Read Komrem DÂNRABU INHNINA 3 Bible Online

DÂNRABU INHNINA 3 - Komrem bible

DÂNRABU INHNINA 3

¹“Abâna, eini inhe mea Bashan ramtlâk a kase jo me, Bashan rengpa Og khan ami rakip leh eini kade sik a Edrei khōpui hnenga heikasōk jo.

²Tâk RŌNGPU’n kahnenga aleihri, ‘Ama so ṭitmak roh. Ke’n ama leh amihei khana aram akhenga nahnenga kapek sik che. Heshbon vaikarôn, Amorhei reng Sihon hneng naleitlo kapōhrep a ahnenga tlo roh.’

³“Khang’khan RŌNGPU’n Reng Og leh amihei kha niratha neina thōia aleipek sōt me, khana eini’n ankhenga nileitha heia kae.

⁴Kha leh inṭhōia akhōpui rakip nilo pek jo, nilo pek mak inkhatbek leiom mak a kae. Akhenga khōpui 60 nileiloa kae, Bashana Reng Og vairônna, Argob ramtlâk akhenga kae.

⁵Khōpui rakip hi bang inshângtak, kot khana kot kirna thirtlōn hei vânga kaṭhatak a kur intuk khum hei, khana khō katamtak chu bangrape kasea leika-om hei.

⁶Eini’n khōpui rakip nisuk manhmang hei khana pase, nuhmei, khana naipanghei rakip nileithat hei, Heshbon rengpa Sihon khōpui heia nilei tlona kapōa hrep a.

⁷Ranhei kha nileilo hei khana khōpuihei nei hei kha nilo pek hei.

⁸“Khava pha khan khava Amor reng 2 heia inphut Jordan Tuidung nisōtinga, Arnon Tuidunga inphut Hermon Tlâng katlung nilo jo.

⁹(Hermon Tlâng hi Sidon he’n Sirion anti, Amor he’n Senir anti.)

¹⁰Eini’n Bashan Reng Og ram rakip kha nileilo jo: tlâng phaichama khōpuihei, Gilead leh Bashan ramtlâk a nisōtinga Seleka leh Edrei katlunga.”

¹¹(Reng Og hi Rephaim reng inchaina kae. Ama kalōng sik rakōng kha adung metre 4 kasei, avai kha sedâna tena dungjuia metre 2 kapō inpek hlung vâng ansyem kae. Khavakha tûn katlung Ammonhei khōpui Rabbah a nilahmu ṭhak a kae.)

¹²“Aram kha eini’n nihlōsō pha, ke’n Reuben leh Gad phunghei hneng Arnon Tuidung hnenga Aroer khōpui sak tinga ramṭhen khana Gilead a tlângram ṭhahrep kha kaleipek hei.

¹³Manasseh phung ṭimkhat hei hnenga Gilead ram a’nhleiseng leh Bashan ram pumpui Og vairônna, ti chu Argob ramtlâk akhenga ke’n kamanchen jo hei.” (Bashan hi Rephaim hei ram tia inhret.

¹⁴Manasseh phunga Jair khan Argob ramkei seng, ti chu, Bashan khana Geshur leh Maacah katlung aleihlō jo. Khōhei kha’m ama rahminga aphō jo hei, tûn katlung khahei kha Jair khōhei tia inhret hei.)

¹⁵“Gilead kha Manasseh phunga Machir khan aleichen,

¹⁶Khana Reuben leh Gad phunghei kha Gilead a inphut Arnon Tuidung katlunga ram kha kalei manchen hei. Tuidung alai kha anmani thlang intong ramri kae, sak tinga ramri kha Jabbok Tuidung kha kae, khava ṭhen ṭhahrep chu Ammonhei ramri kae.

¹⁷Tlaitlâk ting chu anram kha Jordan Tuidung katlunga kalensa, sak tinga Galilee Dîra inphut thlang tinga Tuipui Kathi katlung khana nisōtinga Pisga Tlâng abe katlunga kae.

¹⁸“Kha leh inṭhōia, ke’n anhnenga hiva mansenahei hi kaleipek hei: ‘RŌNGPU ni-Pathen in hiva Jordan nisōtinga ram hi nanta hlō sik a apek jo chei. Tûn nanremihei kha revon manvon hei ruh khana Israel phunglak-hei hmating, anram hlōna ava’nthōpui sik a, Jordan rekhat a tirsōt hei ruh.

¹⁹Nannuhmei, nansa, khana nanranhei rōk kha nangni kapek jo chei khōpui heia khan nandahlon sik hei, ran katamtak nannei hei ti kanmanhret.

²⁰Nangni’n nan-Israel changpui hei hi RŌNGPU’n apek hei Jordan tlaitlâk ting so anhlō mak hma seng, khana RŌNGPU in nangnihei sik a hiva hmun a atlodek jo kapōa, sova hmun a son kamōnga aman om mak hma senghei inṭangpui hei ruh, khava sōa ke’n kapek jo chei ram a he’nlethei sik chei.’

²¹“Khava sōa ke’n Joshua kha kalei manse: ‘Nangni’n RŌNGPU nan-Pathen in reng 2, Sihon leh Og hnenga aleitlo rakip kha nanhmu jo; khana nanta hlō sik ram a mi rakip hnenga RŌNGPU’n khang hrep a atlo sik kae.

²²Anmani kha ṭitmak hei ruh, ajârchu nangni sik a RŌNGPU nan-Pathen in re atuk sik.’

²³“Khava pha khan, ke’n malung kahluttak a kaleider,

²⁴‘Chunghnung RŌNGPU, akalen leh ṭōn-inlak natlo sik a’nphutna hrep namanhmu eng kae ti hi kamanhret. Nang ṭōntlo ratha neina hei kapō akatlo tor sik ralei leh marvâna pathen om mak!

²⁵RŌNGPU, kei Jordan tuire kerong, khana tuirea ram thai omna, tlângram kahōi leh Lebanon Tlâng kha va-en hei rong.’

²⁶“Tâk mipui nangni jâra RŌNGPU’n kachunga ahnuk kana joa kaderna arangei pek mak jo. Khava kanek a, ama’n ati, ‘Khavakha katluk jo! Avea heipan mak roh!

²⁷Pisga tlâng lera se roh khana sak leh thlang, nisō tlaitlâk en hei roh. Heimo nahmuhei kha kaṭha en hei roh, ajârchu nang Jordan tuire rakan hêrmak jo che tin.

²⁸Joshua kha ahnenga mansena kha pek jo roh. A’ntlukna kha manngar pek roh, ajârchu nang in nahmu ram a son an-omna sik ama’n mihei kha akei heia re akepui sik hei kae.’

²⁹“Khava jâra eini Bethpeor khōpui hmatak a phaichama leika-om jo me.”