Read Komrem DÂNRABU INHNINA 13 Bible Online

DÂNRABU INHNINA 13 - Komrem bible

DÂNRABU INHNINA 13

¹“Sânkathem achangmak leh rahmang inle he’n ṭōn-inlak leh det-hla ka-om manhmuna sik cheia intepthei hei,

²nantalei kamuk phungmak pathen kamukna sik leh razenna sik hrep a. An-intepna kha ahong diktak inum,

³anhnenga nanmalung manhlut mak ruh. RŌNGPU nan-Pathen in enmansinna sik ahmang hei kae, nanmalung pumpuia RŌNGPU kha nanlungset nâk mo ti kha enna sik a kae.

⁴RŌNGPU kha jui ruh khana kaja ruh; aṭong jui ruh khana aṭongpek-hei kha nit ruh, ama kamuk ruh khana ahnenga taksenthei chang ruh.

⁵Nansōk changna Egypt a inphut nankahuksōt RŌNGPU dōina sik rahmang inle khana sânkathemhei kha that hei ruh. Khang khava mihei kha ṭhamak hei, RŌNGPU’n nangni hringdân sik aṭong pekna cheia inphut nan-inhesōtna sik ankei cheia kae. Khava ṭhatmak a inphut nan-inhesōt theina sik anmani kha that sik hei kae.

⁶“Nansōpui, nansapa, nansanu khana nantalungset nannuhmei khana nanṭhōn madupen he’n marûk a pathen hlop, nanpu nanpa he’num anta leikamuk mak, kamukna sik a anjôr thei chei.

⁷Anmani kâra inkhat in nanhnenga ka-om a-emak leh hmun kahlatak a ka-om hei pathenhei kamukna sik a ajôr thei chei.

⁸Tâk amapa leh amanu jôrna cheia khan hnōmpek mak hei ruh. Anṭong rangei pek mak hei ruh. Lungsetna leh maritna anhnenga malârmak ruh khana hrungmak hei ruh.

⁹That hei ruh! Anmani hlung vâng denghlonna khan hmakakei chang ruh, khava sōa mi rakip in hlung vâng denghlon hei rasoh.

¹⁰Anthina sik a denghlon hei ruh! Sōk nanlei changna Egypt a inphut nankahuksōt RŌNGPU nan-Pathena inphut ṭhōisōtna sik a antlo sik.

¹¹Khava sōa Israel mipui rakip in heimo akasōk kha anthei sik; anmani kaṭi sik hei, tu inkhat in khava kapō ṭhatmak kha tlohêr mak jo hei ning.

¹²“RŌNGPU nan-Pathen in nangni hneng apek sōt chei khōpui heia nangni’n nan-om pha, nangni’n nanthei sik,

¹³khachu rahōi kasōkmak nanjât mi ajing in ankhōpuia mihei kha ahei tik a nantahei kamuk mak pathen kamukna sik a akaletting anṭhōi sik hei.

¹⁴Hiva kapō ṭongse hi nangni’n nanthei pha, kaṭha nenga jongsui ruh; hinghiva hi kasōk jo ti hi adik inchu,

¹⁵khōpuia ka-om mi rakip leh anran rakip he’m manrampet hei ruh. Khava khōpui kha suk manram ruh.

¹⁶Khava hmun a ka-om hei nei leh hao rakip heichoisōt ruh khana khōpui telaia buk ruh. Khava sōa khōpui leh ashunga ka-om rakip RŌNGPU nan-Pathen hneng inthoina kapōa ro manvâm ruh. Khavakha pha rakip sik a manhmang thang sik kae khana ave nôk a saksōt mak sik jo kae.

¹⁷Manhmang sik a maset jo neinâk inkhatbek nangni sik a inda mak ruh, khan chu RŌNGPU’n ahnuknat a inphut hong inhe sik a kha alungsetna kha amanhmu sik chei. Nanpu-nanpahei hneng ale’ntepna kapōa,

¹⁸tuning nanhnenga kapek chei ṭongpek rakip hi nanjuia amadu kha nantloa achang inchu, nangni alungset sik chei khana amanpung sik chei.