Read Komrem DÂNRABU INHNINA 2 Bible Online

DÂNRABU INHNINA 2 - Komrem bible

DÂNRABU INHNINA 2

¹RŌNGPU ṭongpekna kapōa, atorna a eini inhe mea Agaba Tuirakir hlamdunga nêrdiram shunga leikase me, khana pha kasôttak Edom tlângrama leikalôn mea kae.

²“Khava sōa RŌNGPU’n amanthei eng,

³khachu khava hmebung kimvea pha kasôtpang kalôn jo mea khana sak intongting eini akase sik me kasōk jo.

⁴Ama’n mansenahei hi nangni hneng pek sik a amanthei eng, ‘Nangni nan inkârpui sōpui Esau sōnhei ram Edoma tlângram heia akase sik chei kae. Anmani’n anleiṭit sik chei,

⁵tâk anmani chunga re tukmak ruh, ajârchu ke’n anmani ram so metre inkhat tahōm ramhar bek um pek mak chei ning. Esau sōnhei hneng Edom kha kapek jo hei.

⁶Nangni’n sâk leh inchu anhnenga inphut nanrachôk thei sik.’

⁷“RŌNGPU nan-Pathen in nantlona rakip a heikhonga mo ṭhatthei apek chei kha mandonsōt ruh. Hiva nêrdiram nanleilôn lai khan ama’n alei ensui chei. Khava kum 40 shunga khan ama’n aleiompui chei, khana nanta rangei rakip um nanlei chen.

⁸“Khava jâra eini khanga kalôn mea Elath leh Eziongeber khōpui heia inphut Tuipui Kathi jōnna hlam kha nilei dahlon jo, khana eini Moab kajōna sak-nisōting inhei jo me.

⁹RŌNGPU’n kahnenga aleihri, ‘Lot sōnhei, Moab-hei kha manbōi mak hei ruh, khana ankadōia re phutmak ruh. Ar khōpui kha anhnenga kapek jo hei, khana anram inkhatbek um nangni pek mak chei ning.’ ”

¹⁰(Ar khōpuia khan Emim inti mipum kalen leika-om hei. Anakim, mipum kalen jât-hlop hei kapōa lei inshâng pet hei.

¹¹Anakimhei kapōa anmani hi’m Rephaim tia le’nhret hei; tâk Moab he’nchu Emim mi anti hei.

¹²Hor he’n Edoma leika-om hei, tâk pha hnung kakhôra Israel he’n an-inrepuihei kha RŌNGPU tapek ram a inphut antahnong sōt hei kapōa, Esau sōn he’n anhnongsōt hei, anphung anmanram pek hei, khava hmun a khan anmani vaka-om jo hei.)

¹³“Khava sōa RŌNGPU’n tlo ruh ati kapōa Zered Tuidung kha nirakan jo.

¹⁴Hivahi Kadesh Barnea nihei dahlonsōa kum 38 katluk jo. RŌNGPU’n anmani khanga kachang sik hei tia aleihri kapōtak a, khava khang shunga re katuk pase rakip kathi jo hei.

¹⁵RŌNGPU’n anmani asuk manhmangsō mak kârseng aleidōi ṭhak hei.

¹⁶“Anmani anthisō kahnunga,

¹⁷RŌNGPU’n nihnenga aleiti,

¹⁸‘Tuning kani nangni Ar hlam a Moab ramri re akake sik chei kae.

¹⁹Khan chu nangni’n Lot sōn, Ammonhei ram hnenga vaka-om sik chei. Anmani manbōi mak hei ruh, khana anchunga retuk phutmak ruh, ajârchu anhnenga kapek jo hei ram inkhatbek nangni pek mak chei ning.’ ”

²⁰(Hiva ram hi’m Rephaim hei ram tia inhret, khana aleika-om mihei rahming kae; Ammon he’nchu Zamzummin anleiti hei.

²¹Anmani Anakimhei kapōa mi inshâng hei. Anja katam hei, khana ratha kanei phunghei kae. Tâk, anram kha Ammon he’n anhlō theina sik a RŌNGPU’n anmani asuk manhmang jo hei’

²²RŌNGPU’n Edom tlângrama ka-om hei, Esau sōn, Edomhei sik a hi leh in-anghrep a aleitlo pek jo hei. Edom he’n tûn katlunga an-omna ram so anloa khō antlâk theina sik a Hor hei kha aleisuk manhmang pek hei.

²³Khana Mediterranean tuipang dunga ram a khan Crete ram a mihe’n khō leikatla hei. Anmani’n Avvim hei, aleika-om masa hei kha, ansuk manhmang heia anram rakip thlang tinga Gaza khōpui katlunga anleilo pek hei.)

²⁴“Eini’n Moab ram nirakan sō pha, RŌNGPU’n nihnenga aleihri, ‘Tûnchu, se inphut ruh, Arnon Tuidung rakan ruh. Heshbona Amorhei rengpa Sihon kha nangni ratha hratna thōia kada jo. Ama so buhlu ruh, aram so hlō manphut jo ruh.

²⁵Tuninga inphut ke’n hmuntina ka-om mi rakip in nangni anṭitna sik cheia kasyem sik jo. Nangni rahming anthei pha, anṭitrei cheia anratha innok sik.’

²⁶“Khava sōa ke’n Kedemoth ram thōia inphut Heshbon rengpa Sihon hneng hiva inchamna ṭongkarôn mi kalei tir hei:

²⁷‘Naram shunga amanpetan roh. Intlunhrek a kase sik ung khana hlamlen masō mak ni’ung.

²⁸Kansâk leh kan-inna kha aman kanpek sik che. Keini tamadu khachu naram petan sik rōk kha kae,

²⁹Jordan Tuidung kanrakan a RŌNGPU’n apek ung ram kha kantlung mak kârseng rōk sik kae. Edom ram a ka-om Esau sōnhei leh Ar ram a ka-om Moab he’n anram petan sik anhei hnōmpek ung.’

³⁰“Tâk Sihon Rengpa khan aram aman hromak a kae. Nan-RŌNGPU nan-Pathen in amalung amanngarpek a he amanjong jo, khavakha eini’n ama nitorna sik leh aram, tûn katlunga ni-omna hi nihlō theina sik a kae.

³¹“Khava sōa RŌNGPU’n kahnenga aleihri, ‘Enroh, ke’n Reng Sihon leh aram so nanhmai kunga heite tlothei loa kada jo; aram so hlō jo ruh khana om jo ruh.’

³²Sihon kha aremi rakip leh eini re kade sik a Jahaz a kahong jo,

³³tâk RŌNGPU ni-Pathen in eini ratha thōia apek sōt mea, ama leh asahei khana ami rakip nithat jo hei.

³⁴Kha leh inṭhōia khōpui rakip nihlō joa nisuk manhmang jo hei, khana pase, nuhmei, naipang rakip nithat jo hei.

³⁵Ranhring rakip nichoma khōpuihei kha nisukset jo hei.

³⁶RŌNGPU ni-Pathen khan Arnon phaicham ramria Aroer inphut khōpui rakip Gilead katlung amanhlōsō me. Khōpui inkhatbek in eini hmaikunga bang kahnet hêr neidek mak hei.

³⁷Tâk Ammonhei ram khana Jabbok tuidung pang leh tlângrama khōpui heia khana hmun ralak a RŌNGPU ni-Pathen in semak ruh tia ṭong apekna senga khan chu leise mak me.