Read Komrem DÂNRABU INHNINA 24 Bible Online

DÂNRABU INHNINA 24 - Komrem bible

DÂNRABU INHNINA 24

¹“Tekhinga, pase inkhat in nuhmei inkhat a-ompui, hnung leh chu madu mak jo, ajârchu amadumakna heikhat ahmu sōt jo. Khava jâra inṭhenna lekha inkhat amazet a apek a a-inna inphut atirsōt jo.

²Khava sōa pase hlop inkhat hneng inn anei jo,

³khana pase khan amanu madu nôk mak jo, khava jâra ama’n inṭhenna lekha amazet a ahnenga apek jo khana a-inna inphut amanse jo. Achangmak leh 2 changna apuise kha kathi jo.

⁴Heikhat achang inum, apuise hmakakei khan amanu kha avea a-ompui mak sik jo kae; nuhmei kha a’nthengmak a alo sik jo kae. Pase khan a-ompui nôk inchu RŌNGPU kadōi kachang sik jo. RŌNGPU nan-Pathen in apek sik chei ram a khan khang khava ṭit ka-om setna kha nanta tlomak sik kae.

⁵“Pase inkhat in nuhmei aneibi pha, ama kha remi ṭōna a-emak leh mipui ṭōn heikhat a hmang sik changmak; inna a-om leh anuhmei kahōia adana sik kum khat chu vaipui ṭōna manveilo sik kae.

⁶“Mi inkhat heikhat nanmanpûk pha ama sasukna chakri kha bandhop a namanda mak sik kae. Khava khan an-innshung hringna sik thlai syemna kha losōtpek kachang sik jo.

⁷“Tu mo inkhat in a-Israel changpui inkhat amarûk a asōk amanchang, achangmak leh ajōrsōt inchu, khava mi kha that sik kae. Khang’khan ṭhatmak kha nanting tor sik a kae.

⁸“Ṭit ka-om tak vunnatna nannei pha, thempuhei mantheina chei kha tlona sik intluk ruh; ke’n anhnenga kamanthei hei kha jui ruh.

⁹RŌNGPU nan-Pathen in Egypt a nanhei sōk pha Miriam hnenga atlopek kha mandon ruh.

¹⁰“Nang in naven inkhat hneng heikhat namanpûk pha, bandhop a apek sik che apōnsihei lona sik a a-inna semak ruh;

¹¹vânga hngâk ruh, ama’n heichoi pek chei rasoh.

¹²Ama sara achang inchu pōnsi hei kha jân kathang dapek mak ruh;

¹³khōhlei katai pōnsi kha tir pek nôk ruh, aje pha ahmang theina sik. Khan chu ama katlâi sik khana RŌNGPU nan-Pathen inum nanchunga katlâi sik.

¹⁴“Sara khōdeng kathei sōk a marōi, Israel changpui achangmak leh khōhme achanga, nankhōpui inkhat a ka-om kha hōnmak ruh.

¹⁵Ani tina anṭōn tloman kha kani atlâk mak hma pek sōt hei ruh; sêr kha anmadu khana antahmu sik kha anteia kae. Nanpek mak he’nchu, RŌNGPU hneng nangni kadōia ka-ông sik hei, nangni setna ṭhena kha nanchen sik.

¹⁶“Ansa he’n setna antlo jâra annu anpa that sik hei changmak, khana nu leh pa setna jâra ansahei that sik hei changmak; mihei hi anbing et setna jâra that sik hei kae.

¹⁷“Khōhme leh nu leh pa kasehei dikna ratha neina kha manhmang pek mak hei ruh; hmeithainu inkhat pōnsi kha sêrpûk jâra bandhop a lopek mak ruh.

¹⁸Egypt a nangni sōk leikachang cheia RŌNGPU nan-Pathen in amasōsōt chei kha mandon ruh; khava jâra nanhnenga ṭongpek hi kapek chei kae.

¹⁹“Nangni’n hleia sâng nankhôm pha sapâr nantahrut sō mak a-om inchu, khava kalo sik a semak jo ruh; RŌNGPU nan-Pathen in nanṭōn tlona rakip a mahâmṭhat apekna sik cheia khahei kha khōhme, nu leh pa kase, renghmeihei sik dahlon pek sik hei kae.

²⁰Nan-olive thei vōi khat nanvei pha, se nôk mak jo ruh khan dahlon hei kha valonôk mak jo ruh, khahei kha khōhme, nu leh pa kase, renghmeihei sik a kae.

²¹Nanvomhrui thei vōi khat nanvei jo’nchu vōi khat nôk semak jo ruh; dahlon jo vomhrui thei kha khōhmehei, nu leh pa kasehei, renghmeinu hei sik a kae.

²²Egypt a sōk leikachang chei ti hi mahngi hêrmak ruh; khava jâra ṭongpek hi kapek chei kae.