Read Komrem DÂNRABU INHNINA 26 Bible Online

DÂNRABU INHNINA 26 - Komrem bible

DÂNRABU INHNINA 26

¹“RŌNGPU nan-Pathen in apek sik chei ram kha nanhlō pha khana nan-om pha,

²nangni rakip in nantakhôm hmuchi hmakakei kha hrai inkhat shunga nantathōn sik khana kamukna hmun inkhat a nantachoi sik kae.

³Khava pha, thempu ṭōnkarôn hnenga se ruh khana ahnenga vati ruh, ‘Ke’n tûn RŌNGPU ka-Pathen hnenga, ama’n nipa-nipuhei hnenga pek sik a ale’ntepna, ram kha kahlut jo eng tia hrina kanei jo.’

⁴“Thempu khan hrai kha alo sik khana RŌNGPU nan-Pathen maichâm hmating ada sik.

⁵Khan chu, RŌNGPU hmaikunga hiva ṭonghei hi nanhri sōt sik: ‘Kanpu kha Egypt a omna sik a a-innshung aleikaṭhōisōt, Aram a mi khōhmea aleikalôn inkhat kae; sona anleise lai amihei mija katlômtek hei, tâk anmani hong katam heia ratha kaneitak jât hongkachang hei.

⁶Egypt he’n hnuk kasetak a anleitlo me khana sōk kapōa rumhrat a ṭōn anleimantlo me.

⁷Khan chu nipa-nipuhei Pathen, RŌNGPU hneng inthōpui sik a leika-ông me. Nikhōdeng theina, nichâmna leh ni-inrengna aleithei pek me khana aleihmu me.

⁸Aratha neina leh aratha hratna vâng khan Egypt a inphut ahuksōt me. Det-hla ka-om leh ṭōn-inlak tatak aleitlo khana ṭit-inpirna amasō hei.

⁹Hinahin aheiṭhōi me, hiva neina leh ram thai omna hi apek me.

¹⁰Khava jâra tûnchu RŌNGPU’n apek eng sâng khôm hma-inkei kha ahnenga kahei choi kae.’ “Khana hrai kha RŌNGPU hmaikunga da ina kamuk ruh.

¹¹Nangni leh nan-innshunghei RŌNGPU nan-Pathen in apek chei neinâk kaṭha jâra khan inpâk ruh; Levihei leh nankâra aka-om khōhme he’n rehōia khan tla hei rasoh.

¹²“Kum 3 kataia sôma inkhat, nanhmuchi sôma inkhat, Levihei, khōhmehei, nu leh pa kase leh renghmeihei hneng, phung rakip shunga sâk sik a antamadu rakip anchen theina sik a pek hei ruh. Hivahi nantlo pha,

¹³RŌNGPU hneng ti ruh, ‘Sem sôm intheng inkhatbek ka-inna om mak jo; Levihei, khōhmehei, nu leh pa kasehei, renghmeihei hneng nang in ṭong napek eng kapōa, kapek jo hei. Sem sôm chungchânga naṭongpek inkhatbek juilo leh mahngina neimak eng.

¹⁴Ke’n ṭajai kasuilai khavakha inkhatbek sâk mak eng; beklanga ka’ntheng mak lai inkhatbek inna inphut losōt mak eng; khana inphut akathihei sik a tōkna heikhat neimak eng. Ke’n naṭongpek kajui, O RŌNGPU; sem sôm chungchânga naṭong pekna rakip kha katlosōt jo.

¹⁵Marvâna nahmun inthenga inphut jōng enroh khana nami Israel vâng pek hei roh; kanpu kanpahei hneng ale’ntep che kapōa, nang in napek ung neina leh ram thai omna ram hi’m vâng pek roh.’

¹⁶“Tuning RŌNGPU nan-Pathen in adân rakip juina sik ṭong apek chei; achang jâra nanmalung pumpuia taksentak a jui hei ruh.

¹⁷Tuning RŌNGPU kha nan-Pathen kae tia nanhri jo; aṭong jui sik a, adân rakip juina sik a, aṭongpek rakip tlosōtna sik a intep jo chei.

¹⁸Nanhnenga ale’ntep kapōa, tuning RŌNGPU’n ami khet a arahlâng jo chei; khana adân rakip juina sik a ṭong apek jo chei.

¹⁹Ama’n aleisyem jât ralak-hei kanek a nangni amanlen sik chei, nangni’n arahming choi ka-ânna leh kajana nanhei rôn sōt sik. Ama le’ntepna kapōa, nangni ama khet mipui kachang sik chei.”