Read Komrem DÂNRABU INHNINA 28 Bible Online

DÂNRABU INHNINA 28 - Komrem bible

DÂNRABU INHNINA 28

¹“Tuning kapek chei ṭongpek rakip taksentak a nannit a RŌNGPU nan-Pathen ṭong nanjui inchu, raleichunga jât alak-hei kanek a amanlenchet sik chei.

²RŌNGPU nan-Pathen ṭong jui ruh khan chu hiva mahâmṭhat rakip hi nanta kachang sik:

³“RŌNGPU nan-Pathen in nankhōpui leh nanhlei hei vâng apek sik hei.

⁴“RŌNGPU’n sa, hmuchi, se leh kemōng katamtak leh vâng apek sik chei.

⁵“RŌNGPU’n nanhmuchi leh khana inphut nanthlai syem hei chunga vâng apek sik hei.

⁶“RŌNGPU’n nanṭōn tlona rakip a vâng apek sik hei.

⁷“Nan-inrepui he’n anbuhlu chei pha RŌNGPU’n ator sik hei. Anmani’n ramkei inkhat a inphut anbuhlu sik chei, tâk nanhnenga inphut ramkei rakip a katlânsōt sik hei.

⁸“RŌNGPU nan-Pathen in nanṭōn tlona vâng apek sik chei khana nanramsōr kha sâng leh be amansip pek sik. Apek sik chei ram shunga khan vâng apek sik chei.

⁹“RŌNGPU nan-Pathen ṭong nanjuia aṭongpek rakip nantlo’nchu, ale’ntep kapōa, ama khet mi amanchang sik chei.

¹⁰Khana raleichunga mi rakip in RŌNGPU’n ami sik akadei jo chei tia anmanhret sik, khana anṭit sik chei.

¹¹RŌNGPU’n pek sik cheia nanpu-nanpahei hneng ale’ntep kapōa, ram shunga khan sha, se leh hmuchi katamtak apek sik chei.

¹²Jât katamtak hneng bat nanmanpûkna sik hei ama’n marvâna anei bukna inphut aphahrep a khō ajōng mansûr sik, nanṭōn rakip a vâng apek sik chei, tâk nangni chu tûte hnenga pûkmak tin chei.

¹³RŌNGPU nan-Pathen in jât-hei kâra akahnung kajui changloa anhlam kakei amanṭang sik chei; tuninga kapek chei aṭongpek rakip taksentak a nanjui inchu ahei tik a kahao sik chei khana tlâksam hêrmak chei ning.

¹⁴Hei-achang inum hihei hi juiloa, pathen ralak kamuk a razen kha nanta tlomak sik kae.

¹⁵“Tâk RŌNGPU nan-Pathen kha nanjuimak inchu, tuninga kapek chei aṭongpek leh adân rakip kha taksentak a nanit mak inchu, hiva ṭhatmak rakip hi nanchunga katlung sik:

¹⁶“RŌNGPU’n nakhōpui leh nanhlei hei ahâksêr sik hei.

¹⁷“RŌNGPU’n nanhmuchi leh khana inphut a’nsyem thlai kha ahâksêr sik hei.

¹⁸“RŌNGPU’n ahâksêr cheia sha, hmuchi, se leh kemōng ajingte rōk apek sik chei.

¹⁹“RŌNGPU’n nantlona rakip a ahâksêr sik.

²⁰“Ṭhatmak nantloa RŌNGPU kha nanhnōm mak inchu, inrangtak a nan-inhmangsō rengmak hma seng, nantlona rakip chunga inrimna, inhmakna, bōina ajōng rôn sik.

²¹Nanomna sik ram a nangni inkhatbek hringmakna sik a hrise inkhat bâna inkhat ajōngtir sik.

²²Hrise natna, khōihli leh hritlun vânga RŌNGPU’n avōkna sik chei; nanhmuchi kasukset sik a khōchar leh thli kalum inhnak ahei tir sik. Hiva inrimna hi nanthi mak hma seng nanchunga ka-om sik.

²³Khō sûrmak ning, nanralei kha thir kapōa kangar sik.

²⁴Khōsûr kanek a, nangni suk manhmang hma seng, RŌNGPU’n ravut leh nêrdi thlipui ajōngtir sik.

²⁵“RŌNGPU’n nan-inrepuihei kha’m amantor sik chei. Ramkei inkhat a inphut re nantlo sik hei, tâk anhnenga inphut ramkei rakip a katlân sik chei, raleichunga mi rakip in nanhnenga akasōk kha anhmu pha ṭit-inpirna annei sik.

