Read Komrem DÂNRABU INHNINA 21 Bible Online

DÂNRABU INHNINA 21 - Komrem bible

DÂNRABU INHNINA 21

¹“Tekhinga, RŌNGPU nan-Pathen in nangni apek sik chei ram hleilai inkhat a mi inkhat kathi jo, mikathat tu mo manhret mak jo chei.

²Nanhlam kakeihei leh ṭongkatan he’n khava hmun a kase sik hei, kathi kalōng omna inphut ahnenga ka-om khōpuihei kha heija mo kahla antesōt sik hei.

³Kathi kalōng omna inphut a’nhnaipen khōpuia hlamkakei he’n sehrat rala ṭōn tlona antalahmang mak inkhat ankadeisōt sik.

⁴Khavakha tui akachâr hêrmak kavadung hnenga khana ralei kha antakhōi mak leh hmuchi antaling phung hêrmak hmun inkhat a anchoia ahrak anmaher thlek sik a kae.

⁵Khava kha’num levi thempu akase sik hei kae, ajârchu innâk-inse sōkna rakip a anmani’n ṭong mathlakna antanei sik kae. RŌNGPU nan-Pathen in ama inzen sik a leh ama rahminga mahâmṭhat akahrisōt sik a akadei jo hei kae.

⁶Mi kathi kalōng anhmuna akahnaipen khōpuia hlamkakeihei khan sehrat pui chunga ankut ansôp sik,

⁷khana anti sik, ‘Keini’n mi hi that mak ung khana tu’n mo atlo jo manhret mak ung.

⁸RŌNGPU, nami Israel, Egypt a inphut nahei huksōt hei hi rangei mandam hei roh. Arangei mandam roh khana ṭhena kaneimak mi thina hi keini themmô amanchen mak roh.’

⁹Khan chu, RŌNGPU’n amadu kha nantloa, mikathipa themmôna kha nanchunga tlamak jo ning.

¹⁰“RŌNGPU nan-Pathen in re amantor chei pha khana rehringa nanṭhōi hei pha,

¹¹anmani kâra hme kaṭha nanta madu leh nanta-ompui hnōm nuhmei nanhmu sik hei.

¹²Nan-inna ṭhōi ruh, alusam avo sik, khana akut matin a-eptan sik,

¹³apōnsi anthleng sik a kae. Ama kha na-inna ka-om sik, anu-apa ṭajai thla khat asui sik; khava sō leh na-ompui thei sik.

¹⁴Hnunga, namadu mak inchu, ama kha namasō sik kae. Nang in ama kha rakhum na’nchunpui jo jâra ama kha sōk inkhat a hmangthei mak tin khana jōrsōt theimak tin che.

¹⁵“Tekhinga, mi inkhat in nuhmei 2 amanboa, anmani’n sapa inkhat et annei, tâk anuhmei madunu sa kha upa leichang mak jo.

¹⁶Ama’n akarōi kha asahei asempek hei pha, amadunu sa kha ôtum aneia sapa upa karōi chen sik kha pek theimak ning.

¹⁷Asa upa kha anuhmei madunu sapa achangmak inum, anei karōi semhni amanchen sik. Pase inkhat in asapa upa achanghlo amanhret sik kae khana dân dungjuia achen kasōk kha apek sik kae.

¹⁸“Tekhinga, mi inkhat in ṭong kajuimak racham kase sapa inkhat, anmanse inum anu-apa ṭong kajuimak aleinei.

¹⁹Anu leh apa he’n ama omna leh aṭong tanna sik khōpuia hlamkakeihei hmaikunga ama kha anṭhōi sik.

²⁰Anmani’n anhnenga anhri sik, ‘Kansapa hi ṭong juimak, aracham kase, keini ṭong jui sik hnōm mak, khana ju a-ina sêr amanhmang.’

²¹Khava sōa khōpuia ka-om mihei khan hlung vânga andenghlon sik, khang’khan khava ṭhatmak kha nadasōt sik a kae. Israel mi rakip in akasōk omchen kha antheia anṭit sik.

²²“Mi inkhat ṭōnse inkhat jâra anthat a akalōng kha thingtlōn chunga anmakhei inchu,

²³khana khan jân manrek sik changmak. Khava ning bât hre sik kae, ajârchu kathi kalōng thinglera makhei kha, Pathen hâksêrna khava ram chunga katlunga kae. RŌNGPU nan-Pathen in apek chei ram kha sukmannim makna sik a kalōng kha vûm ruh.