Read Komrem DÂNRABU INHNINA 27 Bible Online

DÂNRABU INHNINA 27 - Komrem bible

DÂNRABU INHNINA 27

¹Khava sōa Israel upahei leh Moses’n Israelhei hneng anhri, “Tuning ke’n kapek chei mansena rakip hi jui ruh.

²Jordan tuidung nanrakan a, RŌNGPU nan-Pathen in apek chei ram a nanhlut ning, hlung kalen ajing nantaphun sik a mannejet ruh,

³khava chunga hiva dân leh mantheina rakip hi mazet hei ruh. Nanpu sōnhei Pathen RŌNGPU’n nanhnenga ale’ntepna haona leh ram thai omna ram kha nanhlut a,

⁴Jordan rekhat ting nan-om pha, Ebal Tlânga hlunghei kha tuninga kamanthei chei kapōa phun hei ruh, manne hei ruh.

⁵Thir hmangchâk vâng mantônlo hlunga maichâm inkhat syem ruh,

⁶ajârchu RŌNGPU nan-Pathen sik maichâm nansyemna kataia intuktanlo hlunga inphut syem sik kae. Khava hmun a hmeia ro manvâm sik inthoina nantatōk sik kae.

⁷Khava hmun a inthoina nannei sik, khana inlôikhômna tōkna kha nansâk sik, khana RŌNGPU nan-Pathen hmaikunga inpâk sik chei.

⁸A’nnejet hlung chunga Pathen dân rakip kha inchêna mazet ruh.”

⁹Levi phunga thempuhei leh Moses’n Israel mipui rakip hnenga anhri, “Israelhei, ke’n malung kahlut a kahri hi rangei ruh. Tuning RŌNGPU nan-Pathen mi kachang jo chei;

¹⁰khava jâra aṭong jui ruh khana tuning ke’n kapek chei adân rakip hei hi jui ruh.”

¹¹Hivasōa Moses’n Israel mihei hneng ahri,

¹²“Jordan tuidung nanrakan sōa, mihei chunga vângpekna anhrisōt pha, athōia phunghei hi Gerizim Tlânga akangir sik hei kae: Simeon, Levi, Judah, Issachar, Joseph, leh Benjamin.

¹³Khana hâksêrna kha anhrisōt lai khan athōia phunghei hin Ebal Tlânga akangir sik hei kae: Reuben, Gad, Asher, Zebulun, Dân leh Naphtali.

¹⁴Levi he’n ṭonghei hi kare inshânga anhri sik:

¹⁵“‘Tu inkhat in hlung leh thing khana thir vânga lim asyema marûk a akamuk inchu RŌNGPU hâksêrna kha achunga tlung rasoh. RŌNGPU’n limsyem ahōt a kae.’ “Khana mipui he’n ‘Amen!’ tia anmasôn sik.

¹⁶“‘Annu anpa kajana kapek mak hei chunga Pathen hâksêrna tlung rasoh.’ “Khana mipui he’n, ‘Amen!’ tia anmasôn sik.

¹⁷“Khō leh ven ramri kathonsōt chunga Pathen hâksêrna kha tlung rasoh.’ “Khana mipui he’n ‘Amen!’ tia anmasôn sik.

¹⁸“‘Hmitkacho inkhat hlamleting kaṭhōi mi chunga khan Pathen hâksêrna tlung rasoh.’ “Khana mipui he’n ‘Amen!’ tia anmasôn sik.

¹⁹“‘Khōhme, nu leh pa kase khana renghmeihei hneng rumhrat katlohei chunga Pathen hâksêrna tlung rasoh.’ “Khana mipui he’n ‘Amen!’ tia anmasôn sik.

²⁰“‘Apa nuhmei tu inkhat leh hmun inchun, apa inzakna kapek chunga Pathen hâksêrna tlung rasoh.’ “Khana mipui he’n ‘Amen!’ tia anmasôn sik.

²¹“‘Tu inkhat in ran hmun inchunpui chunga Pathen hâksêrna tlung rasoh.’ “Khana mipui he’n ‘Amen!’ tia anmasôn sik.

²²“‘Ashung sōkpui asernu a-emak leh apakasin sanu hmun inchunpui chunga Pathen hâksêrna tlung rasoh!’ “Khana mipui he’n ‘Amen!’ tia anmasôn sik.

²³“‘Tu inkhat aterpi hmun inchunpui chunga Pathen hâksêrna tlung rasoh.’ “Khana mipui he’n ‘Amen!’ tia anmasôn sik.

²⁴“‘Marûk a mikathat chunga Pathen hâksêrna tlung rasoh.’ “Khana mipui he’n ‘Amen!’ tia anmasôn sik.

²⁵“‘Ṭhenakase inkhat thatna sik a sêr kalo chunga Pathen hâksêrna tlung rasoh.’ “Khana mipui he’n ‘Amen!’ tia anmasôn sik.

²⁶“‘Pathen dân leh mantheina hei kajuimak chunga Pathen hâksêrna tlung rasoh.’ “Khana mipui he’n ‘Amen!’ tia anmasôn sik.’