Read Komrem DÂNRABU INHNINA 30 Bible Online

DÂNRABU INHNINA 30 - Komrem bible

DÂNRABU INHNINA 30

¹“Tûn ke’n vângṭhat leh hâksêr kadeina sik a kapek jo chei. Hivaseng hi nanhnenga asōk pha RŌNGPU nan-Pathen in inchek-chaia adana chei jât-hei kâra nan-om pha, ke’n kadei sik a kapek chei hi nanhei mandonsōt sik.

²Nangni leh nansōn he’n RŌNGPU hneng nanhong inlea tuninga kapek chei ṭongpek-hei hi malung kahlut a nanjui inchu,

³RŌNGPU nan-Pathen in maritna anei sik chei. Akathekna chei jât-heia inphut aheiṭhōi male nôk sik chei, amankhang nôk sik chei.

⁴Ralei rakir kahla pena khan aleikathek jo chei inum, RŌNGPU nan-Pathen in amanchun nôk sik chei, aheiṭhōi male sik chei,

⁵nanpu nanpa he’n pha khat a anleiomna ram a vōi khat nan-om theina sik a kae. Nanpu sōnhei kanek a khangsōtna leh pungna amannei sik chei.

⁶Nanmalung pumpuia ama nanlung setna sik khana khava ram a khan nan-omṭhakna sik RŌNGPU nan-Pathen in ṭong juina malung apek sik chei.

⁷Hiva hâksêrna rakip hi nangni inter leh inchok, nan-inrepuihei chunga amalet mathlak sik,

⁸khan chu nangni’n ama nanjui nôk sik jo khana ke’n tuning kapek chei aṭongpek rakip hi nannit sik jo.

⁹Nantlona rakip a RŌNGPU’n amankhang sik chei; tu leh sa leh ran katamtak nannei sik, nanhleia sâng leh be katamtak kasōk sik. Nanpu sōnhei mankhangna aleitlo kapōa nangni mankhangna chunga khan inpâk sik,

¹⁰tâk nangni’n ama ṭong nantajui sik khana hiva ama mantheina lekha shunga a’nzet adân rakip nantanit sik kae. Nanmalung pumpuia ahnenga a’nhe sik chei kae.

¹¹“Tuninga ke’n kapek chei ṭongpek-hei hi khangtuk a’ntak leh nantajui tor mak sik kha changmak.

¹²Hivahi bōirōk a aka-om changmak. ‘Nithei leh nijui torna sik, eini sik a tu’n mo chunga akakea ahei choi mathlak pek sik me?’ tia nantader sik changmak.

¹³Hivahi tui-ôngpui rekhat ting aka-om um changmak. ‘Eini’n nithei leh nijuina sik tui-ôngpui rekhat ting tu mo avakasea ahei choi pek sik me?’ tia nantader sik kha changmak.

¹⁴Changmak, nankâra hin aka-om kae. Nanmanhret, nanhri tor, khava jâra tûn jui jo ruh.

¹⁵“Tuning ke’n akaṭha leh akaṭhamak khana thi leh hringna kâra inkhat kadeina sik a kapek jo chei.

¹⁶Tuning kapek chei RŌNGPU nan-Pathen ṭongpek-hei hi nanjui inchu, ama nanlungset a, ama nanjuia, adânhei rakip nannit a achang inchu, nangni kakhang sik chei, mi kapung jât kachang sik chei. Nanta hlō sik ram khan RŌNGPU nan-Pathen in mahâmṭhat apek sik chei.

¹⁷Ṭong nanjuimak a, nanrangei hnōm mak inchu, khana pathen hlop nankamuk inchu,

¹⁸suk manram sik chei kae, tûn hinahin karakôk chei kae. Nanta hlō sik Jordan rekhat a ram a khan akasôttak om mak tin chei.

¹⁹Tûn nanhnenga thina leh hringna khana Pathen vângpek leh hâksêrna kâra nankadeina sik a kapek jo chei kae, nantakadei chunga khan sâkhi sik a ke’n marvân leh ralei kabek hei. Hringna kha kadei ruh.

²⁰RŌNGPU nan-Pathen kha lungset ruh, ama jui ruh khana taksenthei chang ruh, nanpu nanpa Abraham, Isaac leh Jacob hei hneng pek sik a ale’ntepna ram a khan pha kasôttak ka-om sik chei.”