²⁶Nanthi pha, va leh ramsha he’n nankalōng kha ansâk sik hei, khahei kahnong sōt sik tûte om mak hei ning.

²⁷Egypt hei hnenga aleitlo kapōa, RŌNGPU’n nanchunga khōihli ajōngtir sik. Nantaksa kha inthlinga amanpōkkhōi sik. Uithak kasip sik chei, inthak sik chei, adam theina om mak ning.

²⁸RŌNGPU’n nanmalung amanjîng sik, hmit chokna leh inhmakna vâng avōk sik chei.

²⁹Hmitkacho kapōa, sûn vâr thōia, inhmei hmeia nanjong sik, nanhlam hro sik hmutor mak tin chei. Nantlona rakip a khang sōt mak tin chei. Ahei tik a suk manrenga ka-om sik chei, nankabôm sik tûte om mak ning.

³⁰“Nuhngâk inkhat leh ṭong inchai sik chei, tâk mi inkhat in a-ompui sik. Inn nansak sik, tâk omnatet mak tin chei. Vomhrui nanling sik, tâk akara chu sâktet mak tin chei.

³¹Nanranhei nanhmit hmua anrachen sik hei, tâk ahme inkhatbek sâkphâk mak tin chei. Nanshakōrtung hei nanhmai kunga ankei sik hei, avea heipek male mak hei ning. Nankemōnghei nan-inrepuihei hneng inpek sik hei, nankabôm sik tûte om mak ning.

³²Nanhmai kunga nansapa hei leh nansanuhei kha sōk sik a khōhmehei hneng inpek sik hei. Ani katai nansahei ho’nlena sik hlam nan-enna môksek a nanhmit kasanga nanthlir sik, anmani ho’nle mak hei ning.

³³Nangni’n heite chenloa, êngset a antlona chei leh khōdeng theina rōk nanchen ṭhaklai, hmuchi mankekna sik a rahnak a nanṭōn leitlona kara rakip kha ram hlop jât he’n anlosō sik.

³⁴Nan-inrengna khan nanmalung amanhmak sik.

³⁵RŌNGPU’n nanke hei kha damthei loa, achip a inthlingna’n amakhu sik; nanlua inphut nanke katlung khōihli’n akatōm sik.

³⁶“RŌNGPU’n nangni leh nanrengpa kha nangni leh nanpu-nanpahei leiom hêrmakna hmun ram hlopting aṭhōi sik chei; khan thing leh hlunga a’nsyem pathenhei nanrazen sik hei.

³⁷RŌNGPU’n akathek manchai sik chei, ram shunga mihe’n nanchunga akasōk omchen jâra anmalung atôn sik; sem tlona leh manuisōna annei sik chei.

³⁸“Hmuchi katamtak nanvor sik, tâk ajingtehrep nanlōk sik, ajârchu khâikhu he’n hmuchi kha ansâksō sik.

³⁹Vomhrui kung nanlinga nanhrung sik, tâk vomhrui theichu lōkmak chei ning, khana theiju inmak chei ning, ajârchu rahlung in thei kha ansâksō sik.

⁴⁰Olive kung nanram hmuntina kahmông sik, tâk olive thai chu neimak tin chei, ajârchu thei kha kaṭisō sik.

⁴¹Sapa leh sanu nannei hei sik, tâk nanmanhmang sik hei, ajârchu rehringa ankei sik hei.

⁴²Nanthei kung leh hmuchihei kha khai he’n ansâksō sik.

⁴³“Nangni’n nantlâksam chet-chet pha, nanram shunga ka-om ram hlop mihe’n ratha anhongnei chet-chet sik.

⁴⁴Nanhnenga sêrpûk pek sik a annei sik, tâk anhnenga manpûk sik chu neimak tin chei. Achaina chu, anmani nanvai karôn kachang sik hei.

⁴⁵“Hiva inrengna rakip hei hi nanchunga hong katlung sik, nan-inhmangsō mak kârseng hong katlung sik, ajârchu RŌNGPU nan-Pathen kha juimak chei khan apek chei adân rakip kha nitmak cheia kae.

⁴⁶Khahei kha Pathen in nangni leh nansōnhei chunga ṭong atanna mêrchîkna ahei tik a kachang sik hei.

⁴⁷RŌNGPU’n ahlam rakip a vâng apek chei, tâk malung kahōi leh inpâk a razen mak chei.

