Read Komrem DÂNRABU INHNINA 20 Bible Online

DÂNRABU INHNINA 20 - Komrem bible

DÂNRABU INHNINA 20

¹Nankadōihei re tuk sik a nansesōt pha gâri leh shakor khana nangni remi kanek a aja katamchet nanhmu pha, ṭitmak hei ruh. Egypt a inphut nanhei kahuksōt RŌNGPU nan-Pathen in a’nṭhōipui sik chei.

²Retuk nanphut mak hma thempu inkhat in hmating kahonga remihei hneng hinga ahri sik,

³‘Israel mihei rangei ruh! Tuning nangni re kakōn kase sik chei. Nan-inrepuihei kha ṭitmak ruh khana malung mathla mak ruh khana inpir mak ruh.

⁴RŌNGPU nan-Pathen in a’nṭhōipui sik chei khana re amantor sik chei.’

⁵“Khava sōa ṭōnpui karôn he’n anmanse heia anti sik, ‘Inn alakasak bi, khana inn hlutna alakaneimak mi aka-om mo? A-om inchu, ama kha inna inle rasoh. Achangmak inchu, rehmun a athi jo’nchu, a-inn sak kha mihlop inkhat in kahlut sik joa kae.

⁶Vomhrui thei rahōna thei alakaling bi, khana kara alalôk mak mi aka-om mo? A-om inchu ama kha inna a’nle sik kae. Achangmak inchu, rehmun a athi jo’nchu, mihlop inkhat in theiju kha ahōina sik joa kae.

⁷Luhông sik a ṭong a’nchaisa aka-om mo? A-om inchu ama kha inna a’nle sik kae. Achangmak inchu, ama kha rehmun a athi jo’nchu, ṭong achaipuisa nuhmei kha mihlop inkhat in a-ompui sik joa kae.’

⁸“Ṭōnpui karônhei khan mihei hneng anti sik, ‘Hinahin ratha innok leh ṭit kase mi aka-om mo? A-om inchu inna a’nle sik kae. Achangmak inchu milak-hei ratha hrokna kha amanhmang pek sik heia kae.

⁹Ṭōnpui karôn he’n remihei hneng hrina anchai pha, rupṭhen rakip sik a hlamkakei antakadeisōt sik kae.

¹⁰“Khōpui inkhat re tuk sik a nanse pha, hmapena amihei kha tor mak jo ung antia anhei hlutna sik a pha pek hei ruh.

¹¹Anmani’n khōpui kotpui anmahlanga nanhnenga anheihlut inchu, ankhenga nangni sōk akachang sik hei kae, nangni sik a ṭōn rahnak a antatlo sik kae.

¹²Tâk khōpuia mihei khan anhei hlutmak a re intuk sik anmadu’n chu, nanremihei khan manke khum hei ruh.

¹³Hivasōa, RŌNGPU nan-Pathen in khōpui kha amanlo chei pha, khava shunga ka-om paseseng that hei ruh.

¹⁴Achang ravâng khōpui shunga ka-om nuhmei, naipang, ranhei leh heirakip nanta et sik a nan inlothei sik. Nan-inrepuihei tanei rakip nanhmang thei sik. RŌNGPU’n apek jo chei kae.

¹⁵Nan-omna sik ram a inphut kahlatak a ka-om khōpuihei hneng khanga khan nantatlo sik hei kae.

¹⁶“Tâk-kha RŌNGPU nan-Pathen in apek sik chei ram shunga khōpuihei kha nanlo hei pha, mi rakip that hei ruh.

¹⁷RŌNGPU’n tlosōt sik a ṭong apek chei kapōa, mi rakip manram cher hei ruh: Hit, Amor, Canaan, Periz, Hiv, khana Jebush-hei.

¹⁸Anmani pathen kamukna mater ka-om omchen antatlo rakip kha anmanthei cheia RŌNGPU kadōia setna nantlo makna sik a, mi rakip that hei ruh.

¹⁹“Khōpui inkhat lo sik a nantlo pha, kara kanei thingkung tuktan mak hei ruh, pha kasôttak nansur khum he’num. Theikara sâk hei ruh, tâk theikung chu manhmang mak ruh; theikung hei kha nangni kadōi changmak hei.

²⁰Thinghlop chu nantuktan thei sik hei khana khōpui kha pui katluk a nansur khum mak hma seng rekur syemna nanhmang thei sik hei.