Read Komrem DÂNRABU INHNINA 15 Bible Online

DÂNRABU INHNINA 15 - Komrem bible

DÂNRABU INHNINA 15

¹“Kum 7 tlukna achaina kataia nansêr kabat hei kha nanta rangei mandam sik hei kae.

²Hivahi hinga tlo sik kae. Israel changpui hei hneng sêr inpûk mi rakip in bat kha antabâng sik kae; sêr antakhôm mak sik kae; RŌNGPU ama khet in bat bângna kha aphôngsōt sik.

³Ramlak mihei tabat chu nankhôm thei sik, tâk nanmi tu inkhat tabat chu nantaṭhei mak sik kae.

⁴“RŌNGPU nan-Pathen in apek chei ram a khan nangni mahâmṭhat apek sik chei. Nanmi inkhatbek um sara changmak hei ning,

⁵aṭong nanjuia tuninga kaṭong pek chei hei inrintak a nannit inchu.

⁶RŌNGPU’n ale’ntepna dungjuia mahâmṭhat apek sik chei. Jât-hlop mi katamtak hnenga sêrpûk nansem sik, nangni’nchu tûte nei pûkmak tin chei; jât-hlop katamtak chunga vai nanrôn sik, tâk jât tûte inkhat in nangni chunga vai rônmak hei ning.

⁷“RŌNGPU nan-Pathen in apekna chei ram a khōpui heia nan-Israel changpui mi kachâm inkhat a-om inchu, nanbing rōk sik a mandon mak ruh, inthōpui loa om mak ruh.

⁸Khava kanek a, pek a them ruh, amaduchen kha manpûk ruh.

⁹Bat bângna kum ahong hnai jâra ahnenga heikhat manpûk sik hnōm mak tlomak ruh. Khava ṭhatmak kha mandon mak ruh. Sêrpûk nanpek hnōm mak inchu, ama’n RŌNGPU hneng nangni kadōia kaṭap sik, akaṭhe kachang sik chei.

¹⁰Mankasea maner loa pek ruh, RŌNGPU’n nantlona rakip chunga mahâmṭhat apek sik chei.

¹¹Sara khōdeng kathei Israel ṭhahrep nankâra hong ka-om ṭhak sik hei, khava jâra anhnenga pek themna sik ṭong kapek chei kae.

¹²“Nan-Israel changpui pase achangmak leh nuhmei sōk inkhat sik a abinga nanhnenga a’njōr inchu, kum 6 nanṭōn atlosō pha nangni’n ama nantamasō sik kae. Kum 7 ahongtluk jo pha, ama aning ahnōma nantamasō nger sik kae.

¹³Nanmasō hei pha, kut karōk a manse mak hei ruh.

¹⁴RŌNGPU’n mahâmṭhat apek chei khana inphut kut kayâng tak a pek hei ruh — kemōng, sâng leh vomhrui juhei.

¹⁵Egypt a nangni sōk nanlei changna inphut RŌNGPU nan-Pathen in amasō chei kha mandonsa ruh; khava jâra ke’n tûn hiva ṭong hi kapek chei kae.

¹⁶“Tâk nansōk khan sesōt sik madu mak um aya; nang leh nan-innshung mi alungset cheia om male sik a intluk thei.

¹⁷Ama kha nankot kunga ṭhōi ruh, khana khan akōr vitpek ruh; ahringkhōa nansōk kachang sik jo. Nansōk nuhmeihei chunga hinga in-anghrep a tlo ruh.

¹⁸Sōk inkhat nanmasō pha nanhnuk manse mak ruh; hei-achang inum, sōk khan kum 6 rathanek sōk inkhat hlō aṭimhrep aloa arazen chei kae. Hi tlo ruh, nantlona rakip a RŌNGPU nan-Pathen in vâng apek sik chei.

¹⁹“Nanse leh kemōng a’nte masa ache rakip RŌNGPU nan-Pathen sik a ṭhensōt ruh; hiva ranhei hi inkhatbek ṭōn tlona hmangmak hei ruh, anhme vomak hei ruh.

²⁰Kamukna hmun inkhat a RŌNGPU hmaikunga akum katai nangni leh nan-innkō he’n nantasâk sik hei kae.

²¹Tâk ran kha nōrna heikhat anei inchu, ake inkhôi, ahmit kacho khana alak nōrna kakhôk anei inchu, RŌNGPU nan-Pathen hneng inthoina nanta hmangmak sik kae.

²²Khava kapō ranhei kha nan-inna nansâk thei sik hei. A’ntheng leh a’nthengmak nankhenga, shakhi leh kazuk hme sâk kapōa nansâk thei sik hei.

²³Tâk anthisen khachu sâkthlaia hmangmak ruh; khava kanek a tui kapōa raleichunga sun mathla ruh.