Read Komrem DÂNRABU INHNINA 12 Bible Online

DÂNRABU INHNINA 12 - Komrem bible

DÂNRABU INHNINA 12

¹“Nanpu sōnhei Pathen, RŌNGPU’n, apek chei ram shunga nan-omlai seng nantajui sik dânhei kha hinahin ka-om.

²Nangni’n nanta lo sik ram a khan, tlâng inshâng chunga, hme inshâng chunga, thingkunghei thōia, mipuihei pathen kamukna hmun rakip hei kha suk manhmang hei ruh.

³Anmaichâm rakip ṭhet pek hei ruh, anhlung kacho intheng hei kha ahar-ahak a vōkkhōi hei ruh. Khava hmun heia khan ahei tik a avea ankamuk makna sik heia Asherah pathennu rahming mazetna hei kha ro pek hei ruh, anlim hei kha tuk rachen hei ruh.

⁴“Hiva mihe’n an-pathen antakamuk kapōa RŌNGPU nan-Pathen kha kamuk mak ruh.

⁵Nanphung rakip hei ram shunga khan RŌNGPU’n hmun inkhat akadei sik khana khan mipuihei ama hmaikunga akahong heia antakamuk sik kae.

⁶Khana khan nangni inthoinahei nantatōk sik kae, ro manvâm sik hei leh nangni inthoina ralak-hei, sôma inkhat hei khana tōknahei, RŌNGPU hneng nan-intepna kutchoihei, nanracham tak a tōknahei, nanran leh kemōng a’nte masa hei.

⁷Khana khan nangni mahâmṭhat nankapek, RŌNGPU nan-Pathen hmaikunga, nangni leh nan-innshung in nanṭōn tlona kara akaṭha kha nantasâk a nanta hōipui sik kae.

⁸“Khava pha kha ahong pha, nangni taleitlo kapō kha nanta tlomak sik jo kae. Tûn kapha nangni maduna hrep a nanla kamuk,

⁹ajârchu nangni kamōnga nan-omna sik a RŌNGPU nan-Pathen in apek chei ram shunga lahlut mak chei.

¹⁰Jordan Tuidung re nanke pha, RŌNGPU’n ram kha amanhlō sik chei khana aman om sik jo chei. Nan-indōipui rakip a inphut ahuk sik chei khana kamōnga ka-om sik jo chei.

¹¹RŌNGPU’n ama kamukna sik a hmun inkhat akadei sik, khana khan kaṭong pek chei kapōa nantaheichoi sik kae: ro manvâm sik a nan-inthoina leh inthoina ralak-hei, sôma inkhat leh tōk sik hei, RŌNGPU hnenga nan-intepna ahlopdet kutchoihei.

¹²Khana khan ama hmaikunga, nansahei leh nansōk-hei khana nankhōpuia ka-om Levihei leh inpâk ruh; Levihei chu ram chen neimak hei ning, manhret ruh.

¹³Nangni takadeina hmun a inthoina tōk theimak tin chei;

¹⁴Nanphung kâra mi inkhat in ram shunga, RŌNGPU’n akadeisōt sik hmun inkhat rōk a khan tōkna nantanei sik kae. Kaṭong pek chei kapōa romanvâmna leh tlo sik rakip khava hmun rōk a khan inthoina nantatōk sik kae.

¹⁵“Tâk nan-omna hmun rakip a nanranhei nanthat a nansâk thei sik. RŌNGPU’n apek chei dungjuia nansâk theia kae. Shakhiche a-emak leh raki kanei hme nantasâk kapōa, beklanga a’ntheng leh a’nthengmak nankhenga nansâk thei sik.

¹⁶Tâk anthisen chu thlaisâk a nanta hmangmak sik kae; tui kapōa raleia nanta maser sik kae.

¹⁷RŌNGPU hnenga nantatōk heikhat kha nan-omna hmun a khan sâk mak sik kae: hmuchi sôma inkhat, vomhrui ju, olive thai, se leh kemōng hma inkeia a’nte, RŌNGPU hneng intepna kutchoi, rachamtak a tōkna, khana aralak inthoina rakip anchanga.

¹⁸RŌNGPU nan-Pathen in kamukna sik a akadei hmun a khan RŌNGPU nan-Pathen hmaikung rōk a hiva inthoinahei hi nangni leh nansahei, nansōk-hei, nankhōpuia ka-om Levihei leh nantasâk sik kae. Nanṭōn tlona rakip a khana khan inpâkna nanchen sik.

¹⁹Nanrama nan-om kârseng Levihei kha heite saklo nantlo makna sik a intluk ruh.

²⁰“RŌNGPU nan-Pathen in nanramri akake manlen pha, ama’n ṭong aleitep pek chei kapōa, nangni’n ran hme nanmaduna hmuntina nansâk thei sik.

²¹Kamukna sik hmun kha ahlarei inchu, nanmaduna hmuntina, RŌNGPU’n apek chei ran a-emak leh kemōng nanthat theia kae, khana ahme kha nan-inna, kamanthei chei kapōa, nansâk thei sik.

²²Mi inkhat in shakhi a-emak leh raki kanei hme asâk kapōa, tu inkhat beklanga a’ntheng leh a’nthengmak in khava hme kha asâk thei sik.

²³Thisen alaka-om hmeravōi rōk chu sâk mak ruh, ajârchu hringna hi thisena ka-om, hringna kha hme leh inṭhōia nantasâk mak sik kae.

²⁴Thisen kha thlaisâk a hmangmak ruh; khava kanek a tui kapōa raleia maser ruh.

²⁵Hiva ṭongpek hi nanjui inchu RŌNGPU’n nanchunga katlâi sik, khana nansōn nanpâr hei sik a akaṭha kachang sik.

²⁶RŌNGPU hneng pek sik a nan-intepna kutchoi leh tōknahei kha kamukna hmun inkhat a choi ruh.

²⁷Khava khan RŌNGPU maichâma romanvâm inthoina sik tōk ruh. Maichâm chunga thisen nantabun leh ahme nantasâk inthoinahei kha’m tōk hei ruh.

²⁸Ke’n kapek chei ṭongpek-hei hi taksentak a jui hei ruh, khan chu nansōnhei leh nangnihei sik a ahei tik a akaṭha kachang sik, ajârchu RŌNGPU nan-Pathen tlaina sik akadik kha nantlo sik jo.

²⁹“Miram a re nanvatlo pha RŌNGPU nan-Pathen in jât-hei kha amanram sik hei, khavakha nanhlōa ka-om sik chei.

³⁰RŌNGPU’n jât-hei amanhmangsō kahnunga, anmani bekdân kha jui makna sik tlo ruh, ajârchu thitheina kachang sik. Anmani kapōa kamuk theina sik a, heikhong mo an-pathen antakamuk tia manhretna sik tlomak ruh.

³¹Anmani pathen antakamuk kapōa RŌNGPU nan-Pathen kha kamuk mak ruh, ajârchu anmani pathen kamukna khan RŌNGPU’n amater omchen rakip antloa kae. Anmani’n ansahei kapha’m maichâma hmeishunga inthoina sik antōk heia kae.

³²“Ke’n ṭong kapek chei rakip hei kha tlo ruh, heite hapsa leh losōt tlomak ruh.