⁴⁸Khava jâra, nangni kadōia RŌNGPU’n ajōngtir sik inrepuihei kha nanrazen sik hei. Vonṭâm tuihre, silo keiloa ka-om sik chei, heirakip nanmadu nanrangei sik. Nan-inhmangsō mak hma seng RŌNGPU’n asuk manrim sik chei.

⁴⁹Ralei bângna inphut aṭong leh ahla nantamanhret mak, jât inkhat nangni kadōi sik a RŌNGPU’n aheiṭhōi sik. Anmani kha mârhmu kapōa nanchunga jōng kachu sik hei.

⁵⁰Enhnōm kaimak hei ning, naipang leh kater achang inum tûte inkhat hneng lungsetna malârmak hei ning.

⁵¹Nanran leh hmuchi ansâksō sik, nangni chu vonṭâma kathi sik chei. Nangni sik a hmuchi, vomhrui ju, olive thai, se leh kemōng dahlon mak hei ning; kathi sik jo chei.

⁵²RŌNGPU nan-Pathen in apek sik chei ram a khōpui rakip anbuhlu sik, nanta taksen a’nshâng rekurhei kha katlu sik hei.

⁵³“Nankadōi he’n nankhōpuihei ankake khum pha, thlai sâkna sik nanmandon hlahêr sik, RŌNGPU’n apek chei nansahei kapha nanhei sâk sik jo hei.

⁵⁴Kalen kahrângpen innshunga a’nte pase kapha’num khava kekhum pha shunga khan chu amandon hlahêr sik, sâk sik heilak aneimak jâra asa ṭhahrep asâk sik hei. Alungset asōpui, anuhmei khana alaka-om asahei kapha’m sâkpui mak hei ning.

⁵⁵

⁵⁶Kalen kahrângpen innshunga a’nte nuhmei kapha’num, katluk a anei jâra khonte aleikase rimak mi khan, khang hrep a aheitlo sik. Amanu khōpui kha inrepui he’n ankekhum pha, thlai sâk sik a amandon hlahêr sik, anaidông leh abâna amatet hei kha marûk a asâk sik hei. Alungset apuise leh asa inkhatbek sâkpui mak hei ning.

⁵⁷

⁵⁸“Hiva lekharabu shunga a’nzet mantheina rakip hi taksentak a nanjuimak inchu khana det-hla leh ṭit ka-om RŌNGPU nan-Pathen rahming hi nankaja mak inchu,

⁵⁹nangni leh nansōnhei chunga damthei lo hrise, ṭit ka-om tak mandam theilo nat-hrui ajōngtir sik.

⁶⁰Egypt ram a antaratō jo ṭit ka-om nat rakip ave nôk a nanchunga ajōng rôn sōt sik, dam hêrmak tin chei.

⁶¹Pathen dân leh mantheina lekha shunga a’nzetsa mak hrise leh nat-hrui rakip ajōng tirsa sik hei, nangni asuk manhmang sik cheia kae.

⁶²Marvâna ârsi jahrep nanhong chang jo tâk inum, ahlekte rōk kahring sik chei, ajârchu RŌNGPU nan-Pathen kha aṭong juimak cheia kae.

⁶³RŌNGPU’n nangni manpung sik leh manhao sik aleimadu kapōa, nangni suk manhmang sik leh suk manset sik kha ahei madu sik. Nangni tahlō sik ram a inphut alosōtreng sik cheia kae.

⁶⁴“RŌNGPU’n jât rakip kâra akathek manvai sik chei, ralei bângna inphut abângna inkhat a, khan nangni leh nanpa-nanpu he’n anta leikamuk jenmak pathenhei, thing leh hlunga a’nsyem pathen nanrazen sik hei.

⁶⁵Khonna enum mōngna chenmak tin chei, nanram ti om mak ning; RŌNGPU’n madu rangeina, inhōrna kase, tlâksamna vâng amakhu sik chei.

⁶⁶Nanhringkhō kha ahei tik a thitheina kachang sik. Sûn leh jân ṭitna kasip sik chei, thi kaṭit a ka-om ṭhak sik chei.

⁶⁷Nantahmuna rakip a ṭitna’n nanmalung amannok sik. Jîngkâr rakip a khōhlei nanmanhong hnōm sik; khōhlei rakip a jîngkâr nanmanhong hnōm sik.

⁶⁸RŌNGPU’n sona son avea se nôk hêrmak jo tin chei aleitijen ravâng, Egypt a rakōng vâng aṭhōi male sik chei. Sona nankadōihei hneng sōk changna sik a nanbinga va’njōr sik chei, tâk tûte inkhat in rachôk hnōm mak hei tin chei.”