlutna sik ram khachu khōtui vât lo tlâng leh phaicham ram kae.

¹²RŌNGPU nan-Pathen in a-ensuia kum katlung bit a atinta ram kha kae.

¹³“Khan chu, tuninga kapek chei ṭongpek-hei hi jui ruh; RŌNGPU nan-Pathen kha lungset ruh khana nanmalung pumpuia razen ruh.

¹⁴Khanga nantlo’nchu nanram shunga khō nanrangei pha ajōng mansûr sik, ṭhekhō leh zerkhō heia, khana nansik a hmuchi, vomhrui theiju, khana olive thai,

¹⁵khana nanranhei sik a phi kadông kasōk sik hei.

¹⁶Pathen hlop hei kamuk a razenna sik a hōnmathlak mak chei rasoh.

¹⁷Kha nantlo’nchu, nanchunga RŌNGPU ahnuk kana sik. Khōsûr ating sik, nanralei hmuchi kekna sik a kachârber sik. Khava pha ama’n apek chei ram kaṭha achang ravâng, khana khan inranga kathisō sik jo chei.

¹⁸“Hiva ṭongpek-hei hi invon ruh khana manlûr ruh. Mandon sōtna sik a nanbâna leh nanmachea khit hei ruh.

¹⁹Nansahei manthei hei ruh. Inna nan-om pha, vânga nan-om pha, nan-inhnga pha, ṭōn nantlo pha hihei chungchânga inbek ruh.

²⁰Nan-inn kot kacho leh nankekot heia mazet hei ruh.

²¹Khan chu RŌNGPU’n nanpu-nanpahei pek sik a atepna ram shunga nangni leh nansahei pha kasôttak ka-om sik chei. Ralei chungting bōirōk in a-omlai seng khana khan nangni ka-om sik jo chei.

²²“Ke’n kapek chei dân rakip taksentak a jui ruh: RŌNGPU nan-Pathen kha lungset ruh, aṭongpek rakip kha tlo ruh, ahnenga taksenthei chang ruh.

²³Khan chu hmalang ting nanjōn pha jât rakip hei kha ahnong sōt sik hei, nangni kanek a akalen leh akahrat jât-hei ram kha nanhlō sik a kae.

²⁴Nanke chōnna hmun rakip kha nangni ta kachang sik. Nangni kha, thlang tinga nêrdiram a inphut sak tinga Lebanon Tlâng katlung, nisōtinga Euphrates Tuidunga inphut tlaitlâk tinga Mediterranean Tuipui katlung sik kae.

²⁵Khava ram shunga nansena chen a RŌNGPU nan-Pathen in, aṭong leitep kapōa, mihring he’n nangni anmanṭit sik chei, tûte’num nangni tingtor mak chei ning.

²⁶“Tuning ke’n nangni mahâmṭhat leh hâksêrna kadeina sik a kapek chei,

²⁷tuninga kapek chei RŌNGPU nan-Pathen ṭongpek kha nanjui inchu, mahâmṭhatna kae;

²⁸tâk ṭongpek kha nanjuimak a, hmalaia nantakamuk phung hêrmak pathenhei kamukna sik a nan-inhesōt inchu, hâksêrna kae.

²⁹Nan-omna sik ram shunga RŌNGPU’n aṭhōi manhlut chei pha, Gerizim Tlânga inphut mahâmṭhatna kha nanta phông sik kae khana Ebal Tlânga inphut hâksêrna kha nanta phông sik kae.

³⁰(Hiva tlânghei hi Jordan Phaichama aka-om Canaanhei ram shunga, Jordan Tuidung tlaitlâk ting aka-om hei kae. Gilgal khōpui hnenga More thingkung intheng heia inphut hlarei loa, tlaitlâk ting ka-om hei.)

³¹RŌNGPU nan-Pathen in apek chei ram kha hlōna sik a Jordan Tuidung re akake sik chei kae. Hivahi nanloa nanhlō pha,

³²tuning ke’n kapek chei dân rakip hi juina sik a intluk ruh.