Read Komrem DÂNRABU INHNINA 22 Bible Online

DÂNRABU INHNINA 22 - Komrem bible

DÂNRABU INHNINA 22

¹“Nan-Israel changpui inkhat ase achangmak leh akemōng masōa a-om nanhmu’nchu, donloa om mak ruh, akapupa hneng pek ruh.

²Tâk akapu kha hmun kahlatak a a-om inchu khana akapu kha nanmanhret mak inchu, nan-inna inṭhōi jo ruh. Akapu khan ahei jong pha, ahnenga pek ruh.

³Nangni’n shakōrtung, pōn bong achangmak leh hei-inkhat nan-Israel changpui in amanhmangna chung heia khanga tlo ruh.

⁴“Nan-Israel changpui inkhat ashakōrtung achangmak leh ase apûr jo’nchu, donloa om mak ruh; akea angirna sik a inthōpui ruh.

⁵“Nuhmei he’n pasehei invonna a’nvonmak sik hei kae, khana pase he’n nuhmeihei invonna a’nvonmak sik hei kae; khanga akatlo mihei kha RŌNGPU nan-Pathen in ahōt hei.

⁶“Thingkung chunga varabu a-emak leh raleia vapui khan aratui a-oa a-emak leh ate aṭhōi hei nanhmu’nchu, apui kha nanta lomak sik kae.

⁷Vate hei kha nanlo thei sik hei, tâk hringkhō kasôt leh khangtouna chenna sik, apui khachu nantamasō sik kae.

⁸“Innther nansak pha, aphuchung hmor kimvea rape khâr ruh. Khan chu tu inkhat atlâk a athi inum nangni rahno chenmak chei ning.

⁹“Vomhrui leh hmuchi ralak lingsap mak hei ruh; khanga nantlo’nchu vomhrui leh hmuchi kara hmang sik a hnōmpek changmak chei.

¹⁰“Hlei khōina sik a shakōrtung leh sehratche mankopsap mak hei ruh.

¹¹“Shahme leh pat inchun a ankhông pōn simak ruh.

¹²“Nanpōn rakir manlia tukpâr kaṭhōi makhei hei ruh.

¹³“Tekhinga, pase inkhat in nuhmei inkhat a-ompui jo, hnung leh chu madu mak jo.

¹⁴Khava jâra maleiseia maherna aneia, anlu hôngsōa nuhngâk intheng changmak ati jo.

¹⁵“Hinga asōk inchu, nuhmei kha intheng ti manchênna anu leh apa he’n luhông pōnpha a thisen kakop kha antaloa ṭongtan inna khōpui hlamkakeihei hneng anmalâr sik.

¹⁶Apa khan anhnenga ati sik, ‘Kasanu hi hiva mipa hneng inn kamannei kae, tûnchu madu mak jo.

¹⁷Ama’n maleiseia amaher jo, a-om puisōa nuhngâk intheng changmak ati jo. Tâk kasanu hi intheng ti manchênna hinahin ka-om; luhông pōnpha a thisen kakop hi enruh!’

¹⁸Khōpuia hlamkakei he’n puise kha ansura anvōk sik.

¹⁹Anmani’n mipa kha dangka 100 hlei anlo sik, sêr kha nuhmei apa hneng anpek sik, ajârchu mipa khan Israel jōr chunga inzakna apek a kae.

²⁰“Tâk ṭongrôn sōt kha adik inchu, nuhngâk intheng ti manchênna a-om mak inchu,

²¹amanu kha apa inn kekot a anṭhōisōt sik, khana khan khōpuia paseseng in hlung vâng andenghlon sik. Apa hnenga a-omlai, aluhông mak hma pase leh hmun inchunna aleinei joa nimihei kâra inzak ka-om tak ṭōn aleitlo joa kae. Hing’hin ṭhatmak hi nanta tingsōt sik kae.

²²“Pase inkhat in mihlop nuhmei hmun a’nchunpui inchu, an-inhnibât a that sik hei kae. Hing’hin ṭhatmak hi nanta tingsōt sik kae.

²³“Tekhinga, nuhmei inkhat pase inkhat leh ṭong a’nchaisa jo kha pase inkhat in hmun a’nchunpui jo.

²⁴Anmani kha khōpui vângting nantaṭhōisōt heia hlung vâng nantadeng hlon sik hei kae. Nuhmei kha kathi sik ajârchu akaresō thei torna hmun khōpuia a-omtâk inum ama’n inthōpuina sik a lei-ôngmak. Pase kha kathi sik, ajârchu mi leh ṭong a’nchaisa nuhmei kha hmun a’nchunpuia kae.

²⁵“Tekhinga, mi inkhat in khōsira mi inkhat leh ṭong a’nchaisa nuhmei inkhat hnōmloa hmun a’nchunpui jo. Khan chu pase rōk kha that sik kae;

²⁶nuhmei chunga heite intlo mak ning, ajârchu thina katluk setna tlomak a kae. Hiva ṭong hi mi inkhat in mi inkhat abuhlua athat kha leh in-angtlinga kae.

²⁷Mipa khan ṭong a’nchaisa nuhmei kha khōsira hnōmloa asetpui kae, inthōpuina sik a-ông inum, akabôm sik a tûte leiom mak a kae.

²⁸“Tekhinga, pase inkhat in ṭong ala’nchai mak nuhngâk inkhat hnōmloa asetpui jo.

²⁹Ama’n nuhmeinu pa hneng nuhmei man dangka 50 apek sik khana amanu kha anuhmei akachang sik kae, ajârchu rumhrat a ama’n asetpui kae. Pasepa hring lai seng inṭhenpui mak ning.

³⁰“Pase tu inkhat in apa nuhmeihei kâra inkhat hmun a’nchunpuia apa hmaimôkna atlo mak sik kae.