Read Komrem DÂNRABU INHNINA 17 Bible Online

DÂNRABU INHNINA 17 - Komrem bible

DÂNRABU INHNINA 17

¹“Nōrna kanei sehrat a-emak leh kemōng kha RŌNGPU nan-Pathen hneng inthoina neimak ruh; hivahi RŌNGPU’n amater.

²“Tekhing inkhat a nankhōpui inkhat a pase a-emak leh nuhmei ṭhahrep in RŌNGPU kadōia ṭōnse antloa aṭongtep ansuk ṭhe jo;

³RŌNGPU ṭongpek changloa, pathen lak a-emak leh kani, thla, ârsi akamuk arazen jâra.

⁴Ṭong hi nanthei inchu kaṭhatak a jongsōt ruh. Israelhei kâra ṭhatmak kasōk hi adik jo’nchu,

⁵khava mi kha khōpui vângting ṭhōisōt a hlung vânga denghlon ruh.

⁶Tâk, ama kadōia sâkhi 2 achangmak leh 3 anngir leh rōk a ama kha that thei kae; inkhat rōk in sâkhi apek inchu that mak sik kae.

⁷Sâkhi he’n hmatak a hlung vâng andeng sik, khava sōa mipui he’n andeng sik; hing’hin tloa hiva ṭhatmak hina inphut a’nphesōt sik chei kae.

⁸“Ṭong kasōk ṭhahrep chu khōshunga ṭongkatanhei sik intak hêr thei, khahei khachu, karōi chunga ratha neina, taksa intuk inthana, khana mi thatna, leh intlukdek a mithatna hei ahlop-hlop chungchânga. Hi asōk inchu, RŌNGPU nan-Pathen in akadeisōt kamukna hmun inkhat a se ruh,

⁹khana khava laia ṭōnkarôn levi thempu leh ṭongkatanhei hnenga nanṭong kha hri ruh, anmani’n mandon hei rasoh.

¹⁰Anmani’n ṭong mathlakna annei sik, anmani mantheina che kha natlo sik kae.

¹¹Anmani ṭongkam kha hnōm ruh khana anmansena heirakip kha jui ruh.

¹²Aṭōn karôn ṭong katanpa a-emak leh thempu tahri kajuimak mi kha that sik kae, hing’hin hiva ṭhatmak hi Israel heia inphut nanta losōt sik kae.

¹³Khava sōa mi rakip in antaṭhe sik kha anṭit sik jo, tûte inkhat in khanga tlo ngammak jo hei ning.

¹⁴“RŌNGPU nan-Pathen in nanhnenga apek sik chei ram kha nangni’n nanhlō pha khana nangni nanva om pha, nankimvea ka-om jât-hlop hei kapōa nangni’n reng inkhat neina sik nanhei mandon sik.

¹⁵Reng sik a nantakadei mi kha RŌNGPU’n akadei kha manchang ngar ruh. Ama kha nanmihei kâra inkhat akachang nger sik kae; miram mi inkhat nanreng manchang mak ruh.

¹⁶Reng khan aremi sik ashakor katamtak anei sik changmak, Egypt a mi atira shakor ava manchôk sik hei changmak, ajârchu RŌNGPU’n amihei khana khan ahei tik a inlemak hei ning aleiti.

¹⁷Reng in nuhmei katamtak aneimak sik kae, ajârchu hivahin RŌNGPU a inphut aman hesōt sik; khana sana dangka neia haona sik atlo sik changmak.

¹⁸Reng ahongchang pha, Pathen dân leh mantheina lekharabu inkhat levi thempuhei taleida lekharabu marōa inphut a’nsyemsōt kha anei sik kae.

¹⁹Khava rabu kha ahnenga ada sik khana ahringkhōa atei sik, RŌNGPU kajana aneina sik leh khava shunga ṭongpek rakip taksen theitak a ajuina sik a kae.

²⁰Hivahin Israel in milak-hei kanek a kaṭhadet eng tina leh heikhat a RŌNGPU juimakna kha, mannei mak ning. Khan chu ama’n kum katamtak vai arôn sik, khana asōn he’n khang katamtak Israel chunga vai anrôn sik a kae.