Read Komrem DÂNRABU INHNINA 18 Bible Online

DÂNRABU INHNINA 18 - Komrem bible

DÂNRABU INHNINA 18

¹“Thempu phung Levi he’n Israel shunga ram chen neimak hei ning; khava kanek a, RŌNGPU hnenga tōkna leh inthoina ralak heivâng akahring sik hei kae.

²Phung ralak-hei kapōa anmani ram neimak hei ning; RŌNGPU intepna kapōa, anmani chen khachu RŌNGPU thempu changna ahnemna kha kae.

³“Se leh kemōng tōkna a-om pha, thempuhei kha adâr, arakam, khana aphum antapek sik hei kae.

⁴Ahma inkeia hmuchi, vomhrui ju, olive thai, khana shahme hei kha anmani’n antachen sik kae.

⁵RŌNGPU’n nankhenga kâra inphut Levi phung kha thempu amanchanga ahei tik a ama inzen sik a akadeisōt kae.

⁶“Amadu inchu Levi inkhat in Israel khōpui inkhat a inphut kamukna hmun inkhat a kahong thei sik.

⁷khana khan RŌNGPU apathen kha, khava hmun a ṭōnkatlo Levi ralak-hei kapōa, thempu inkhat kachanga arazen thei sik a kae.

⁸Thempu ralak-hei leh in-anghrep a thlai chen kha ahmu sik kae, heirakip a-innshung he’n anta heimanrôn kha a-inda sik kae.

⁹“RŌNGPU nan-Pathen in apek chei ram a nanvahlut pha, khana aleika-om jât-hei mater ka-om chôndân kha neimak ruh.

¹⁰Nanmaichâm chunga hmeishunga nansahei kha inthoina tōkna neimak ruh; nanmihei kha ṭong sânna, kutje enna, dôi ṭong manchamna,

¹¹mithlimna mantlomak hei ruh, khana kathi rathla inbek puina mantlomak hei ruh.

¹²Hiva mater ka-oma katlo mihei kha RŌNGPU nan-Pathen in ahōt hei, hiva jâra hin nangni’n hma nanhei jōn pha khava ram a inphut jât-hei kha ahnong sōt hei kae.

¹³RŌNGPU hnenga pui katluk a taksenthei chang ruh.”

¹⁴Khava sōa Moses’n ati, “Nan-omna sik ram a khan, tlâ kasânhei leh kutje ka-en hei mansena mihe’n anjuia kae, tâk RŌNGPU nan-Pathen in hivahi hnōm mak.

¹⁵Khava kanek a, nanmihei kâra inphut kei kapō sânkathem ahei tir pek sik chei, ama ṭong kha nantajui sik kae.

¹⁶“Sinai Tlânga nangni nanlei intûp lai khan, RŌNGPU ṭonghri avea rangei makna sik a khana ama’n hmei inkhat a aka-om kha avea hmu makna sik a nanlei der, ajârchu kathi sik ung tia nanlei ṭit.

¹⁷Khava jâra RŌNGPU’n kahnenga aleiti, ‘Anmani’n kasing tak a derna annei jo.

¹⁸Anmani kâra inphut nang kapō sânkathem inkhat katirpek sik hei; heimo hri sik kha ke’n kamanthei sik, khana ama’n mipuihei kha heirakip amanthei sik hei.

¹⁹Kei rahminga ṭong ahri sik, khana aṭong kajuimak kha ke’n karâkna kapek sik.

²⁰Tâk ke’n ṭong pekna neilo enga sânkathem tu inkhat in kei rahminga ṭong ahringam inchu, khava sik a akathi nger sik kae, khana pathen ralak rahminga ṭongkahri sânkathem tu inkhat kha’m khanga tlo sik hei kae.’

²¹“Sânkathem ṭongrôn kha RŌNGPU a inphut achangmak pha heikhonga mo nantamanhret tor sik ti kha inlak nansak thei.

²²Sânkathem inkhat in RŌNGPU rahminga aṭongsōt inchu khana aṭong kha adikmak jo’nchu, khavakha RŌNGPU ṭong jōng tir kha changmak jo. Khava sânkathem kha abing ratha neina vânga akaṭongsōt kae, nantaṭit sik changmak.