Read Komrem DÂNRABU INHNINA 29 Bible Online

DÂNRABU INHNINA 29 - Komrem bible

DÂNRABU INHNINA 29

¹Moab ram a Israel leh intepna sik a RŌNGPU’n Moses hneng ṭong apek kha hihei hi kae; hiva rakip hi RŌNGPU’n Sinai Tlânga alei intep puina hei chunga besa hei kae.

²Moses’n Israel mi rakip abek mantûp heia ahri, “Egypt reng, avaikarônhei leh aram shunga khan RŌNGPU’n heimo aleitlo kha nanhmu jo.

³RŌNGPU’n aleitlo ṭit ka-omtatak natna, ṭōn-inlak, det-hla ka-om tak hei kha nanhmu jo.

⁴Tâk tuning katlung nantahmuna hei kha manhret theinachu ama’n lapek mak chei.

⁵Kum 40 RŌNGPU’n nêrdiram a aṭhōi chei, nanpōn leh nankekōk lei inhler hêrmak a kae.

⁶Sâk sik buhlom leh in sik vomhrui theiju leh juthlum leinei mak chei, tâk ama nan-Pathen kae ti kha mantheina sik a RŌNGPU’n nanta madu hei kha apek jo chei.

⁷Eini’n hiva hmun a nihong tlung pha Heshbona Reng Sihon leh Bashana Reng Og he’n eini kadōia re anleitlo. Tâk eini’n hmaimôk nileipek hei,

⁸anram nileilo, Reuben leh Gad khana Manasseh phung ṭimkhat hei hneng nisempek hei.

⁹Nantlona rakip a chung sōkna nanneina sik hiva intepna ahlam rakip hi taksentak a jui ruh.

¹⁰“Tuning RŌNGPU nan-Pathen hmaikunga akangir chei kae, nankhenga — nanhlam kakei, nanṭōnpui karôn, nanpase,

¹¹nannuhmei, nansa, nankâra ka-om nanthing karôn leh nantui kathe ram hlop mi rakip.

¹²RŌNGPU nan-Pathen in nangni leh intepna asyemna shunga hlutna sik a leh khava tlohlam kasōk kha inhlâng sik a tuning hiva hmun a aka-om chei kae,

¹³nangni leh nanpu nanpa Abraham, Isaac khana Jacob hneng ṭong aleitep kapōa nangni ama mi nanchangna leh ama nan-Pathen achangna kha RŌNGPU’n amanchênna sik a kae.

¹⁴RŌNGPU’n hiva intepna aneipui sik hi nangni rōk leh changmak.

¹⁵Tuning hiva hmun a ahmai kunga akangir eini nikhenga leh nisōn anla’nte mak hei le’m asyem sik kae.

¹⁶“Egypt a heikhong mo hringkhō nanlei hmang, mihei ram a heikhong mo nanlei petan ti kha mandonsōt ruh.

¹⁷Anmani mater ka-om thinga, hlunga, dangka leh sana vânga a’nsyem limhei kha nanhmu jo.

¹⁸Tuning hiva hmun a akangir nuhmei, pase, innshung leh phung chei hin RŌNGPU ni-Pathena inphut inhesōt makna sik intluk ruh. Hiva hichu thing kakha leh tûr kanei arajung kathō kapō hongkachang sik.

¹⁹Tuning hiva hmun a ka-om mi inkhatbek in, ama bing hlam a ṭong rangeiloa aleise jo’num, hiva kalûrtak a ngekna hi atheisō leh heirakip hi ama ṭhattheina sik a kae tia a’nhlângmak nan-om makna sik a intluk ruh. Khava khan akaṭha leh akaṭhamak nankhenga asuk manhmang sik chei.

²⁰RŌNGPU’n khava kapō mi kha rangei mandam mak ning. Khava kanek a, RŌNGPU hnuknat kakhôk khan khava mipa chunga kakâng sik, RŌNGPU’n mipa kha amanhmang cher hma seng hiva lekha a a’nzet inrimna rakip achunga katlung sik.

²¹RŌNGPU’n khava mi kha Israel phunghei kâra tekhing amanchang sik, RŌNGPU’n aman theina ṭongtep inzetna lekha a a’nsun inhlut hâksêrna rakip inrimna kha achunga hong katlung sik.

²²“Hnunga nansōnhei leh ram kahlatak a ka-om khōhme he’n RŌNGPU’n nanrama ahei rôn sōt inrimna leh inrengna kha anhmu sik.

²³Hleipuk-hei kha hleichi kachang sik hei, kat leh chi kasip sik; heite kekmak ning, phi kapha’m kekmak ning. Nanram kha RŌNGPU’n ahnuk hmei kapōa anat lai Sodom leh Gomorrah, Adma leh Zeboiim khōpuihei amanhmang kapōa kachang sik hei.

²⁴Khava pha raleichung pumpui in ṭong ander sik, ‘RŌNGPU’n anrama heijâra mo khanga atlo? Ama ahnuk natna jâr kha heimo kae?’

²⁵Ṭong masônna kha hinga kachang sik, ‘Khava ajâr khachu RŌNGPU mihe’n Egypt a inphut aheiṭhōisōt hei pha, anpu anpahei Pathen leh anlei intepna kha ansukkhōia kae.

²⁶RŌNGPU’n ahnenga kamuk mak sik a aleiting, anta leikamuk phungmak pathenhei kha anrazen heia kae.

²⁷Khava jâra RŌNGPU’n amihei chunga ahnuk kana joa lekha shunga a’nzet inrimna kha anrama amathlung kae.

²⁸RŌNGPU kha ahnuk leikana hêr, ahnuk natna vâng khan anrama inphut aphoisōt heia miram a ahlon sōt jo hei kae, khana khan tuning katlung laka-om hei.’

²⁹“RŌNGPU ni-Pathen in athup ajing laka-om; tâk a-Dân khachu aphôngsōt jo, eini leh nisōn he’n ahei tik a nijui sik kasōk a kae.