Read Komrem DÂNRABU INHNINA 19 Bible Online

DÂNRABU INHNINA 19 - Komrem bible

DÂNRABU INHNINA 19

¹“Anram apek sōt sik chei mipuihei kha RŌNGPU nan-Pathen in amanramsō hei pha khana ankhōpui leh an-inn nanhlōa khana khan nan-om pha,

²ram kha chen thuma ṭhensōt ruh, inkhat et a kabeitak a tlung theina khōpui inkhat et antanei sik kae. Khava sōa mi inkhat kathat jo mi khan inhukna sik a khōpuihei kâra inkhat a katlân inhlut theia kae.

⁴Mi inkhat in a’nrepui changlo mi inkhat manhret manloa athat inchu, hiva khōpui inkhat a katlân inhlut thei khana inhukthei sik.

⁵Manhret thei inkhat a, mi 2 hei ratu shunga thing katuk anse inchu, inkhatpa khan thingkung atukna, ahrei kha inthingsōt jo sona aloipa kha athat jo’nchu, khava khōpui 3 kâra inkhat a katlân inhlut thei sik khana inhuk theia kae.

⁶Khōpui inkhat rōk a-om inchu, khavakha kahlarei sik jo, mi that jâra phu kahlō hnōm innkō khan ama kha asur thei khana ahnuk natna khan ṭhenakase avenpa kha athat theia kae. Hei-achang inum, a’nrepui changlo avenpa aleithat kha manhret manloa kae.

⁷Hiva jâra hin khōpui inthuma ṭhensōt sik hi ṭong kapek chei kae.

⁸“RŌNGPU nan-Pathen in nanram amanlensōt pha, ama’n tlo sik a nanpu-nanpahei hneng aleihri kapōa, alentepna ram rakip apek chei pha,

⁹khōpui 3 nanta kadeisa nôk sik kae. (Tuning kapek chei ṭong hi nantlosōt inchu khana RŌNGPU nan-Pathen kha nanlungset inchu, khana ama mantheina dungjuia nanhring inchu, hiva ram hi apek sik chei)

¹⁰Ṭhenakase hei anthi makna sik, RŌNGPU’n apek chei ram shunga anmani thatna jâra themmô nanchen makna sik, hivahi tlo ruh.

¹¹“Tâk tekhinga mi inkhat in a’nrepui inkhat enkada jâra athat mông jo, inhukna sik a khava khōpui inkhat a katlân jo.

¹²Khanga khan chu, ama khōpuia hlamkakei he’n ama kha ajongsōt a, ama kha thatna sik a, phu kahlō sik innshunghei hneng antapek sōt sik kae.

¹³Ahnenga lungset malârmak ruh. Heirakip ṭhatthei achangna sik a, Israel a hiva mikathatpa hi damak ruh.

¹⁴“RŌNGPU nan-Pathen in apek chei ram shunga tenlaia ale’nphunsōt nanvenhei ramri kha thonmak ruh.

¹⁵“Ṭōnse inkhat a, mi inkhat manṭhena sik sâkhi inkhat rōk chu tlukmak; mi inkhat in ṭhena anei jo tina sik akatlômpena sâkhi 2 chu arangei.

¹⁶Mi inkhat in dik lo maherna vâng mi inkhat manṭhe sik a arei inchu,

¹⁷An-inhnia kamukna hmun inkhat a akase heia ṭōnkarôn thempu leh ṭongkatan he’n anta enmansin sik hei kae.

¹⁸Ṭongkatan he’n kaṭhadek a anjongsui sik; mi inkhat in a-Israel changpui inkhat hneng dik loa maherna anei mo ti kha,

¹⁹alei maherpa karâkna chen sik kha khava mi khan arahlâng sik kae. Hing’hin hiva ṭhatmak hi nantadahlon sik kae.

²⁰Khan chu mi rakip in heimo akasōk kha anthei sik jo; kaṭi sik hei, khang khava ṭhatmak kha tûte inkhat in avea tlomak jo hei ning.

²¹Khava khanchu lungsetna malârmak ruh; karâkna kha hringkhō sik a hringkhō, hmit sik a hmit, ha sik a ha, kut sik a kut, khana ke sik a ke akachang sik kae.