Read Komrem DÂNRABU INHNINA 16 Bible Online

DÂNRABU INHNINA 16 - Komrem bible

DÂNRABU INHNINA 16

¹“Tebe thla shunga Rakan Kût nit una RŌNGPU nan-Pathen kajana nei ruh; Egypt a inphut alei huksōt chei kha khava thla jân inkhat a kae.

²RŌNGPU nan-Pathen kajana Rakan Kût revei sik a kamukna hmun inkhat a se ruh khana nankemōng a-emak leh se inkhat that ruh.

³Hiva thlai hi nansâk pha, che inphi buhlom sâk mak ruh. Ajârchu inhnottak a Egypt ram nanhei dahlon pha nanta leitlo kapōa, sûn 7 che philo buhlom nantasâk sik kae. Hivahi sâk ruh, hivahi inrengna buhlom anti sik kae, khava inrengna hmun Egypt a inphut nanheisōkna kani kha nanhring lai seng nanmandonsōtna sik a kae.

⁴Ajârchu nanram shunga khan ni 7 shunga che inti tûte inkhat inna nantada mak sik kae; khana kani hma-inkei ninga khōhleia a’nthat ran hme kha khava jânbât a nantasâk sik kae.

⁵“Rakan Kût ran kha kamukna hmun inkhat a that hei ruh, RŌNGPU nan-Pathen in apek sik chei ram shunga hmun ralak a changmak. Egypt ram nanhei dahlona pha, kani tlâk phatak a tlo ruh.

⁷Hme kha kamukna hmun inkhat a sōng una sâk ruh; ajînga jîngkâra nan-inna inle ruh.

⁸Ajârchu abân ni 6 shunga che philo buhlom nantasâk sik kae, ni 7 tluk ning khan RŌNGPU nan-Pathen inmuk sik a intûp ruh, khava ning ṭōn tlomak ruh.

⁹“Sâng nankhôm manphut a inphut Kanive 7 tei ruh,

¹⁰RŌNGPU nan-Pathen in mahâmṭhat apek chei dungjuia nanracham tak a tōkna kha heichoi una ama kajana Sakhôm Kût nit ruh.

¹¹Nankhōpuia ka-om nansa, nansōk, Levi, khōhme, nu leh pa kase, renghmeihei leh RŌNGPU ângkunga inpâk ruh. Hivahi kamukna hmun inkhat a tlo ruh.

¹²Hiva ṭongpek-hei hi juina sik a intluk ruh; Egypt a sōk nanlei changna kha mahngi mak ruh.

¹³“Sachi hmuchi nanvōk sōa, nanvomhrui thei nan-ep sōa, ni 7 Rabuk Kût kha hmang ruh.

¹⁴Khavakha nankhōpui shunga ka-om nansa, nansōk, Levi, khōhme, nu leh pa kasehei, khana renghmeihei leh inpâkna nei ruh.

¹⁵Kamukna hmun inkhat a ni 7 revei kha hmang inna RŌNGPU nan-Pathen kajana nei ruh. Inpâk ruh, ajârchu RŌNGPU’n nansâng khôm leh nanṭōn tlo chunga mahâmṭhat apek chei.

¹⁶“Kamukna hmun inkhat a, kum khat shunga RŌNGPU kamukna vōi 3 pase rakip akahong nger sik chei kae: Rakan Kût, Sakhôm Kût khana Rabuk Kût heia. Pase rakip in kutchoi inkhat et anta heichoi sik kae.

¹⁷RŌNGPU nan-Pathen in mahâmṭhat apek dungjuia atorhrep kha ahei choi sik kae.

¹⁸“RŌNGPU nan-Pathen in apek chei khōpui heia vaikarôn leh ṭongkatan alak kadei hei ruh. Hiva mihei hin ôtum neilo jen a ṭong antatan sik kae.

¹⁹Anmani’n ṭong antan pha, dikmak antatlo mak sik khana ôtum antanei mak sik kae; marûk sêr antarahlâng mak sik kae; ajârchu kutchoi hin mikasing leh malung intheng hei hmit amanchoa dik loa ṭong mathlakna amannei heia kae.

²⁰Ahei tik a a’ntheng leh akadik chang ruh, RŌNGPU nan-Pathen in apek chei ram kha nanhlōa nan-om ṭhak theina sik a.

²¹RŌNGPU nan-Pathen maichâm inkhat nansyem pha, ahnenga thing vâng a’nsyem Asherah pathennu limsyem matung mak ruh.

²²Khana limsyem kamukna sik a hlung kacho inkhatbek matung mak ruh, RŌNGPU’n ahōt heia kae.